HOSEA 7:1 - AMÜSÜH HÜM CL Bible (BSI)

¹ Küyimki inü Israel thsüngupü lümbanü, Ephraimnü athsümünimkhi, tüsho Samarianü mihbukmuyuk rhimokhi akhiuka huhchoh; tümüde arünü mülimde rhimochoh, ahührünü chakashungde yüzahchoh, tüsho khukshikrünü wungdo ahühchoh.

HOSEA 7:1 Iomraidhean Croise

ISAIA 28:1

Ayokhe, Ephraim amüshangrü kükheangkhi kuthran, tüsho ha müretah akheahakham yiuhabahkhi sangbün, küpü amüdanglo dükhün ku kheak la, sherü yukhunü zhidoa la!

ISAIA 59:12

Tümüde isanü athsümünimkhibo nü miki hihde lah, tüsho isa neakbonü isa azhihde thiyumütsan jihchoh. Isanü athsümünimkhibo atsütsü isa kheak lah, tüsho isanü isa mülimkhibo mükheahlah:

ISAIA 59:13

thsümünimde, tüsho Atungpuh reanglode, tüsho isa Thrünpuh yankhi chingnü tsoabahde, junode tüsho azhihkhirhimo akeangyubo hankhi tüsho jurü mulong chingnü akhiukkhi lah.

ISAIA 59:14

Thiyuro rholode tsodo, tüsho thiyuro-lungki limshu ching zhiplah; tümüde thiyuro ju kiudunglimro ching lunga lah, tüsho alungkikhi mazahkhuk.

JEREMIA 51:9

Isanü Babilon thsüngupü mürangdo, tüshe anihbe müthsüngukhuk. Anihbe bahyukang, tüsho isa mihbüm abannü isa nihbuh lomi lim yüanü; tümüde anihbe mahkhapkhi yinmi khiungdo tüsho thüningbo khiungde shuhkihdo.

EZEKIEL 16:46

Nü chi azopü ju Samaria lakheah, shepü anihbe tsührübebo lung dukulim lakhea; tüsho nü chi akheambe, anihbe tsührübe lung düjinglim lakhi ju Sodom lakheah.

EZEKIEL 23:4

Azopü mung Ohola tüsho anihbe niurü mung Oholiba lakheah. Ane chido inü lu, tüsho anenü tsührübo le tsührübebo zübejih. Ane mung, Ohola ju Samaria, tüsho Oholiba ju Jirusalem.

EZEKIEL 24:13

Tütüshe küyimki inü nü makhamaleak münean chingnü müsühkhea, amünean chingnü nü müsühde mükam; nü kheak I reangkeamde bukmakhiukyi khiungde nü müsühde mükamlo.

HOSEA 10:5

Samaria ching larü ju Beth-aven moshi nunu dünkheaknü ajanchoh. Mihtsürübonü ha dünkheak tüzhobah, tüsho ha kheaknü müretah tsokhi dünkheak ju kingaünrü amükeamrübonü mitripbah.

HOSEA 11:12

Ephraimnü akeangyu thade tüsho Israelnü mülapmüjinü I mükamdolah; tüshe Juda a Thrünpuhnü mükheahdü lang lah, tüsho Amüsühbuh Khülang ki thiyuro lah.

HOSEA 11:8

Küde thsah inü nü dükhepü, Ephraim? Küde thsah inü nü bahyukpü O Israel? Küde thsah inü nü Adma nangde kamshihpü? Küde thsah inü nü Zeboiim kheak nangde arhimopü? I mulong alunglim müthrido; nü thsungkheaknü I muzho todaklah.

HOSEA 12:1

Ephraimnü apung yimtsühchoh, tüsho nimung amuyung aniakhiuklim pung müshamchoh; arünü akeangyu tüsho athsümünim alü kamshihchoh; arünü Asiria kheak binthrüm thsüchoh, tüsho Ijip lim müdangke hande yüchoh.

HOSEA 12:2

Atungpuhnü Juda azhihde mahkhapyu lah, tüsho api limrobo yande Jakob thsümüchibah, tüsho api rhimobo yande api kilim jihlobah.

HOSEA 4:17

Ephraimnü sangthsübo lung arihdo; api langzü zojang.

HOSEA 4:2

Thiyuchihchim, akeangyu, mihlaksah, ahühkhi tüsho müzammüram akhiukdo; thiyih bukkhinü thiyih bukkhi yankihlah.

HOSEA 5:1

Ha soang, O amükeamrübo! Aniang, O Israel yamkhün! Aniang, O kiulongthsüpuh yamkhün! Tümüde mahkhappü ju nü yo lah; tümüde nü ju Mizpa ching qimürip khülang lakheah, tüsho Tabor kheak jipkihkhi keang khülang lakheah,

HOSEA 6:4

Inü nü ki tümü thsüba, O Ephraim? Inü nü ki tümü thsüba, O Juda? Nü muzho a yapsu shumuliu nangde, yapsu ayinke nahde dükheakabahkhi nangde lah.

HOSEA 7:13

Arü are, tümüde arübo I kheaknü tsodo! Arü athsümünim kamshang, tümüde arünü I azhihdo! Inü arü khümkhitpü künkheah, tüshe arünü I azhihde akeangyu asukchoh.

HOSEA 8:5

Nü moshinunusangthsü bahang, O Samaria! Arü kheak I bukakhiukchoh. Külokhüh arü mütsangkhitde alaba?

HOSEA 8:9

Tümüde arünü mütüm donki alangzü tsahkhi nangde Asiria lim wutudo; Ephraimnü amuzhorü mulodo.

AMOS 3:10

Atungpuhnü ha thachoh, Sherünü thiyih bukde tüsho ahüh-a arü lapung ching zochonü, arünü alim rhimopü mümükheah.

AMOS 3:9

Ashdod tüsho Ijip chipibo ching zhiyukang, “ Nüsabo Samaria wungbo kheak mukhungang, tüsho ju ching tümü neamneamruru la, tüsho tümü ajunokhi lanü kheahang.”

AMOS 8:14

Sherünü Samaria, Dan tüsho Beersheba sangthsübo kingaünbanü arübo alungbah, tüsho küyimkishe masürülo.

MIKA 6:16

Nünü Omri yakzan thsükhibo tüsho Ahab yamkhün rhimobo zodo, tüsho nünü arü lalimlakobo yando. Jumonü inü nü ju athsümünim, tüsho nü kheak larübo ish thsüpü kamshihkheah; jumonü I mihtsürünü abahyukkhi nünü ahanbah.

MATHI 23:37

“O Jirusalem, Jirusalem, shepünü wukihrübo laksah tüsho anihbe kilim yüshihrü lungnü rusahkhea! Thunu dretonü ajipjipbo aghidükeang khüp bemukhungkhi nangde, küdükhüh ki lang inü nü tsührübo bemukhungpü künkhea, tüshe nünü mümulong!

LUKNÜ ATHRÜTKHI THIYUSHEAK-ATSÜ HUHTANYU 13:34

“O Jirusalem, Jirusalem, wukihrübo laksahbe tüsho anihbe kilim yüshihrübo rusahbe! Thunu dretonü ajipjipbo aghidükeang khüp bemukhungkhi nangde inü küdükhüh ki nü tsührübo bemukhungpü künkhea, tüshe nünü mümulongde alakheah!

LUKNÜ ATHRÜTKHI THIYUSHEAK-ATSÜ HUHTANYU 19:42

tüsho tha, “Khihni ha nü kilim tümünü mungtsü hande arübanü nünü mükheahkhülaa! Tüshe jurü nü mükbo kinü jika lah.