San Juan 15:4 - Zapoteco de Aloápam

⁴ Attiba dua len lebiꞌi, anía gualtseꞌe len neti. Attiba ttu xiqui yaga, gansi bittuba yaxxu nua yagaha nna läga aca ute nua nu xixxi. Anáguaba lebiꞌi, gansi bittuba seꞌele len neti nna läga aca unle nu tsee.

San Juan 15:4 Iomraidhean Croise

San Mateo 12:33

’Ttu ya xixxi tsee nna nu tseeguaba ribía gueni, nu bittu ancana yaga tsee nna lägabi nu tsee ribía gue nua. Larcala nna la nu ribía lo yagahaba ruleꞌe lona bixa yaga nua.

San Lucas 8:15

Ttiaca ca xua binna lo yu tseeha nna ancaque ca benni nu itú iqui itú lecani rienquinna ca tisa-na, rigúa tseecana nu rá benna lheꞌe lastoocani lhe. Denua nna riseꞌetsitsicana lhe satíaba seꞌecana runcana nu anca tsee lhe.

San Juan 14:20

Gansi chi bisía sá aca nu ria-ni nna lania nna ttedeenle neti nna ttuba Benni anca lenia tata quiaha, lebiꞌi nna ancale ttuba benni leni neti, neti nna anca ttuba Benni len lebiꞌi.

San Juan 17:23

Lu nna dulu len neti. Neti nna dhua len lacana, qui dhacana eꞌeyucana acacana benni seꞌe ttuba. Anía liba nna ttedaani ca benni bittu ria lecani lu, gualíba lu udhelhalu neti, raquinlu guecani attiba raquinlu quia lhe.

San Juan 6:56

Nu gona bela quia-ni lhe iꞌiyana reni quia-ni lhe unnuha duna len neti, neti nna dua len lana.

San Juan 8:31

Jesús re ca benni Israel chi güia lecanie: —Gansi lebiꞌi nna usiguile udole tisa gue nu ria le-ni nna lania liba acale nu gualíga anca nu rudheti ca tisa ruleꞌa.

Hechos 11:23

Atti chi bisínbi nía nna biláttebinbi tseeba anca nu run Tata Do Iyyabaaha len ca biꞌiniha. Laniala nna bedaca lebi de reꞌoba lebi gue ca biꞌiniha. Lenla nna belisabi iyába ca biꞌiniha rábi cabi: “Ttu tsa oquinna iquicabi itú iqui itú lecabi tsia lecabi Jesús.”

Hechos 14:22

Lheꞌe ttu ttu ca yiesi atta betecabiha nna beseꞌetsitsicabi ca benni ria le Jesús seꞌe nía, tsitsiba belisacabi ca biꞌiniha qui bittu ixulhaquinbi ca tisa gue Jesús. Ráguabacabi ca biꞌiniha, qui etaꞌacabi atta rinnabia Tata Do Iyyabaaha nna labíaba uyúcabi ixeloba ca elha disa.

2 Corintios 13:5

La lebiꞌiba gualtsatsa niꞌa gue nu anca guele, qui ttedeenle gansi gualí ria tsitsi lele Jesús. Gualcuꞌu bia la lebiꞌiba. ¿Si bittuba ritedeenle yuꞌu Jesús Benni anque Cristu lheꞌe lastoole? Gansi bitturba Benniha yuꞌu lheꞌe lastoole nna lebiꞌi nna lärga gualínle ria lele Ben-na.

Gálatas 2:20

Attisiba leni Cristuhaba nua chi utáya lo ya crusi. Larcala attisiba lärganu neti do, Cristuhaba doe lheꞌe lastooa. Doa anca bania nnanna de ria lasia Xiꞌini Tata Do Iyyabaaha. Lee nna de ucanie quia nuarca bete cuerpu guee qui uttie lo niꞌa quia.

Efesios 3:17

Rinnabaguaba loe unie dho Cristuha lheꞌe lastoole de ria lele Ben-na, anáguaba qui acale benni seꞌe tsitsi racaruni gue loesni lhe

Filipenses 1:11

Jesucristuha unie acale nu tsapaba uni nu anca tsee, qui cuequi xxen ca benni Tata Do Iyyabaaha, innácana Ben-na anque Benni ra xxeni lee.

Colosenses 1:23

Larcala raca duelha usiguile tseꞌe tsitsile leni nu chi güia lele. Tsa bittu udhanle uxxen lele edí baale nu rá ca tisa gue Jesús chi bieninle. Ca tisa-na ben-na chi runa ca benni seꞌe biꞌa cana yies lo yu-ni. Neti Pablo anca benni bodú Tata Do Iyyabaaha quixxiꞌaya ca tisa guee-na.

Colosenses 1:27

Cumu raca lee Ben-na ttedeenle, lebiꞌi ca benni bittu ancale benni Israel, gue elha tsee xeni guee te gatsinie ca tu atti nía. Nu te gatsinie nna ancana: Cristu chi doe lheꞌe lastoole. Ben-na anque Benni runi uxxen lele guadíbale nu tsee ribedari edí baari iyyabaaha.

Colosenses 2:6

Larcala nna attiba chi güia lele Jesucristu anque Benni bananie ri, aníaguaba nna gualtseꞌe gualuni nu raca lee Ben-na.

1 Tesalonicenses 3:5

Denuala nna atti bitturu udáya uchíana nna udhelhatteba Timoteo etegüiabi qui aca xen lasia gansi gua riaru lele Jesús, cumu rastia quila biaca bi uni nu xxegüiha dhi yien le udhequile ria lele Jesús. Lania nna sina bentuha nna bittubi ixuuna.

Hebreos 10:39

Ttiaca riꞌi nna läga ancari loes ca nu readigaa lo neda gue Tata Do Iyyabaaha, cumu ca unnuha nna dia nittibacana. Riꞌi ancari ca nu lhári de ria leri Ben-na.

1 Juan 2:6

Benni rána duna len Benniha nna raca duelha unna atti ben Cristu atti güequie yies lo yu-ni.

2 Juan 1:9

Nuxaba bittu ruleꞌena nu beleꞌe Cristu, lana nna attu nu subi la diana runna läganu Tata Do Iyyabaaha du len unnuha. Nu rusiguina ruleꞌena nu beleꞌe Cristuha liba nna du lenna Tata gueri do iyyabaaha, du lenna Xiꞌin Benniha lhe.