JEREMIA 4:13 - AMÜSÜH HÜM CL Bible (BSI)

¹³ Kheahang! Api amobo nangde akihchoh, api khora-lolungbe chitmühean nangde; api khorabo müleang kheaknü athribe–isa are, tümüde isa thsümünima lah!

JEREMIA 4:13 Iomraidhean Croise

2 SAMUEL 1:23

Saul tüsho Jonathan, amuzhodakkhi tüsho atsüdak! Rhangdung lachoki tüsho ashechoki ane mazü; ane müleangtopü kheaknü athribe lakheah, ane kekhüzübo kheaknü sühmüh lakheah.

ISAIA 13:5

Arübo limshu lomi chingnü arüchoh, thüningbo akheam chingnü, A TU N GPU H bukakhiukkhi thsühnukbonü lomi athrünkhi thsümünimpü lah.

ISAIA 19:1

Ijip dünkheak müchityu. Kheahang, Atungpuh ju ashankhi amo kheak binlah tüsho Ijip lim arüchoh; Ijip sangthsübo api miki ajanbah, tüsho arü bolung Ijiprü mulong niuthünakbah.

ISAIA 3:8

Tümüde Jirusalem jing mükhedo tüsho Juda angakdo, tümütüsho arü yu thakhi tüsho arü rhimobonü Atungpuh azhihkhi lah, api müretahkhi arün thsüshihdo.

ISAIA 5:28

arü hühzobo züpzüplah, arü sanglühbo alala hündübümlah, arü khora biuobo molaklung nangde lah, tüsho arü lolungbe-jingbo chitmühean nangde lah.

ISAIA 66:15

Tümüde Atungpuh mo ching, tüsho api khora-lolungbebo chitmühean nangde, api bukakhiukkhi jihlopü bukmüshakkhi ching, tüsho apinü thürühkhi motru ching arübah.

JEREMIA 10:19

I yurikhi dünkheaknü I ayokhe! I mü mütsüdak. Tüshe inü tha, “Tsükjide ha I thsümüchi lah, tüsho inü arümbeah.”

JEREMIA 4:12

khide amüküp pung I kilimnü arükhi khülang lah. Kheakü arü azhihde inü mahkhapbah.

JEREMIA 4:31

Tümüde azoberü thsünüchoki nangde azhikhi khülang inü sodo, anihbe tsührü atuzuk zübechoki nangde, Zion azhikhinü sheak dükipchoh, anihbe khah chungkihchoh, “ I ayokhe! I mihkhukrü miki sheshihchoh!”

JEREMIA 46:18

Atsütsü I lah, kiulongthsüpuhnü thachoh, shepü mung Wuto Atungpuh la, awungbo lung Tabor nangde tüsho keto yean Karmel nangde khülang arüchoh.

JEREMIA 48:40

Tümüde Atungpuhnü ha thachoh: Kheahang, api müleang nangde phinkhibah, tüsho Moab azhihde aghidükeangbo chutreakbah;

JEREMIA 49:22

Kheahang, müleang nangde apinü müheankihbah tüsho phinkhibah, tüsho Bozra azhihde api ghidükeang chutreakbah, tüsho ju nimung Edom thirithsürübo ju aliberü khungarü ngüpü thsünükhi nangde alabah.

JEREMIA 6:23

Arünü sanglüh tüsho thsüh thrüa luchoh, arü bukmüke tüsho mihmüthsüm müla, arü düsheak ju keto ahukkhi nangde lah; arübo khorabo kheak binlah, thirithsürü nangde nüsa azhihde züt thsülah, O Zion tsührübe!

JEREMIA 9:19

Tümüde mitripkhi düsheak Zion ching sochoh: “ Küde isa thsümünima la! Isa abümnü achihdo, tümütüsho isanü lomi bahjihdo, tümütüsho arünü isa lapung keamshihdo.”

TÜZHOKHI 4:19

Isa müshamrübo ju thüning ching müleangbo kheaknü athribe lakheah; arünü isa müzüngbo kheak yande müsham, arünü sunglo ching isa aleangde bin.

EZEKIEL 26:10

Api khorabo ahihdo lakhinü asungthulungnü nü hingdobah. Khoraberü, lolungbejingbo, tüsho khora-lolungbebo chipi keamkhi kiuto ching yüchoki nü chipiripitbo niukbah.

EZEKIEL 38:9

Nü mikhuh ching, tsüngpungtsüngpung khülang nangde arübah; nü ju alomi shodokhi amo khülang nangde, nü tüsho nü yo thirithsürü alala, tüsho nü lung mihtsürü ahihkhüh labah.

DANIEL 11:40

“ Kim akheam ching Ijip kiulongthsüpuhnü api yanbah, tüsho Siria kiulongthsüpuhnü api wu alala, khora-lolungbe, khorabo, tüsho sangkungbo ahihdonü keochihlobah. Apinü düchinü azünkhi nangde lomi ahihkhüh ching yüzahbah.

DANIEL 7:4

Akhuhbe ju kekhüzü nangde tüsho müleang ghidükeang kihbah alakheah. Jushu, inü kheahshe, aghibo ju dukkhi, tüsho alo kheaknü ju shuhkih tüsho mihtsürü nangde jing mahnenü zhip; tüsho ju kheak mihtsürü mulong jih-a lakheah.

HOSEA 8:1

Nü münküp kheak hulipungpung dünkihang! Müleang nangde Atungpuh yam kumung khülang lah, tümütüsho arünü I tangzüng thsümünimdo, tüsho I yakzan lakmihdo.

MIKA 2:4

Ju nimung arünü nüsa azhihde korak-khün thsübah, tüsho khühde tüzhokhinü mulong rozhakbah, tüsho athabah, “ Isa shahde thsümünimdo; Atungpuhnü I mihtsürü lakhit hande tsodo; künangde apinü ju I kheaknü luakhinkhea! Isa ramrü kilim apinü isa lubo chama jihdo.”

NAHUM 1:3

Atungpuhnü arünnü bukakhiukchoh tüshe wu ching ato, tüsho Atungpuhnü küdüdüshe amülimrü müthsümüchidüa mülachoh. Api limro ju chinthrüm tüsho tsüngpungtsüngpung ching lah, tüsho amobo ju api jing yo asungthulung ah.

HABAKKUK 1:8

Arü khorabo ju sangtsung kheaknü athribe, are tsahbe rimre kheaknü alü amüshakbe; arü khorabonü khuchoh. Arü khoraberübo limshu chingnü arüchoh; arünü müleang phinkhi nangde shih tsühpü yungde akichoh.

ZEKARIA 6:1

Tüsho kheaküshe inü abinkih-a kheah tüsho müwayinchi-müzüng mahne chingnü khora-lolungbe jing akhiukde ngü.

MATHI 24:30

Judüki Mihtsürü Tsührü amütsan thüning ching akhiukbah, tüsho alomi trük alalanü atripbah, tüsho arünü Mihtsürü Tsührü thüning kheak amo ching wu tüsho müretah ato ching arükhi ngübah.

YUZÜNGTHALO 28:49

Atungpuhnü trük khülang müleang nangde aphinkhi, nüsanü arü yutha mümükheahkhi trükshih, alomi akheam, limshu chingnü nüsa azhihde handarübah.

AMIKHEAKAKHIUKKHI 1:7

Kheahang, api amobo chingnü arüchoh, tüsho mihbüm aban, api chinkhitshihkhi müknü api ngübah; tüsho alomi trükbo alalanü api dünkheak tüzhobah. Junangde alabah. Amen.