JOHAN 7:23 - Zotung Bible 2016

²³ Moses Kawbya tuh ro athua khyh nawlan ccungccapaw lu kheit tuh sabbath nin kya vingdung a awku lanze, kae nynh sabbath nin kya ccungccaw lu kheit ka dansah keiccu tou ka tungvaw nae thinria?

JOHAN 7:23 Iomraidhean Croise

EXODUS 31:14

Nanning elang sabbath nin tuh athyaapaw athua keiccuze na nawsah cih oh; sabbath nin kha a thusahpaw miakaw tuh chia a thua cih; sabbath nin kya ryalaw a lahpaw tuh a minphuin laku te vua a thua cih.

MATTHAI 12:10

Tuin kyakhe a kuih voihawlang achihpaw ccungccapaw lu kheit a la um. Minmin nynh Jesu kha a seinaw kae kyngpya ccaw cite, “Sabbath nin kya dansah lan kawbya nynh a ua tou?” cite a khia hae.

MATTHAI 12:2

Tuh-e tuh Farasi hae nynh he a muih hae tuh Jesu kha, “Dotua, sabbath nin kya kawbya nynh cyi lan a ua leipaw kha na zuitu hae nynh a cyi hae,” a cipya hae.

MATTHAI 12:5

Tuhpiaze ranpibawi hae nynh sabbath nin kya Beikinn lungkhu khe sabbath phung kha a lawe hae zemah seibe thua khyh hae cipaw kha kawbya kya na ria boi khyh oh tou?

JOHAN 5:10

Tukeiccuze Judah hae nynh dannaw a muetupaw kha, “Sabbath nin nynh thua, na iphae lawku lan ccan khyh,” a cipya hae.

JOHAN 7:21

Jesu nynh, “Kae nynh ryalaw ccangkheit ka lah zah nae balynte nae ngaeangthua.

JOHAN 9:16

Tukeiccuze Farasi hae abang nynh, “Tuh-e ccungccapaw tuh Pachia kyate yn thuapaw thua khyh, pawccecize sabbath nin kha sung khyh,” a ci hae. Mingccang hae nynh, “Pawcihtemou miseipaw lu kheit nynh hynhcihawpaw muihsahnaw tuh a rae kho cih?” a ci hae. Te minmin laku kya phiakunaw a um.