APOCALIPSIS 11:15 - Zapotec Guevea de Humboldt New Testament

¹⁵ Ni rzaꞌu gahdzy ángel pquee trompet, bieññ gahc xtahl riedz gybaa ndip, ganii ne: Dioz ni rtzoo mdad nó, no Crist ni pshahl me lee ba rtzoo mdad gyre ṟeiy lo guiedzylie; no nehx ziuꞌ dzé gydibylgaa de ni gatzoo me mdad.

APOCALIPSIS 11:15 Iomraidhean Croise

MATEO 24:31

No cshaalaꞌ d‑ángel yahcaꞌ ni yquee trompet lehdy gydohp gyre meññ ni güleꞌn lee byzaꞌzy lo guiedzylie, xtâ ru rruu gydap mbeꞌ.

MATEO 6:13

No bwieꞌ noꞌ lehdy di ctzoo noꞌ ni ne bêndzab, mazyg byla noꞌ de lo ni nadz. Porni lii we ni rtzoo mdad, no ni beeiyu lee gyreu, no ni tzuguia, tirgahc no gyre dzé ni ziaad. Modé gacu.

LUCAS 1:33

Ctzoo me mdad meññ-Isṟael, no nehx ziuꞌ dzé gylux de ni dzictzoo me mdad.

LUCAS 15:10

No gapyaꞌ laꞌd, zegahc‑e rxihly x‑ángel Dioz ru to meññ-guîlquie rsaan ni nahcsy ni nac.

LUCAS 15:6

No ru ba bydzihñ me xiryuꞌ me, ptohp me xmígü me no meññ-nuno me gahsh, ra me lee: “Lâ te, güieꞌ laꞌd dshiilyaꞌ ni bynihty. Rxihlyaꞌ, ba bydzial maꞌ.”

HECHOS 4:26

Bydohp ṟeiy yahc ni nu byzaꞌzy no jefy yahc par guhc yâme tohzy, byruu yâme contr Dioz no contr Crist ni pshahl me lee.

HEBREOS 1:8

Per lguia Xiiñ Dioz ne Dioz gahc: Lii we Dioz, no de ni rtzooy mdad nehx ziuꞌ dzé zdibylgaau; no rtzooy mdad xñahzu.

APOCALIPSIS 10:7

Hor-ba rzaꞌu gahdzy ángel sulo yquee trompet, were ba byzaꞌ dzé gydibylgaa ni nungaꞌdzy, mod-gu Dioz xmeññ me ni nac profet yahc.

APOCALIPSIS 12:10

No bieññaꞌ to riedz gybaa ndip, ne: ―Ba bydzihñ dzé guislaa tDioz nó xmeññ me, ba bluu me beeiyu leeme, no ba bluu me de ni ctzoo me mdad, no zegahcu Crist ni pshahl me lee; porni ba byruu bêndzab ni rtzoo contr dirman yahc nó lo tDioz nó dzé no guiaal.

APOCALIPSIS 15:4

¿Dxu we naꞌ di gzacbeeiy lii, Señor? ¿Dxu we naꞌ di cuguia lii? Porni nehx nu ndruhty beeiy lii, no meññ-gyre nacióṉ siahd gzacbeeiy lii, porni ba bwieꞌ yâme rtzooy gyreu xñahzu.

APOCALIPSIS 16:17

Ni rzaꞌu gahdzy ángel blaꞌd xcop me lo mbeꞌ, no bieññ gahc to riedz ndip ni byruu leññ idoró gybaa ru rbia ni rtzoo mdad, ganii ne: ―¡Ba bydibylgaa gyreu!

APOCALIPSIS 17:14

No zdeḻyno yâme Xiily, per Xiily no xmeññ me stzoo gan leeyâme; porni Xiily rtzoo mdad gyre meññ ni rahc ni rnii, no nac me ṟeiy ni rtzoo mdad gyre ṟeiy; no xmeññ me we ni pquee me riedz lee, no ni güle me lee, no ni nehx rsaꞌn leeme.

APOCALIPSIS 19:1

Bylux nirieꞌ bieññaꞌ ndip beeiy xriedz xtahl meññ gybaa, ne: ¡Tzuguia Dioz! TDioz nó ni rtzoo mdad, leeme we bislaa nó, no nu me lo guîlbyniꞌ, no leeme beeiyu lee,

APOCALIPSIS 19:6

Luxu bieññaꞌ beeiy xriedz xtahl meññ, beeiy ru ziaad nisro, no beeiy rnii ngüziee ndip neu: ¡Tzuguia Dioz! Porni Señor ni nac tDioz nó ni beeiyu lee gyreu, leeme rtzoo mdad.

APOCALIPSIS 20:4

No bwien xtahl ru rbia ni rtzoo mdad, no dxie meññ lou ni guhc mdad lee ctzoo guîlguxtisy. No bwien xispirt gyre meññ ni byrug ihqy porni bdee yâme diidz ni günii Jesúz, no porni bieno yâme meññ xtiidz Dioz. Meññ-rieꞌ yahc nehx bzacbeeiy yâme ma-ro ni byruu leññ nisdoo, ni xfigur maꞌ, no ni nehx bdee yâme ñahz nqueꞌ xseñ maꞌ lque yâme ni ña yâme; no bwien gübahñ yâme sto, no güyuꞌ yâme no Crist, ptzoo yâme mdad leññ diymily ihz.

APOCALIPSIS 8:12

Ni rzaꞌu tahp ángel pquee trompet, no gucné to de lo tzonn laꞌy ncübidz, no mboo, no mbial, no gucncawy yâme. Modé to de lo tzonn laꞌy yudzé nehx bdee ncübidz byniꞌ, no to de lo tzonn laꞌy guiaal nehx bdee mboo no mbial byniꞌ zegahc.

APOCALIPSIS 9:1

Ni rzaꞌu gaay ángel pquee trompet, bwien to mbial ni ba biahb lo guiedzylie; no cuaꞌ mbial-rieꞌ xllavy to guieryu-ro ni modni guiat.

APOCALIPSIS 9:13

Ni rzaꞌu shoꞌb ángel pquee trompet, bieññaꞌ byruu to riedz gydap squiñ ltar de or ni zu lo Dioz.