1 Juan 4:2 - Zapoteco de Aloápam

² Aní unle qui ttedeenle ga du nu gualínna du Espíritu gue Tata Do Iyyabaaha len lana: Iyába ca nu ridí roꞌocani rácana Jesucristuha bite yies lo yu uque benni attiba riꞌi, ca unnuha nua gualíba yuꞌu Espíritu gue Benniha lheꞌe lastoocani.

1 Juan 4:2 Iomraidhean Croise

San Juan 1:14

La tisaba Benniha beaque benni, udoe len riꞌi. De nu guate Benniha, besiꞌin Tata Do Iyyabaaha ri, ruleꞌenie ri nu gualí lhe. Begüiari elha ra xxen le guee bete Tata Do Iyyabaaha de tturba Benniha anque xiꞌinie.

1 Corintios 12:3

Larcala nna raca lasia unale nnanna: “Ni ttu benni chi yuꞌu Espíritu gue Tata Do Iyyabaaha lheꞌe lastooni, aca quena iqui Jesús.” Bittuguaba aca inná ni ttu benni: “Jesús anque Benni bananie neti”, gansi bittuba yuꞌu Espíritu gue Tata Do Iyyabaaha lheꞌe lastooni.

1 Timoteo 3:16

Gualíba, xxenba anca gue ca tisa gue Cristuha chi yuri nnanna nu bittu chi yu benni ca tu ttuha: Jesús bite yies lo yu-ni, uque benni attiba riꞌi. Espíritu gue Tata Do Iyyabaaha beleꞌe loe gualíba anca Jesús benni runi nu anca tsee. Biláni ca ingeli gue Tata Do Iyyabaaha Benniha lhe utixxiꞌacana gue Benniha leni ca nu bittu anca benni Israel-na lhe. Güia lee ca benni seꞌe yies lo yu-ni Benniha, bedí Tata Do Iyyabaaha Benniha qui besine attu libe iyyabaaha lhe.

1 Juan 1:2

Benni anca elha nabaniha nna bisíe yies lo yu-ni qui beleꞌe loe len benni. Riꞌitu nna bilentue, rixxiꞌatu guee lhe. Rixxiꞌentu le gue Benni rute elha nabani ttu dia lii-na. Benniha nna leni Tatahaba doe, lenla nna bisíe yies lo yu-ni qui beleꞌe loe len riꞌitu.

1 Juan 2:23

Iyába ca nu riguꞌu niꞌacani Xiꞌini Tata Do Iyyabaaha, läga seꞌe ca nua len Tata Do Iyyabaaha. Nu ridí roꞌoni anca bienna Xiꞌini Tata Do Iyyabaaha nna duguaba nua leni Tata Do Iyyabaaha.

1 Juan 4:15

Nuxaba benni ridí roꞌoni rána Jesús anque Xiꞌini Tata Do Iyyabaaha, unnuha duna len Tata Do Iyyabaaha, Benniha nna due len lana.

1 Juan 4:3

Nu bittuba ridí roꞌoni gualí uca Jesucristuha benni attiba riꞌi atti bite yies lo yu-ni nna lägabi Espíritu gue Tata Do Iyyabaaha yuꞌu lheꞌe lastoo nua, espíritu gue nu lä raca uyúna Cristuhaba yuꞌu lheꞌe lastoo nua. Lebiꞌi nna chiba bieninle dequi isía nu lä raca uyúna Cristu, nnanna nna chiba requi nua yies lo yu-ni.

1 Juan 5:1

Iyába ca benni ria lecani Jesús anque Cristu, ca unnuha ancacana xiꞌini Tata Do Iyyabaaha. Ca benni racaquinna gue Tataha nna racaguabaquinna gue ca xiꞌin Benniha.

2 Juan 1:7

Cumu ixeru ca güen lasi chi requi yies lo yu-ni, bittu ria lecani uca Jesús Benni anque Cristu ttu benni attiba riꞌi atti bite yies lo yu-ni. Ca nu rinne aná nna nu güen lasiba anca ca unná, nu lä raca uyú Cristuhaba ancacana.