2 KIUTHSÜYUKHEAN 24:20 - AMÜSÜH HÜM CL Bible (BSI)

²⁰ Judüki amükeambuh Jehoiada tsührü Zekaria kheak Thrünpuh me arü; apinü mihtsürübo müngüh zhip tüsho arü ki tha, “Thrünpuhnü ha thachoh: Nüsa akuk müngüpü thsüde küde thsah nüsanü Atungpuh yukhümbo thsümünimcho le? Tümütüsho nüsanü Atungpuh bahyukdo, apinü she nüsa bahyukdo.”

2 KIUTHSÜYUKHEAN 24:20 Iomraidhean Croise

1 KIUTHSÜYUKHEAN 12:18

Judüki samrü yo akubeatobuh Amasai kheak me arü, tüsho apinü tha, “Isa nü yo, O David; tüsho nü lung lah, O Jesse tsührü! Mungtsü, nü kilim mungtsü, tüsho nü rungrü kilim mungtsü! Tümüde nü Thrünpuh ju nü rungbuh.” Judüki Davidnü arübo leangkhi, tüsho api bonungrü torübo kamshih.

1 KIUTHSÜYUKHEAN 28:9

“Tüsho nü, I tsührü Solomon, nü buh Thrünpuh mükheahang, tüsho lümkhi khülang tüsho akünkhi mulongnü api tankihang; tümüde Atungpuhnü sulüm aban yimchoh, lümkhi tüsho lümzülümdo aban mükheahchoh. Nünü api yimsho, api nünü angübah; tüshe nünü api bahyuksho, apinü lünnü nü bahyukbah.

2 KIUTHSÜYUKHEAN 12:5

Judüki Shishak dünkheaknü Jirusalem ching mukhungkhi Rehoboam tüsho Juda atorübo kilim wukihbuh Shemaia arü, tüsho arü ki tha, “Atungpuhnü ha thachoh: Nüsanü I bahyukdo, jumonü inü nüsa Shishak khah ching jihdo.”

2 KIUTHSÜYUKHEAN 20:14

Judüki Atungpuh me amukhungrü phulung chingnü Jahaziel, Zekaria tsührü, Benaia tsührü, Jeiel tsührü, Mattania tsührü, Asaph tsühsoniuso Levibuh kheak akih.

2 KIUTHSÜYUKHEAN 23:11

Jushu apinü kiulongthsüpuh tsührü bede akhiukbah api kheak kuthran thranjih, tüsho api kilim tangzüngkhi jih; arünü api kiulongthsüpuh de zhiyukjih, tüsho Jehoiada le api tsührübonü api mujude-mokhit tüsho arünü zhi, “ Kiulongthsüpuh kutsüpde laang!”

2 KIUTHSÜYUKHEAN 24:24

Siria bonungrü nükde arürü she, Atungpuhnü arü khah ching bonungrü hihde jih, tümütüsho Judanü Atungpuh arü jipürü Thrünpuh bahyuk. Hanangde Joash kheak mahkhap.

2 KIUTHSÜYUKHEAN 25:16

Tüshe api thade alachoki kiulongthsüpuhnü anihbuh ki tha, “Isanü nü kiulongthsü athsunganahrü thsüshihkhea de? Tukloang! Tümü thsüpü nü asheshihpü?” Jumonü wukihbuhnü tuklo, tüshe tha, “Thrünpuhnü nü thsümünimpü lümkihdo de inü mükheahlah, tümütüsho nünü ha rhimodo tüsho inü athsunganahkhi mani.”

2 KIUTHSÜYUKHEAN 29:8

Jumonü Atungpuh bukakhiukkhi Juda tüsho Jirusalem kheak akih, tüsho apinü arü atrebe tüsho athraneanbe kukruk khülang kamshih, nüsa mükbonü ngülah.

JEREMIA 2:19

Nü mihbukmuyuk hode nü thsümüchibah, tüsho nü sühmüzahkhinü nü abahkhi kambah. Nünü Atungpuh nü Thrünpuh bahyukpü ju amütsü tüsho akhüh de mükheahang tüsho kheahang; I trekhi nü kheak müla, Atungpuh Wuto Thrünpuhnü thachoh.

JEREMIA 26:2

Atungpuhnü ha thachoh: Atungpuh yam mahkhappung ching zhipang, tüsho Atungpuh yam ching kingaünpü arükhi Juda kiutobo alala ki asukang; inü nü ki thiyukhüm jihkhi yubo alala arü ki asukang; thiyubüm khülang she düwuhlo.

JEREMIA 4:18

“ Nü limrobo tüsho nü rhimobonü ha nü kheak handarüdo. Ha nü neak hode thsümütsü lah; ha küdükhüh akhüh! Hanü nü mulong khiungdo.”

JEREMIA 5:19

Tüsho küyimki nü mihtsürübonü athaba, “Tümüde Atungpuh isa Thrünpuhnü harü alala isa kheak rhimokhea?” nünü arü ki thabah, “ Nüsanü I bahyuk tüsho nüsa lomi ching khiungkerü thrünpuhbo tankih, jumonü nüsa lo ching yungde nüsanü khiungkerü tankihbah.”

JEREMIA 5:25

Nüsanü alakmihkhibonü harü rholode tsodo, tüsho nüsa neakbonü atsübo tukloshihdo.

AMOS 5:10

Arünü chipimurung ching thiyuro mülakhi azhihrü thraneanchoh, tüsho arünü thiyuro asukrü thraneanchoh.

WÜHKHE 14:41

Tüshe Mosanü tha, “Kheakü tümüde nüsanü Atungpuh yukhüm thsümünimcho? Ju akuk müngü.

MATHI 23:35

junangde thiyuro-lungkirü Abel thiyih kheaknü nüsanü arüngyam le kingaün sadam dükeak laksahkhi Berekia tsührü Zekaria thiyih khiungde, alomi ching thiyuro-lungkirü thiyih bukkhi alala nüsa kheak arübah.

LUKNÜ ATHRÜTKHI THIYUSHEAK-ATSÜ HUHTANYU 11:51

Abel thiyih kheaknü kingaün sadam le arüngakopung dükeak bukkhi Zekaria thiyih khiungde. Am inü nüsa ki thachoh, ha lün thsümüchibah.

YUZÜNGTHALO 31:17

Ju nimung ching arü azhihde I bukakhiukbah, inü arü bahyukbah tüsho I miro arü kinü arambah tüsho arübo dükheakbah. Tüsho amütsübo tüsho thsümütsü ahihdo arü kheak yükihbah, junangde arünü ju nimung thabah, ‘Isa Thrünpuh isa lung mülakhi hode harü amütsübo isa kheak arüchoh yung de?’

MAHKHAPRÜ 6:34

Tüshe Atungpuh me Gideon kheak arü; apinü hulipungpung müt, tüsho Abiezerrü api ki mukhungde arü.