JOSHUA 1:6 - Zotung Bible 2016

⁶ Na thawsaesakuh lah, na rawthungsakuh; pawccecize mih minpaaw hae kya pya lan bya ka kinpyaku hae paw ram tuh e ccungccaw hae hynh na ccousah cih hae.

JOSHUA 1:6 Iomraidhean Croise

GENESIS 12:7

Te Bawipaw nynh Abram kya yn langkuh zah, “E ram hynh na ciihan hae kalan ka pya cih hae,” a ci. Tukeiccuze Abram nynh amaw kya yn langkuhpaw Bawipaw hanlan tuh-e hmin kya silawhang ccangkheit kha a rae.

GENESIS 26:3

E ram kya ramccang ccungccaw hawte umtua, nang kha kae umkhae cih zah hythua kae pya cih; pawccecize e ram balyn hynh namaw te na ciihan hae kae pya cih oh zah na paaw Abraham kya ka kinkupaw byakinnaw kha ka ccingsah cih.

2 SAMUEL 10:12

Rawthungte um lah, ah ccungccaw hae hanlan te ah Pachia khua hae hanlan rawhoyte um oh sih; Bawipaw nynh ahoy a ci thyhte cyih vae sah,” a cipya.

1 SIAPHARAN 2:2

“Laephi ccungccaw balyn nynh a ccianaw hae laanpi langkhe vyavya ka cceih vae cih. Na thawsae sah lah, na rawthung sah,

1 SHERIANAW 22:13

Bawipaw nynh Israel hanlan Moses kalan a pyapaw phungbya te phungzae hae kha hoyte na zui zetuh na laan na sui a ua cih. Na thawsae sah lah, na rawthung sah. Rih nan lah, na bungzou nan sah.

1 SHERIANAW 28:10

Raeringkuh, pawccecize Bawipaw nynh nang kha beikinnthyaa lanpaw inn kha sak lan ae po vae; na thawsaesakuh lah, ryalawtua,” a cipya.

1 SHERIANAW 28:20

David nynh a ccapaw Solomon kha, “Na thawsaesakuh lah, rawthungte ryalawtua. Rih nan, na bungzou nan sah; pawccecize Bawipaw Pachia, ka Pachia tuh na kya a um. Bawipaw inn kya ryalawnaw hanlan rya miakaw na lyn mawlaezung aning nynh nang kha ae vua lan khyh zah shungnaw ae pya lan khyh.

2 SHERIANAW 15:7

Thuasalama nanning tuh nae rawthungsakuh oh! Nae kuih kha a thawzyasah nan oh, pawccecize nae ryalaw mee na mue cih oh,” a cipya.

2 SHERIANAW 20:11

rho lang nae pyapaw ram kyate kaening hynh dee lan oun ccianua hae zah liaru lan oun paccynnuaku hae.

2 SHERIANAW 20:7

Pou kae Pachia, nang nynh e ram kya um hae paw kha na ccungccaw Israel hae malang te na dee hae zah na banpaw Abraham ciihan hae kha zungzae na pya khyh hae tou?

The Psalms 27:14

Bawipaw kha ngaehoikuh oh; nae thawsaesakuh oh lah, rawthungnaw thinlung hoi oh; Bawipaw kha ngaehoikuh oh!

DANIEL 10:19

Aning nynh, “Sungsah lan kou umpaw, rih nan, nang tuh na khyn. Na thawsae sah lah, na rawhoy sah!” yn cipya. Aning nynh he yn hopah tuh thawzung ka mue zah, “Ka bawipaw, yn hopah ccaleih, pawccecize thawzung phe nae pya vae,” ka cipya.

HAGGAI 2:4

Tuhzemah, pou Zerubbabel, na rawthung sah, cite Bawipaw nynh a ci. Pou Jehozadak ccapaw Joshua, ranpibawi lupi, na rawthung sah; ram kya-e ccungccaw hae balyn, nae rawthung sah, cite Bawipaw nynh a ci; ryalawtua oh, cite vaaw Bawipaw nynh a ci,

ZEKHARIAH 8:9

Vaaw Bawipaw nynh hynhte a ho: Vaaw Bawipaw inn, beikinn kha sak khylan athonaw kha bing athua lyaze a la um hae paw profeh hae nynh a ho hae paw hynh-e bya hae hynh atu she kya a thae hae paw nanning nynh nae thawsaesakuh oh.

NAMBAR 26:53

Ram hynh hynh-e hae hanlan mih min alung azya rianaw thyhte rho lang nee athua cih hae.

NAMBAR 33:53

Ram kha nae ram lang kae pya vae oh keiccuze, ram nynh a hoipaw kha na lawkuh cih oh zah tuh-e ram lungkhu khe khua na sah cih oh.

1 KORIN 16:13

Raeringkute lungkyhrarih lan um oh, zynnaw kya tynkaring lan thadyn oh, nae rawthung sah, nae thawsae sah.

EFESA 6:10

Nyathyakou ka uno hae, Bawipaw kya te a thungnaw thawzung kyakhe nae thawsae sah.

DEUTERONOMY 1:21

Dotua oh, Bawipaw nae Pachia nynh nanning kha ram ae pya vae oh; Bawipaw athuapaw nae minpaaw hae Pachia nynh bya ae kinpyaku oh paw ram lang cceihthung oh lah lawkuh oh; rih nan oh lah, nae lungthang nan sah,” kae cipya oh.

DEUTERONOMY 1:8

Dotua oh, ram tuh nae malang ka nung vae; nae minpaaw hae Abraham, Isak te Jakob kalan te minmin koute mih ciihan hae kalan pya lan bya ka kinkupaw ram lungkhu lang tee oh lah, ram nynh a hoipaw kha lawkuh oh,” a ci.

DEUTERONOMY 11:8

Tukeiccuze atunin kaw kae pya cih oh paw hynh-e kawbya abalyn hynh zui oh, tuhteze nynh ccou khylan na ccianua cih oh paw ram lungkhu lang tee lan te ccou lan thawzung na hoi cih oh zah,

DEUTERONOMY 31:23

Oute Bawipaw nynh Nun ccapaw Joshua kha ryalaw pya zah, “Na thawsae sah lah, na rawthung sah, bya ka kinpyaku hae paw ram lungkhu lang Israel hae kha na cciakhae cih hae; kae tuh na kya ka um cih,” a cipya.

2 TIMOTE 2:1

Tukeiccuze ka ccapaw, nang tuh Khri Jesu kya a umpaw thawccinaw kyakhe na thaw la sae sah.

JOSHUA 1:18

Humhung zemah na bya kha ei zah, kaw nae pyapaw miakaw kha a zui leipaw tuh chia athua cih. Na thawsaesakuh lah, na rawthungsakuh,” a cipya hae.

JOSHUA 1:7

Ka ryalahtu Moses nynh kaw ae pyapaw phungbya thyhte raeringkute cyi lan na thawsaesakuh lah, myarya na rawthungsakuh; na ccianaw miakaw kya na laan na sui a ua nawlan, na voi na rang lang maekuh nan.

JOSHUA 1:9

Kae nynh kaw phe kae pya vae khaw: Na thawsaesakuh lah, na rawthungsakuh; rih nan, na bungzou nan sah; pawccecize Bawipaw na Pachia tuh na ccianaw miakaw kya na kya a um,” a cipya.

JOSHUA 10:25

Te Joshua nynh minmin kha, “Rih nan oh, nae bungzou nan sah; nae thawsaesakuh oh lah, nae rawthungsakuh oh; pawccecize na tuk oh paw rhaw hae balyn tungvaw kya Bawipaw nynh hynhcite a cyih cih,” a cipya hae.

JOSHUA 13:6

muaram kya um hae paw abalyn, Lebanon mua kyate Misrefoth-maim kyacia, Sidon hae abalyn. Kamaw ccaccei nynh Israel hae malang kyate ka dee cih hae; kaw kae pya vae hawte ram tuh Israel hae kha nee hae.

JOSHUA 18:3

Tukeiccuze Joshua nynh Israel hae kha, “Bawipaw , nae minpaaw hae Pachia nynh ae pya oh paw ram lang tee lan zah ccou lanpaw kha hohseciamou na sawphahkuh ung cih oh?

JOSHUA 21:43

Tuhcite Bawipaw nynh Israel hae tuh, kae pya cih oh cite mih minpaaw hae kya bya a la kinpyaku hae paw ram hae balyn kha a pya hae; ram kha lah hae zah tuin kya khua a sah hae.

JOSHUA 5:6

Pawccecize Izip ram kyate a pou hae paw minphuin pynpi, rhawkaw hae tuh Bawipaw bya kha ngae khyh hae zah a chi mawlaezung hae, Israel hae tuh ramkaw kya kum sung pali a cceih hae. Bawipaw nynh minpaaw hae kyaze kae pya cih oh cite bya a kinpyaku hae paw ram, mateitui te khoilutui aluanaw ram kha minmin nynh muih lei lante Bawipaw nynh thya a law hae.

1 SAMUEL 4:9

Pou Filistin hae, nae rawthung sah lah, pisepuisaku tua oh, Hebru hae tuh nae see lang a la tang hae hawte, minmin see lang na tang khyh nawlan oh, pisepuisakuh oh lah, rhawtuk oh,” a ci hae.