FILEMON 1:16 - Zapotec Mixtepec: Diidz ne rdeed guielmban

¹⁶ Per bieṉ goṉ, sacdraa luu me niina zig tib zha ne ruṉse xtsiiṉ luu, goṉ gaṉle rrieequia tib bets luu i, tib zha ne nziuu lo luu i nac me. Teḻ naa, sca rzaac naa me, gacxe waa none gleynie luu me; sac goṉ teḻ niina, led loxaque tib nguṉdziindse nac me lo luu, sinque ye tib bets luu nac me, sac goṉ yele me ngab lo Dios.

FILEMON 1:16 Iomraidhean Croise

MATEO 23:8

’Saṉgue to goṉ yguibde to dieṉ zha gnee miech “zha rac” nac to, sac tibaque meṉ rac no, lëë me ga zëëble diidz cxeeḻ Dios; goḻguieṉ gaṉle teḻ to lalga nac to, rrieequia bets to grë to.

HECHOS 9:17

Dzigoraa güey Ananí zaatne no Saul ga. Bdziṉ me, pxobnia me guic Saul, rëb me lo Saul: ―Saul, bina gaṉle bets, laa Jesús goṉ, meṉ ne rnabey, meṉ ne brieequia lo luu zeeṉe ziaad luu nëz ga, laa me pxeeḻ naa ziaḻ naa nu; zeeṉa gnab naa lo me guṉguiac me bziaalo luu, ni ycaania luu guieḻbiini ne rneedz Espíritu Sant.

1 CORINTIOS 7:22

Zha ne sca nac nguṉdziin lo beṉ zeeṉe bzëëb zho xnëz Dios, guieṉ zho gaṉle rrieequia zonlaale zho, sac goṉ laa Jesús psilaale zho lo grëtaa doḻ ne bio zho. Zha ne nacdgaa nguṉdziin lo beṉ zeeṉe bzëëb zho xnëz Dios, guieṉ zho gaṉle tib nguṉdziinle nac zho lo Jesús niina, me rnabey zho.

COLOSENSES 3:22

To ne nac to zha ne lega ruṉ xtsiiṉ beṉ lo guidzliu rii, goḻguṉ grëse miṉe rnabey zho to; guṉde to zeeṉe zose zho lo to dzigose yquiaalo to guṉ to dziin, zeeṉa guiaṉnziuu to lo zho; sinque dib zdoo to goḻguṉ xtsiiṉ zho, goḻguieṉ gaṉle Dios zobwi raṉ me pe ruṉ to.

1 TIMOTEO 6:2

Scaquegaa grë zha ne ruṉ xtsiiṉ meṉ ne rliladzle Xtiidz Dios, none gon zho miṉe rnabey me zho; led guiabd zho por bets zhow, guṉ zho miṉe racladztaa zho. Ni gale none tsienie guic zho wenraa grieequia grë dziin ne noyuṉ zho; sac goṉ lo tib meṉ ne no xnëz Dios ga, lo tib meṉ ne rleynie zho ga yquiin xtsiiṉ zho. Grëse miṉe none naa lo luu nu, pseed grë miech quiw, ni pso diidz lo zho guṉ zhow.

HEBREOS 3:1

Bets, bzian, to ne nac to zha ne bredz Dios ngab to lo me; goḻguieṉ cho nac Jesús, meṉ ne pxeeḻ me biadteed xtiidz me lo miech, meṉ ne bzo me nac pxoz nroob ne rnalo ne niina.

1 JUAN 5:1

Grëse zha ne dib zdoo rliladz ne ible lëë Meṉ ne zëëble diidz cxeeḻ Dios lo guidzliu ga nac Jesús, grëse zha co xpëëd Dios nac zho. Grëse zha co, par guieṉ ne dieṉ pe nli rleynie ne zho, none guieṉ ne dieṉ pe nli rleynie ne Dios, dieṉ pe nli ruṉ ne miṉe rnabey me. Nac cuent rii, zig nac tib yu miech, zha ne rleynie pxoz mëëd, scaquegaa rleynie zho mëëd.