ISAIA 51:22 - AMÜSÜH HÜM CL Bible (BSI)

²² Wuto Atungpuhnü ha thachoh, nü Thrünpuh shepünü api mihtsürü dünkheak mushujihcho: Kheahang, nü khah chingnü amüshangbe pung inü ludo; nünü kheaküa I bukakhiukkhi lakuk chingnü mütründe muyung.

ISAIA 51:22 Iomraidhean Croise

MUNGSHIKHÜN 35:1

O Atungpuh , I azhihrü kheak azhihang; I bede keochihrü kheak keochihang.

MUNGSHIKHÜN 60:3

Nünü nü mihtsürü ki achak kukrukbo huh; nünü isa yukhu yunga yingyingshih.

MÜCHITMUDU 22:23

tümüde Atungpuhnü arü dünkheak atsangbah tüsho sherünü arü yankhia luchonü yankhia lubah.

ISAIA 29:9

Nüsa makhaang tüsho zhazhade kamang, nüsa mük yihdoang tüsho tukang! Müshangang, tüshe yukhunü yung; yingyingang, tüshe amüshangbenü yung!

ISAIA 3:12

I mihtsürübo–azürübo arü junorü ah, tüsho azoberünü arü kurungkheak yakzan shuhchoh. O I mihtsürübo, nüsa limberübonü nüsa bemüchihchoh, tüsho nüsa limro yingyingshihchoh.

ISAIA 3:13

Atungpuhnü api dünkheak atsangpü asürüchoh; apinü mihtsürü mahkhappü zhipchoh.

ISAIA 49:25

Tüshe Atungpuhnü ha thachoh: “ Wutonü aramkhi she alubah tüsho bukmüke shih she abekhitbah; tümüde nü kheak shochihrü kheak inü shochihbah, tüsho inü nü tsührübo khümkhitbah.

ISAIA 51:17

Nü asürang, nü asürang! zhipang, O Jirusalem, nü shepü Atungpuh khah kheaknü api bukakhiukkhi pung yungkhea,

ISAIA 62:8

Atungpuhnü api khah tsülim tüsho Wuto khahnü thiyuchihchimdo: Inü kheaküa nü hi nüsa riri jim thsüpü müjih, tüsho nü khisahkhi chingnü khiungkerünü yukhu muyung;

JEREMIA 25:15

Tümüde Atungpuh , Israel Thrünpuhnü I ki ha thachoh: I khah chingnü ha bukakhiuk yukhu pung luang, tüsho inü nü yüshihpung trükshihbo alalanü ha yungshang.

JEREMIA 50:34

Arü Rhokhitbuh sühmüh lah; Wuto Atungpuh ju api mung. Apinü tsükjide arü dünkheak müküpde azhipbah, junangde apinü aningkhi lomi kilim sühakhim jihbah, tüshe Babilon ching larü kilim sühakhim mülakhi jihbah.

JEREMIA 51:36

Jumonü Atungpuhnü ha thachoh: Inü nü tsunglobah tüsho nü thsungkheak royimbah. Inü anihbe kebo ngahshihbah tüsho kenü kungshihbah;

TÜZHOKHI 3:15

Apinü I akhühnü mishih tüsho akhühkenü müshangshih.

TÜZHOKHI 3:58

Nünü I dünkheak mushudo, O Atungpuh , nünü I rhangdung rhokhitdo.

EZEKIEL 39:29

tüsho inü Israel yamkhün kheak I me dungkihchoki, inü arü kheaknü I miro müjiklo, Atungpuh Thrünpuhnü thachoh.

JOEL 3:2

inü trükshih alala bemukhungbah tüsho arübo Jehoshaphat Jindükhün ching bede akibah, tüsho I mihtsürü Israel tüsho I yamrüplurüp dünkheaknü inü ju ching arü mahkhapbah, tümütüsho arünü arübo trükshih bolung hiumüzütshih. Arünü I lomi chamnakdo,

OBADIA 1:16

Tümüde nünü I yo amüsüh müzüng kheak yungkhi nangde, nü mühirü trükshih alalanü ayungbah; arünü ayungbah tüsho ayingyingbah, tüsho arünü küyimkishe müthsüa kheahkhi ruk labah.

MIKA 7:9

Tümütüsho inü api azhihde neak yihbeak, api I kilim tsangkhi tüsho I mahkhapkhi khiungde inü Atungpuh bukakhiukkhi arümpü lah. Apinü I ayin ching bekhitbah; inü api thiyuro-lungki ngübah.

ZEKARIA 12:2

Kheahang, inü Jirusalem ju mühi mihtsürü alala thsungkheaknü amüshangbe pung khülang kamshihpü lah; Jirusalem yanchoki Juda she ayanbah.

MATHI 20:22

Tüshe Jisunü arü ki tha, “Nüsanü tümü keokhichonü nüsanü mümükheah. Inü ayungpü lakhi pung nüsanü ayungkhukba shi?” Arünü api ki alo, “Isanü akukbah.”

1 SAMUEL 25:39

Küyimki Nabal shekhi Davidnü asokhea, apinü tha, “Nabalnü I kheak mükhemürangkhi dünkheak mahkhapkhi tüsho api yamlarü amütsü rhimo chingnü atukloshihbuh Atungpuh shiang; Nabalnü amütsü rhimokhi Atungpuhnü aku kheak yihkihlojihdo.” Judüki Davidnü aniube thsüpü Abigail kilim thiyusheak yüshih.