JAKOB 2:25 - AMÜSÜH HÜM CL Bible (BSI)

²⁵ Tüsho junangde müzammürambe Rahabnü she yunithsürübo beyukbah limro püpünü awukhiukshihchoki rhimobonü anihbe alim mütsankhi yung de?

JAKOB 2:25 Iomraidhean Croise

MATHI 1:5

Salmon kheaknü Rahab hode Boaz trükkhit, Boaz kheaknü Ruth hode Obed trükkhit, Obed kheaknü Jesse trükkhit,

MATHI 21:31

Mahne bolung shepünü abuhnü alümkhi rhimokhea?” Arünü alo, “Akhuhbuhnü.” Jisunü arü ki tha, “Atsütsü inü nüsa ki thachoh, ruk-threrü tüsho müzammüramrübo nüsa müngühnü Thrünpuh kiulongthsü ching yüchoh.

YUNIRÜBO RHIMO 17:7

tüsho Jasonnü ane beyukdo; tüsho arü alalanü Jisu ju kiulongthsüpuh ah de thade Kaesar yakzan azhihchoh.”

IBRI 11:31

Akin hode müzammürambe Rahab mihyumanirü lung müdükheakshih, tümütüsho alibenü zütakheahrübo asühde beyuk.

JAKOB 2:18

Tüshe khürünü athabah, “Nü akin lah tüsho I a rhimobo lah.” Nü rhimobo mübede I ki nü akin huhang, tüsho I rhimobo hode inü nü ki I akin huhbah.

JAKOB 2:22

Api rhimobo lungnü akin müzhakde alakhi nüsanü ngülah, tüsho akin ju rhimobonü banthsangshih,

JAKOB 2:24

Mihtsürü khülang ju akinnü lang yungde, rhimobonü alim mütsankhi nüsanü ngülah.

JIHUSUA 2:1

Jihusuanü thirirhurü mahne Kanan tüsho adungto thsüde Jirikho lomi ramde rhua kheahshihpü Shittim chingnü thiyukhüm jihbah yüshih. Anenü yü tüsho ju tsüngre müzammürambe Rahab yam ching bin.

JIHUSUA 2:15

Jumonü alibenü ane ayinripit chingnü liu chingbah yükishih, tümüde alibe yam ju kiuto chipi kumung thsüa lakheah, junangde alibe chipi ching lakheah.

JIHUSUA 2:16

Tüsho alibenü ane ki tha, “ Awung lomi lim ju yüang, jude müthsüsho amüshamrünü nüke yanphuhbah; tüsho amüshamrü alode mütsoyi khiungde nüke ju ching nimung mahsam jikang; jushu nüke limro ching tsopü kuklah.”

JIHUSUA 2:4

Tüshe alibenü mihtsürü mahne jikabahshihbah tha, “Dükde, mihtsürü I kilim arükheah, tüshe küchingnü arükheanü inü mümükheah;

JIHUSUA 2:6

(Tüsho Rahabnü mihtsürü mahne ju ayi lüpkhi lim bede wutubah, anihbenü akhinashu thsüde azokhi khim keakbe sangbün khüp jikshih.)

JIHUSUA 6:17

Kiuto tüsho ju ching lakhi kukruk lüpdükhi Atungpuh ki kingaün jihpü thsüde shahde thsümünima bahang. Müzammürambe Rahab tüsho ayamkhün lang aningshihbah, tümüde anihbenü isa yo thirirhurü jikshih.