1 Juan 3:16 - Zapoteco de Aloápam

¹⁶ Cristuha betee elha nabani guee qui uttie cuenta gueri. Anioca nna yuri gasná anca aquin gue loesri. Anáguaba riꞌi nna daa lori edí edenri ca benni ria le Jesús, masquiba gattiri cuenta guecabi.

1 Juan 3:16 Iomraidhean Croise

Efesios 5:2

Gualtseꞌe gualaquin gue iyába benni attiba ucani Jesús gueri. Benniha nna ucaba lee bete elha nabani guee qui uttie lo niꞌa gueri. Lee nna uque attiba ttu úna nu rure xixxi lo Tata Do Iyyabaaha.

San Juan 13:34

Ttu ley cubi utea len lebiꞌi: Aquin gue loesle. Attiba ucatia guele, anía aquin gue loesle.

San Juan 3:16

’Tata Do Iyyabaaha nna raca juisianie gue ca benni, denuala nna udhelhe yies lo yu-ni neti Xiꞌinie Benni tturba donie, qui anáchu nna iyába ca benni tsia lecani neti nna bittu tsia nitticana, sinuqui gatta elha nabani guecani ttu dia liiba iyyabaaha.

Romanos 5:8

Ttiaca Tata Do Iyyabaaha beleꞌe loe racanie gueri, denua nna atti sna ancabari nu runi nu lä anca tsee, Cristuha uttie qui utixe nu dica quixari.

Apocalipsis 1:5

Anáguaba uni Jesús Benni anque Cristu len lebiꞌi. Lee anque benni rixxiꞌa nu anca gualí, anque Benni primerba beadhe lheꞌe baa atta yuꞌu ca nu yatti-na lhe anque Benni rinnabia ra xxeni lee gue de lo iyá ca nu rinnabia seꞌe yies lo yu-ni lhe. Lee nna racanie gueri. Leni reni guee bilali atti utee lo ya crusiha nna bodile ri lo ca tulha gueriha.

1 Pedro 3:18

Cumu Cristuha nna anáguaba guate Benniha, lo niꞌa gue ca tulha gueri, ttu libeba uttie qui utixe gue iyábacana. Benniha anque ttu Benni bittu tulha guee te, ttiaca chi uttie lo niꞌa gueri nu te tulha gueni, anía liba nna eche Ben-na ri len Tata Do Iyyabaaha. Cuerpu gueeba Benniha utti, ttiaca atti beacanie nna anca banba espíritu gue Benniha do lheꞌe cuerpu cubi guee.

San Mateo 20:28

Attiba neti, Benni unbiyuu daa iyyabaaha, läga delha yies lo yu-ni qui udá ná ca benni loa, sinuqui delhaba qui udá náya lo ca benni, gattia utea elha nabani quia qui lhá ixeru ca benni qui bittu tsia nitticana lhe.

Hechos 20:28

Larcala nnanna nna rulisa le, gualtseꞌe tsitsi, gualuyú ca benni ruleꞌenle nna atta chi bodú Espíritu gue Tata Do Iyyabaaha le acale nu lo gue ca biꞌin-na. Attiba ttu benni rapa carneꞌe tsitsi gualuyú ca benni chi anca gue Jesús, cumu leni reni belali Benniha lo ya crusiha nna benie aca ca biꞌin-na guee.

Efesios 5:25

Lebiꞌi nna ca unbiyuu, aquinle gue ca nuila guele-na, attiba racani Cristuha gue ca benni ria lecanie, de unnuha nna nuarca bete elha nabani guee qui uttie cuenta gueri,

Tito 2:13

Aná unri laca seꞌeri ribedari isía sá gaꞌana tsee chi xen leri isíha, delába la sá esía Jesús Benni anque Cristu dedee lheꞌe xieni gaꞌana tsee guee. Benna anque Dios ra xxeni lee gueri, Benni rodile ri lhe.

Romanos 16:4

Lacabi nna bexunnina guecabi gatticabi lo niꞌa gue de bodilácabi neti, denua nna läga sunru neti rpea cabi xquixaru cabi, sinuqui anáguaba iyába ca benni ria le Jesús bittu anca benni Israel.

1 Juan 2:6

Benni rána duna len Benniha nna raca duelha unna atti ben Cristu atti güequie yies lo yu-ni.

San Juan 10:15

Attiba tata quia anca bienie neti, anáguaba neti anca biaguatie. Neti utea elha nabani quia qui odiláya ca benni, attiba ttu benni re lo ca carneꞌe rerú iqui rerú leni elha nabani gueni rutena cuenta gue ca carneꞌeha.

Filipenses 2:17

Masqui utticana neti, elhutti quia nna acana ttu úna utea len Tata Do Iyyabaaha itupa leni nu tsee runle lo Ben-na de ria lele, cumu unná ancana úna rutele len Ben-na. Neti nna attulade eyoꞌo lasia gansi anía aca, unguaba qui edaca lee iyábale len neti lhe.

Apocalipsis 5:9

Lacabi nna rulhacabi ttu cantu cubi rácabi benni anque Carneꞌeha: Lu ancalu Benni elha ralhalu udaxxulu sitsi-na, cualu ca sellu re roꞌo sitsi-na lhe. Cumu lu nna bettican lu, leni reni gueluha nna bodilálu iyáxeaba ca benni seꞌe lheꞌe iyába ca yiesi seꞌe itúba yies lo yu, iyáloba benni lhe ca benni rinne iyáloba tisa lhe qui acacana gue Tata Do Iyyabaaha.

1 Pedro 2:24

La laba Cristuha bedelha cuꞌe yua gue ca tulha gueriha atti uttie lo ya crusiha, qui riꞌi nna tsa ocaꞌanri nu lä anca tsee runriha attisiba chiba uttiri, ttiaca nnanna seꞌeri anca banri qui anáchu riꞌi nna tseꞌeri unri nu anca lhatsiru. Ca güee uca Cristuha nna benie qui beacale.

1 Pedro 1:18

Cumu chiba yule, Ben-na bodile le lo nu lä anca tsee seꞌele runleha nu bidetile gue ca benniola gueleha, anáguaba gua yuxeabale läga len oro o len plata nu risíaba riseꞌelona utixa Ben-na qui ulále bittu dia nittile,

Filipenses 2:30

Biꞌin-ni nna a saroꞌoba lä uttibi lo niꞌa gue de runbi sina gue Cristu. Lababi berú iqui berú lebi elha naban guebi qui bitabi benbi neti yuda, cumu lebiꞌi nna bittu uca unle neti yuda de idittuba seꞌele.

San Juan 10:11

Neti anca attiba ttu benni ruyú tseena ca carneꞌe gueniha. Nu ruyú tseena ca carneꞌe gueniha nna rerú iqui rerú leni rute elha nabani gueni cuenta gue ca carneꞌeha.

1 Tesalonicenses 2:8

De racabintu guele nna larcala nna uquintu läga suntteru ca tisa gue Tata Do Iyyabaaha quixxiꞌentu le, anáguaba berú iqui berúguaba letu elha nabani guetu utetu cuenta guele de raca siꞌibintu le.

1 Juan 2:9

Benni rána dequi gua dubana lheꞌe xieni nna ttiaca rutía dirba leni benni nna unnuha nna atta chulhaba sna duba nua.

2 Corintios 4:12

Larcala nna riꞌitu seꞌetu roꞌo iyya roꞌo belaꞌaba gattitu de rixxiꞌatu ca tisa gue Jesús, laca lebiꞌi nna ridíle elha nabani gatta ttu dia lii guele.