1 KIUTHSÜYUKHEAN 28:9 - AMÜSÜH HÜM CL Bible (BSI)

⁹ “Tüsho nü, I tsührü Solomon, nü buh Thrünpuh mükheahang, tüsho lümkhi khülang tüsho akünkhi mulongnü api tankihang; tümüde Atungpuhnü sulüm aban yimchoh, lümkhi tüsho lümzülümdo aban mükheahchoh. Nünü api yimsho, api nünü angübah; tüshe nünü api bahyuksho, apinü lünnü nü bahyukbah.

1 KIUTHSÜYUKHEAN 28:9 Iomraidhean Croise

THRÜNTAN 28:13

Tüsho kheahang, ju kumung Atungpuh zhip tüsho tha: “I nü buh Abraham tüsho Isak Thrünpuh Atungpuh ah; nü yapkhi lo inü nü tüsho nü tsühsoniusobo kilim jihbah.

THRÜNTAN 6:5

Judüki alomi ching mihtsürü mihbukmuyuk tode alakhi Atungpuhnü ngü, tüsho api mulong ching lümkhi alala mutuklode amütsü lakheah.

THRÜNTAN 8:21

Atungpuhnü arhümthüneakhi münim tüsho api mulong chingnü tha: “Mihtsürü dünkheaknü, api azükinü mulong amütsü laa lalashe, kheaküa inü alo muthrumünean müthsü. Tüsho inü arhimokhi nangde rhangdung lakhi lorilokobo küyimkishe müdükheakshih.

1 KIULONG THSÜRÜ 3:6

Tüsho Solomonnü tha, “Nünü nü yamlarü I buh David ki amuzhodakkhi tode huhdo, tümütüsho apinü nü miki khiukdahde thiyuro ching mulong alungki chingnü nü kilim tsah; tüsho nünü api thsungkheak ha ato tüsho muzhodakkhi zojih, tüsho api kilim khihni api kiulongthsü-binkiu kheak binpü tsührü khülang jih.

1 KIULONG THSÜRÜ 8:39

judüki nü lapung yinmi chingnü sojang, neak bahjang, rhimoang, tüsho nünü mulong mükheahkhi alala ki arü thülünkhi ayannü rungang, tümüde mihtsürü mulong abande tümü lanü nünü lang mükheahlah,

1 KIULONG THSÜRÜ 8:43

judüki nü lapung yinmi chingnü sojang, tüsho khiungkerünü nü ki jikhi yande alala rhimoang, junangde nü mihtsürü Israelnü arhimokhi ruk, lomi mihtsürü alalanü nü mung mükheahbah tüsho nü trebah, tüsho junangde inü athsükhi ha yam ching nü mung jia lah de arünü amükheahbah.

1 KIULONG THSÜRÜ 8:61

Jumonü khihni nangde api yakzanbo tüsho api yukhümbo anide nüsabo Atungpuh isa Thrünpuh kilim shuhmülanga jihang.”

2 KIULONG THSÜRÜ 20:3

“O Atungpuh , inü nü ki zhoshechoh, inü thiyuronü nü miki mulong shuhmülanga jihde atsahkhi tüsho alungki rhimokhi kheakü lümkhitjang.” Hezekianü düsüknimde trip.

2 KIULONG THSÜRÜ 21:22

apinü anihbuh jipürü Thrünpuh, Atungpuh bahyuk, tüsho Atungpuh limro ching mütsah.

2 KIULONG THSÜRÜ 22:2

Apinü Atungpuh miki alungki rhimo, tüsho abuh David limro alala ching tsah; apinü tsülim yungsho huzulim manguh.

1 KIUTHSÜYUKHEAN 22:19

Kheakü nüsa lümkhi tüsho mulong Atungpuh nüsa Thrünpuh yimpü zoang. Junangde Atungpuh Thrünpuh arüngyam thsümusuang, tüsho Atungpuh tangzüng sangdan tüsho Thrünpuh yo amüsüh kukrukbo Atungpuh mung ching thsükhi yam ching hande yüzahbah.”

1 KIUTHSÜYUKHEAN 28:8

Kheakü jumonü Israel alala mikinü, Atungpuh yo amukhungrü, tüsho isa Thrünpuhnü sode, Atungpuh nüsa Thrünpuh yukhüm alala leangkhiang tüsho kümkangde yimang; junangde ha lo atsü nüsanü alubah, tüsho nüsa dunglim lünnü nüsa tsührübo yamrüplurüp thsungkheak zojihbah.

1 KIUTHSÜYUKHEAN 29:9

Judüki mihtsürübonü asühachih tümütüsho arünü künsahde jih, tümüde arü lümkhi khülangnü Atungpuh kilim akeangnü jih; kiulongthsüpuh David she khitode asüh.

2 KIUTHSÜYUKHEAN 12:5

Judüki Shishak dünkheaknü Jirusalem ching mukhungkhi Rehoboam tüsho Juda atorübo kilim wukihbuh Shemaia arü, tüsho arü ki tha, “Atungpuhnü ha thachoh: Nüsanü I bahyukdo, jumonü inü nüsa Shishak khah ching jihdo.”

2 KIUTHSÜYUKHEAN 15:2

Apinü Asa shorupü wukhiuk, tüsho api ki tha, “I ki aniang, Asa, tüsho Juda alala tüsho Benjamin: Atungpuh nüsa lung lah, nüsa api lung lah. Nüsanü api yimsho, nüsanü api ngübah, tüshe nüsanü api bahyuksho, apinü nüsa bahyukbah.

2 KIUTHSÜYUKHEAN 6:30

nünü nü lapung yinmi chingnü sojang, neak bahjang, tüsho nünü mükheahde alakhi mulong arü limro ayannü alala ki jihang, tümüde nünü lang mihtsürü mulong mükheahlah.

EZRA 8:22

Limro ching isa riribo aheangshihpü bonungrübo tüsho khoraberübo kiulongthsüpuh ki kheangpü inü achih; tümüde Thrünpuhnü api kheak kinrü aban müngühjihchoh, tüshe api kheaknü chamkhide atsorü a apinü masüh tüsho thsümüchichoh de inü kiulongthsüpuh ki thakheah.

MUNGSHIKHÜN 101:2

Inü khiukdahkhi limro ching lümlung lade yakli huhbah. O, nü küyimki I kilim arüba? Inü I mulong khiukdahkhinü I yam ching tsahbah.

MUNGSHIKHÜN 139:2

Nünü I binkhi tüsho asürükhi mükheahlah; nünü I lümkhi limshu chingnü mükheahlah.

MUNGSHIKHÜN 17:3

Nünü I mulong rükakheah; nünü azhing ching I rhuakheah; nünü I rükakheah tüsho tümü müngü; I münnü neak müyihbeak de inü thado.

MUNGSHIKHÜN 18:2

Atungpuh ju I lungto, I chipi tüsho I bekhitrü, I Thrünpuh, I sühmüh, shepü kheak I tsoyukcho, I tsung, tüsho I akhümkhit juh, I chipi.

MUNGSHIKHÜN 7:10

Thrünpuh ju I tsung ah; apinü mulong alungki larü khümkhitchoh.

MUNGSHIKHÜN 7:9

O mihbukmuyuk amütsü rhimo akheam thsüshang, tüshe thiyuro lashang; tümüde thiyuro-lungki Thrünpuhnü mulong tüsho lümkhi rükakheahchoh.

MUNGSHIKHÜN 89:26

Apinü I ki zhibah, ‘Nü I buh, I Thrünpuh, tüsho I akhümkhit lungto.’

MUNGSHIKHÜN 89:38

Tüshe nünü bahyukdo tüsho thraneando, nünü mujude-mokhitkhi kheak nü bukakhiukdo.

MUNGSHIKHÜN 9:10

Tüsho sherünü nü mung mükheahlanü arünü nü kheak kinbah, tümüde, O Atungpuh , nü yimrü nünü mübahyuk.

ABEKHIT 15:2

Atungpuh ju I sühmüh tüsho I khün, tüsho api I khümkhitbuh kamdo; ha I Thrünpuh, tüsho inü api shibah, I buh pürü Thrünpuh, inü api shuhkihbah.

ABEKHIT 3:16

Yüang tüsho Israel azothsürübo bemukhungbah thaang, Atungpuh nüsa jipürü Abraham, Isak tüsho Jakob Thrünpuh I ki akhiukbah tha, I nüsa kilim arükheah tüsho Ijiprübonü nüsa kheak rhimokhi alala ngüdo.

MÜCHITMUDU 17:3

Suna tüsho shotoyinchi ju monü thsahakheahchoh, tüshe Atungpuhnü mulong rükakheahchoh.

MÜCHITMUDU 3:6

nü limrobo alala ching api mütsankhitang tüsho apinü nü limro alungki huhbah.

MÜCHITMUDU 4:4

apinü I ki thsangyu tüsho tha: “Nü mulongnü I yubo zoang; I yukhümbo zoang tüsho laang.

ISAIA 1:28

Tüshe azhihrü tüsho aneakrübo rukhühnü adükheakbah, tüsho sherünü A TU N GPU H bahyukchonü muyuabahbah.

ISAIA 38:3

O Atungpuh , inü nü ki mushuchoh, künangde I mulong athrünkhinü thiyuro lade nü miki tsahkhea, tüsho nü miki atsü rhimokhi kheakü lümkhitang. Tüsho Hezekianü düsüknimde trip.

ISAIA 45:19

Inü amiting lomi ching ramde masuk, inü Jakob tsührü ki mütha, “Akeangkeang ching I yimang.” I Atungpuhnü thiyuro asukchoh, inü alungki thachoh.

JEREMIA 11:20

Tüshe nü, O Wuto Atungpuh , shepünü lungkide mahkhapcho, shepünü mulong tüsho lümkhi rükakicho, nünü arü kheak nü royimkhi inü kheahanü, tümüde I lümkhilümduh nü ki thakhita huhchoh.

JEREMIA 17:10

I Atungpuhnü alala kilim arü limrobo ayannü, arü rhimobo ayannü ajihpü rükakichoh tüsho mulong yimchoh.

JEREMIA 20:12

O Wuto Atungpuh , nünü thiyuro-lungkirü rükakia kheahchoh, nünü mulong tüsho lümkhi ngülah; nünü arü kheak royimkhi inü kheahanü, tümüde I lümkhilümduh inü nü ki jihdo.

JEREMIA 22:16

Apinü zhochihrü tüsho müthsümülarü dünkheak mahkhap; ju tsüde alakheah. Ha amütsan I mükheahpü yung de? Atungpuhnü thachoh.

JEREMIA 24:7

Inü arü kilim I Atungpuh de mükheahpü mulong jihbah; tüsho arübo I mihtsürü thsübah tüsho I arü Thrünpuh thsübah, tümüde arü mulong athrünkhinü arübo I kilim rholobah.

JEREMIA 29:13

Nüsanü küyimki I yimbanü, nüsanü I ngübah; nüsanü nüsa mulong athrünkhinü I yimsho,

JEREMIA 29:14

inü nüsa ki I ngüshihbah, Atungpuhnü thachoh, tüsho inü nüsa kuhi jihlobah tüsho inü nüsa müzütshihpung trükshihbo alala tüsho dangpungbo alala chingnü nüsa bemukhungbah, Atungpuhnü thachoh, tüsho inü nüsa ramtso ching yüshihpung ching nüsa belodarübah.

JEREMIA 31:34

Arünü kheaküa khülangnü khülang müthsangyuachih, yungsho müthaachih, “A TU N GPU H mükheahang,” tümüde arü aninikhühnü atobe khiungde alalanü I mükheahbah, Atungpuhnü thachoh; tümüde inü arü mülimkhi neak bahjihbah, tüsho arü neak mülümkhitlo.

JEREMIA 9:24

tüshe arünü I Atungpuh de anikhitkhi tüsho mükheahkhi ching kükheangshang; inü muzhodakde, thiyuro tüsho alomi ching thiyurolungkinü rhimochoh, tümüde hadürü ching inü asühlah, Atungpuhnü thachoh.

EZEKIEL 11:5

Judüki Atungpuh me I kheak arü, tüsho athashihpü apinü I ki tha: “Atungpuhnü athakhi ju ha: Nünü ha thachoh, O Israel yamkhün, tüshe nü lüm ching tümü lanü inü mükheahlah.

EZEKIEL 38:10

Atungpuh Thrünpuhnü ha thachoh: Ju nimung lümkhibo nü lüm ching arübah, tüsho nünü amütsü asah khülang thsübah.

HOSEA 4:1

Atungpuh yu soang, O Israel mihtsürü; tümüde Atungpuhnü lomi ching larü thürühpü lah. Lomi ching athülünkhi yungsho mihmuzho, tüsho Thrünpuh mükheahkhi müla.

HOSEA 4:6

I mihtsürübo mükheahmudu mülakhinü dükheaka lah; tümütüsho nünü mükheahmudu bahyuk, inü nü I ki amükeamrü thsüpü chingnü bahyukchoh. Tüsho nünü nü Thrünpuh yakzan mihkhinü, inü she nü tsührübo mihbah.

JOHAN 1:47

Jisunü Nathanael api kilim arüde ngü, tüsho api dünkheak tha, “Kheahang, amülim mülakhi thiyuro Israelrü!”

JOHAN 17:3

Tüsho ha lün rhangdung ah, junangde arünü nü ju lang thiyuro, Thrünpuh, tüsho nünü athiyikhi Jisu Khrista mükheahbah.

JOHAN 2:25

tüsho khürünü mihtsürü dünkheak thiyumütsan thsüpü yihnüpü müla, tümüde apinü mihtsürü kheak lakhi alala mükheah.

JOHAN 21:17

Apinü anihbuh ki mahsam kipü tha, “Jona tsührü Simon, nünü I muzhola shi?” Apinü anihbuh ki, “Nünü I muzhola shi?” de mahsam ki keomonü Peternü mulong mütsüde alakheah. Tüsho apinü tha, “Atungpuh, nünü alala mükheahlah; inü nü muzholah de nünü mükheahlah.” Jisunü api ki tha, “I yo namfimihnubo mütrüang.

JOHAN 4:24

Thrünpuh ju me ah, tüsho sherünü api kingaünchonü me tüsho thiyuro ching kingaünbeah.”

JOHAN 8:55

Tütüshe nüsanü api mümükheah, tüshe inü api mükheahlah. Tüsho inü, ‘Inü api mümükheah,’ de thasho nüsa nangde I ju akeangyu tharü thsübah; inü api mükheahlah tüsho api yu zochoh.

YUNIRÜBO RHIMO 1:24

Tüsho arünü tamkhüntamnü, “O Atungpuh, shepünü alala mulong mükheahla, hane bolung nünü shepü mokhitdünü huhang,

YUNIRÜBO RHIMO 17:23

Tümüde I tsahhochoki nüsanü kingaünkhi kukrukbo inü kheahyuk, tüsho kingaün sadam kheak hade thrütkih-a ngü, ‘Mümükheahkhi thrünpuh kilim.’ Jumonü nüsanü tümü kingaünchonü mümükheahkhi ah de inü nüsa ki zhiyukchoh.

YUNIRÜBO RHIMO 17:30

Mümükheahkhi kimbo Thrünpuhnü amümürang thsüdo, tüshe kheaküa lüpdükhi ching mihtsürü alala ki mulong müthripü thiyukhüm jihdo,

1 KORINT 15:34

Nü lümkhi alungki ching arang, tüsho neak düyihbeaklo. Tümüde khürü a Thrünpuh mükheahkhi müla. Inü ha nüsa achihbe thachoh.

2 KORINT 4:6

Tümüde Thrünpuh, shepünü “Amiting chingnü ayin tahshang,” de athakheanü, Khrista miro ki Thrünpuh müretah mükheahmudu ayin isa kilim jihpü isa mulongbo ching api ayin tah.

2 KORINT 8:12

Tümüde thsakhama lasho, amülakhi yande yungde, mihtsürü ju tümü lanü ju yande aleangkhikhukbe lah.

2 KORINT 9:7

Mihtsürü abannü mükünmuthsung yungsho arochihde yungde nihbuh mulongnü apungkhikhi jihang, tümüde asühde ajihrü Thrünpuhnü muzhochoh.

YUZÜNGTHALO 10:12

“Tüsho kheakü, O Israel, Atungpuh nü Thrünpuhnü nü kheaknü tümü kheangcho, tüshe Atungpuh nü Thrünpuh wüntreang, api limrobo ching tsahpü tüsho api muzhopü Atungpuh nü Thrünpuh nü mulong tüsho nü me athrünkhinü atankihpü,

YUZÜNGTHALO 31:21

Tüsho küyimki amütsübo tüsho thsümütsübo arü kheak arübanü, ha khünnü arü azhihde thiyumütsan thsübah; tümütüsho arü tsühsoniusobonü mümihabah, tümüde inü arü kilim jihpü thiyuchihchimkhi lo lim bede müyüyide arü lümkhi inü mükheahlah.”

YUZÜNGTHALO 4:35

Atungpuh ju Thrünpuh ah de ahuhpü thsüde ha nüsa ki rhimodo; api hode sheshe müla.

IBRI 12:28

Jumonü isanü müniukkhukpü lakhi kiulongthsü leangkhikhi thsungkheak asühanü, tüsho junangde isanü wüntre tüsho trede Thrünpuh kilim aleangkhikhukbe kingaünanü;

IBRI 4:13

Tüsho api miki thrüna lakhi tümü she rama müla, tüshe isanü api ki rhimopü thsüde alala api mükbo ki khimshuh-a tüsho aleangkheak lah.

1 PETER 5:2

Nüsanü akümpü lakhi Thrünpuh namfimihnu boto neakang, mükünde yung tüshe künsahde, thiyuro mülakhi alü thsüpü yung tüshe mulongsahde,

AMIKHEAKAKHIUKKHI 2:23

tüsho inü anihbe tsührübo shika sheshihbah. Tüsho borübo alalanü lümkhi tüsho mulong yimbuh ju I ah de amükheahbah, tüsho inü nüsa aban kilim rhimobonü athülünkhi jihbah.

1 SAMUEL 12:20

Tüsho Samuelnü mihtsürübo ki tha, “Dütre; nüsanü ha amütsü rhimobo alala rhimodo, tütüshe Atungpuh yankhi chingnü dürholo, tüshe nüsa mulong athrünkhinü Atungpuh tankihang;

1 SAMUEL 16:7

Tüshe Atungpuhnü Samuel ki tha, “ Api jak-ku yungsho trungdung dükheah, tümütüsho inü api bahyukdo, tümüde mihtsürünü akheahkhi nangde Atungpuhnü mükheah; mihtsürünü aleanglim kheahchoh, tüshe Atungpuhnü mulong kheahchoh.”