Itúba Galilea güequi Jesús ruleꞌenie ca benni lheꞌe ca yoꞌo atta rudheti ca benni Israel ca tisa gue Tata Do Iyyabaaha, rixxiꞌanie ca benni ca tisa tsee gue gaxasná rinnabia Tata Do Iyyabaaha lhe reonie ca benni yuꞌu iyáloba isagüe cuerpu guecani lhe.
Diaguaba ttulhe ca nuila ca nu bebea Jesús be xxegüi yuꞌu lheꞌe cuerpu guecani lhe ca nu uyuꞌu isagüe chi beaca lhe. Len ca unní sela María biꞌini teeguaba lábi Magdalena biꞌini bería gasi (7) be xxegüi lheꞌe cuerpu guebi,
Atti chi guadi Jesús lo barcoha nna biríatteba ttu unbiyuu beaca lasni lheꞌe yiesiha yuꞌu be xxegüi lheꞌe cuerpu gueni guatsána Benniha. Unbiyuuha nna isá chi uca bittu rucu xoni, niguaba lä ridorna lheꞌe yoꞌo lhe. Atta seꞌe ca baa gue ca nu yattihaba reꞌan-na.
Len ca benni dia len Jesús, dia ttu nuila. Ttu dialiiba ritsigana. Lana nna chi uca tsiꞌinu (12) ida ratena nua. Chiguaba bea nu te gueni bennitti lona len ca nu run ramedi lhe ttiaca ni ttu ca nua bittu udácana eyoncan na.
Roꞌo yotuha nna do ttu unbiyuu xi, aníaba anca nua ulina. Ttu ttu sába radocana nua roꞌo yotuha daca atta du puerta te láni Nu Gaꞌana Tsee, qui innábana belhi leni ca benni ria lheꞌeliꞌa gue yotuha.