NEHEMIA 9:29 - AMÜSÜH HÜM CL Bible (BSI)

²⁹ Nü yuzüng anishihpü nünü arü ki müzünde tha, tüshe arünü ha anibah rhangdung lapü thsüthsü she arünü kükheangde nü yakzan mani, tüshe nü yakzan azhihde neak yihbeak. Mulong müküpde tüsho nihnihde, arünü mihyuanipü reanglo.

NEHEMIA 9:29 Iomraidhean Croise

2 KIULONG THSÜRÜ 17:13

Tütüshe Atungpuhnü Israel tüsho Juda ki wukihrü aban tüsho angürü aban hode tha, “Inü nüsa jipürü kilim thiyukhüm jihkhi yakzan tüsho I yamlarü wukihrübo inü nüsa kilim thiyikhi yande nüsa amütsü limrobo chingnü rholoang tüsho I yukhümbo le I yakzanbo zoang.”

2 KIULONG THSÜRÜ 17:14

Arü jipürünü Atungpuh arü Thrünpuh kheak mükinkhi nangde, arünü mani tüshe nihnihde la.

2 KIUTHSÜYUKHEAN 24:19

Tütüshe apinü arü Atungpuh kilim belode arüpü arü bolung wukihrübo yüshih; arünü arü azhihde thiyumütsan jih, tüshe arünü mani.

2 KIUTHSÜYUKHEAN 33:10

Atungpuhnü Manase tüsho api mihtsürübo ki asuk, tüshe arünü mani.

2 KIUTHSÜYUKHEAN 36:15

Atungpuh , arü jipürü Thrünpuhnü api yunithsürübo hode mutukzhakde arü kilim thiyusheak yüshih, tümütüsho apinü anihbuh mihtsürü tüsho api lapung kheak amuzho lakheah;

NEHEMIA 13:15

Judüki Juda ching mihtsürübo Amuni kurungaso chingnü ake nitkhitde inü ngü. Püpürübo hi, yukhu, kurungaso, khubaso tüsho püpü kukruk hah thsüa donkibo hanshihbah Jirusalem lim yüde ngü; Amuni tümü she düyin de arü ki inü müzündoabah.

NEHEMIA 9:10

Pharao kiulongthsüpuh, atorü tüsho ju lo mihtsürü azhihde mükheahmihbe tüsho khinthiyinbe yüshih, tümüde arünü nü mihtsürü küde junokheanü nünü mükheah. Nünü nü mungthukhi khihni khiungde lah.

NEHEMIA 9:16

Tüshe isa jipürübonü nihnihde la tüsho nü yukhüm mani.

NEHEMIA 9:26

Tüshe nü mihtsürübonü nü azhihde mihyu mani; nü yakzan arü dunglim bah. Wukihrübo sherünü nü kilim rholoang de arü müzünde azhikheanü laksah. Arünü khide nü mükhemürang thsü,

NEHEMIA 9:30

Kam ashang nünü arü ki arümkheam, tüsho nü memüsühnü wukihrübo hode thashih; tüshe arü nükhünnü mani, jumonü nünü arübo püpürü lomi khah ching jihabah.

ABEKHIT 10:3

Jumonü Mosa tüsho Aronnü Pharao ki yübah tha, “I Atungpuh Ibrirü Thrünpuhnü ha thachoh: ‘Nünü I miki azhihayihpü külokhüh thsungloba? I mihtsürübo tsoshang, junangde arünü I tankihbah.

JEREMIA 17:23

Tütüshe arünü mani yungsho arü nükhün mumupho; arünü arü hungbo chungthülang tüsho mani yungsho thsangdan müleangkhi.

JEREMIA 19:15

Wuto Atungpuh , Israel Thrünpuhnü ha thachoh: Kheakü inü ha kiuto tüsho kiutobo kheak inü azhihde athakhi thsümütsü alala handarüchoh, tümütüsho arünü I yubo anipü reanglode arü hung chungthülangdo.

JEREMIA 42:19

Atungpuhnü nüsa ki thado, O aningkhi Juda, Ijip lim düyü. Inü khihni nüsa ki thakhi tsüde lümrhangang,

JEREMIA 43:2

Hoshaia tsührü Azaria le Karea tsührü Johanan tüsho püpürü bukmüke mihtsürübo alalanü Jeremia ki tha, “ Nünü akeangyu thachoh. Atungpuh isa Thrünpuhnü hade athashihpü nü müthiyi, ‘ Ijip ching lapü düyü’;

JEREMIA 44:10

Arünü azhihayihkhi yungsho atrekhi khihni khiungde muhuh, yungsho inü nüsa le nüsa jipürü miki zojihkhi I yakzan tüsho I yuzüngbo ching arünü mütsah.

JEREMIA 7:26

tütüshe arünü I ki mani yungsho manguh, tüshe arü hungbo chungthülangde la. Arünü arü jipürü kheaknü amütsübe rhimodo.

EZEKIEL 20:11

Inü arü kilim I yakzan thsükhibo jih tüsho I yakzanbo arü ki mükheahshih, tümüde jurü mihyu anikhi hode mihbüm aban alabah.

DANIEL 5:20

Tüshe küyimki api mulong müküpde tüsho kükheangde kamkhea, api kiulongthsü-binkiu kheaknü akishih tüsho api müretahkhi luabahjih.

HOSEA 6:5

Jumonü inü arübo wukihrübo hode lipshaka bahshih, I yubo hode inü arü laksah, tüsho I mahkhapkhi tsün nangde mikhuh yüchoh.

LEVI 18:5

Nüsanü I yakzan thsükhi tüsho I yuzüngbo zoang; jude athsükhinü nüsa rhangdung labah, I Atungpuh .

MATHI 19:17

Jisunü alo, “Tümüde nünü I ki atsü dünkheak keokhicho? Atsü khülang lang lah. Nünü rhangdung lapung ching yüzahnesho, thiyukhümbo zoang.”

LUKNÜ ATHRÜTKHI THIYUSHEAK-ATSÜ HUHTANYU 10:28

Tüsho apinü anihbuh ki tha, “Nünü dükde alodo; ha rhimoang tüsho alabah.”

ROMRÜ KILIM PAULNÜ ATHRÜTKHI KIHÜM HUHTANYU 10:5

Mihtsürü shepünü yakzan kheak ningkihkhi thiyuro-lungki rhimochonü junü rhangdung labah de Mosanü thrüt.

GALATIA 3:12

tüshe yakzan ju akin kheak müla, tümüde “Shepünü jurü rhimochonü jurü hode arhang labah.”

YUZÜNGTHALO 31:21

Tüsho küyimki amütsübo tüsho thsümütsübo arü kheak arübanü, ha khünnü arü azhihde thiyumütsan thsübah; tümütüsho arü tsühsoniusobonü mümihabah, tümüde inü arü kilim jihpü thiyuchihchimkhi lo lim bede müyüyide arü lümkhi inü mükheahlah.”

YUZÜNGTHALO 31:27

tümüde nüsanü azhihkhi tüsho yihkhrokhi inü mükheahlah. Khihni I nüsa lung lachokiyamnü nüsanü Atungpuh azhihde lado, dale I sheshu a küdükhüh laba?

YUZÜNGTHALO 4:26

khihni nüsa azhihde inü thüning tüsho alo jichoh, junangde nüsa Jordan hode ayükhi lomi chingnü shahde adükheakkhambah; nüsa nimungbo mushuhakhin, tüshe shahde adükheakbah.

MAHKHAPRÜ 6:10

tüsho inü nüsa ki tha, ‘I Atungpuh nüsa Thrünpuh; nüsanü nüsa lakhi lo ching Amorrü thrünpuhbo ki wüntre müjihbeah.’ Tüshe nüsanü I yu mani.”