Pilipus 4:8 - Ya Baru nga Tulag

⁸ Ket idi ya modi nga ibagbagac dakayu nga kakabsat: Diya panpanunuten nu kuma nga pe̍yeng, ket itu ngas diya banbanag nga mange̍cde̍ ka napudnu nga kagi, nadayaw se̍ nalinteg nga ugali, nadalus nga pamaay, se̍ diya agpaay ka panagayat se̍ panagkagi ka nabaru. Ngarud, diya ug-ugali nga mange̍cde̍ ka kinatacneng se̍ diya annamungan ne̍ Apu Diyus, itu kuma ngarud diya ipatpateg nu.

Pilipus 4:8 Iomraidhean Croise

Matyu 22:16

Ket ya namaay dito Parisiyu, nangibon da ka pasurut da se̍ dito toley nito Ari He̍rude̍s ito edyan ne̍ Je̍sus. Ket kinunen dito naibon e̍ Je̍sus, “Mistru, emmu mi nga napudnu ka, se̍ mangisursuru ka nga sipupudnu iya paglinteggan ne̍ Apu Diyus. Se̍ emmu mi nga bekken nga ya kapanunutan niya toley ya ikasum, orey nagan na nga toley. Ta awan idumdumam nga saad toley.

Markus 6:20

Ta e̍ asawa na nga Ari He̍rude̍s, dinayaw na met to Juan itun, ta emmu ne̍ Ari He̍rude̍s nga nalinteg se̍ nadayaw to Juan iya imatang ne̍ Apu Diyus. Itu nga nislaanan met ne̍ Ari He̍rude̍s to Juan. Ket ito naggicgicna nge̍ Ari He̍rude̍s ito kasaba nito Juan, nasikuran nga unay. Ngem nagustuwan na met latta nga dinengdengngeg dito kagkagiyen nito Juan.

Lukas 16:15

Ket kinunen ne̍ Je̍sus igida, “Dakayu, ket agpammarang kayu met nga arig nga nalinteg iya imatang diya toley. Ngem emmu met ne̍ Apu Diyus ya tutu nga uwed iya lemlemmet nu. Ta ya ibilang diya toley nga napateg, ibilang met nga gennung ne̍ Apu Diyus nga nakar-aryec.

Lukas 2:25

Ket enna He̍rusale̍m itun, uwed isa nga lakay nga agnagan ka Simyun. Nalinteg yan nga toley, se̍ managtungpal iya pammati na, ket pinadpadaanan na nga sinanama ya pannakaliwliwa diya iIsrae̍l. Ket uwed pe̍ igina ya Ispiritu Santu.

Lukas 23:50

Ket uwed toley itun nga agnagan ka Huse̍. Isa nga kunse̍hal diya Hudyu nge̍ Huse̍, ket nanacman se̍ nalinteg.

Juan 7:18

Ta ya agkagi ka kabucbukudan na ngas nga turay, ket ya pakaidayawan niya beggi na mettas ya sapsapulen na. Ngem no ya pannakaidayaw niya nangibon igina ya panggep na ya isa nga toley, napudnu se̍ awan kinabusid niyan nga toley.

Aramid 10:22

Ket dito naibon, kinunen da, “E̍ Kapitan Kurne̍lyu ya nangibon dakami. Ket e̍ Kapitan Kurne̍lyu, isa nga nalinteg nga toley, se̍ managdayaw e̍ Apu Diyus. Ket orey pe̍ amin diya padam nga Hudyu, raemmen da pe̍. Ket nibon nakami idi, ta uwed kanu isa nga anghe̍l ne̍ Apu Diyus nga mangpaayab igina ikew, tasun denggen na kanu diya ibagam,” kunen da.

Aramid 22:12

“Ket uwed isa nga taga-antuni nga agnagan ka Ananyas. Napasnec nga agtungpal iya Linteg tida, dikad pe̍ rinaem amin dito kapadpada na nga Hudyu ka Damasku.

Aramid 6:3

Nabarbaru ngarud, kakabsat, no mangpili kayu ka pitu nga lalaki dakayu, ta igida kuma ya pagiwarasen tida ka kasapulanin. Ket masapul nga maraem da kadiya toley se̍ paiturayan da iya Ispiritu Santu se̍ iya kinasirib nga nabaru.

Ruma 13:13

Ket ya gangey tida ita, natacneng ngas kuma, nga maitutup iya gangey diya maipaay iya algew. Itu nga bay-an tida ngarud ya panaglucluku se̍ panage̍ng-e̍nglew. Awan kuma ngarud dactida ya pannakikamalala winno duduma pe̍ nga naalas nga wangwangel. Awan kuma ngarud pe̍ yin diya panagsusupyat winno panagiman.

Ruma 13:3

Agtungpal kayu kuma ngarud kadiya agtuturay, ta diya toley nga agariman ka nabaru, bekken met nga didi diya mansing kadiya agtuturay, no di lugud diya agariman ka dake̍c. Itu nga ya nabaru kuma ngas ya arimanen nu, tasun awan iyansing nu kadiya agtuturay. Ket itu pe̍ ya pakapadayawan nu igida.

Ruma 14:18

Ket no itu diyan ya patgen tida iya panagsirbi tida e̍ Kristu, maay-ayu nge̍ Apu Diyus dactidan, ket diya toley, annamungan dactida pe̍.

Ruma 2:29

Ta ya maibilang nga pudnu nga Hudyu iya imatang ne̍ Apu Diyus, itu ya uwed iya nakem na nga gennung ya pudnu nga kinaHudyu na. Ket ya tutu nga kaipapennan niya pannakakugit, ket maipanggep ngarud iya wanglen niya Ispiritu ne̍ Apu Diyus iya nakem niya toley, bekken nga ya panagtungpal niya toley iya naisurat nga linteg. Ket ya pannakaidayaw niya agten iyan nga toley, gayat met e̍ Apu Diyus, bekken nga gayat ka toley.

1 Kurintu 4:5

Ket iya agten iyan, madi kayu kuma nga mangpabasul ka toley yin iya orey nagan na, agingga nga madi pekkem madatngan ya kustu nga timpu na, nga itu ya umbe̍t manin niya Apu. Ta ya Apu, mangipawada nad kadiya nalimed nga winangwangel diya toley, se̍ mangilatac nad pe̍ kadiya pangpanggep diya toley nga di pekkem naemmuwan. Ket no iyan nga timpu, ipasingen nad ne̍ Apu Diyus ya tutu nga dayaw niya tunggal isa dactida, sigun iya panagtungpal tida.

2 Kurintu 13:7

Ket ikarkararag mi e̍ Apu Diyus nga madi kayu kuma makaariman ka dake̍c. Agten iyan ngarud ya ikarkararag mi, ngem bekken nga gapu ta gabay mi nga ipanecnec nga pudnu ya kinaapustul mi, no di lugud gapu ta gabay mi nga diya nabaru ngas kuma ya wangwanglen nu. Itu ya gabay mi, orey no ibilang dakami nga busid iya kinaapustul mi.

2 Kurintu 6:8

Ket gapu ta pudnu nga agsirsirbi kami e̍ Apu Diyus, patgen dakami diya duduma, ngem irurumen dakami met diya duduma. Paliwen dakami ngarud diya duduma, ket idaydayaw dakami met nga gennung diya duduma. Ibilang dakami diya duduma nga mangal-allilaw, ngem agpudnu kami met latta.

2 Kurintu 8:18

Ket ibon mi ngarud nge̍ Titu dakayu, se̍ paibulun mi pe̍ igina ya isa nga kabsat tida nga mabigbigbig iya amin nga bungguy diya mamati, gapu iya panangikasaba na iya Makaparagsac nga Damag.

2 Kurintu 8:21

Ta agtanang kami idi nga panggep mi, tasun nalinteg kuma iya imatang ne̍ Apu Diyus, se̍ orey pe̍ iya imatang diya toley.

Galasiya 5:22

Ket ya masingen kadiya toley nga paiturayan iya Ispiritu ne̍ Apu Diyus, bekken nga agten kadiyan. Ta ya patauden nga gennung niya Ispiritu, itu diya panagayat, panaganggem, se̍ ya panagtalna gapu iya panagtutunus. Agten pe̍ kadiya panaganus, panangaasi, panangtulung, se̍ ya panagpudnu,

E̍pe̍su 4:25

Dikad pe̍ ipac nu ngarud ya panagbusbusidin. Ket ya tunggal isa dakayu, pudnu kuma ngasin ya ibaga nu kadiya kapada nu, ta kamkameng nactida nga amin ya is-isa nga bungguy.

E̍pe̍su 5:9

Ta ya patauden niya ugali niya isa nga uwed iya wada, itu ya amin nga kinabaru, kinalinteg se̍ kinapudnu.

E̍pe̍su 6:14

Ngarud, madi kayu agduwaduwa ngin, no di lugud agtalged kayu kuma ngarud gapu iya panangipateg nu kadiya kinapudnu nga banbanag, nga itu ya maiyarig ka barikes nu. Ket ya panangipateg nu iya kinalinteg, itu ya arig nga pagkabal niya barukung nu.

Pilipus 3:1

Ket ibagac kuma ita diya kaodiyan nga maibagac dakayu nga kakabsat ku. Ket basta pakaanggemman nu kuma ya pannakitipun nu iya Apu. Bekken nac ngarud nga mauma kadidi nga ibagbagac manin dakayu, ket paglaingan nu da met pe̍. Agten da idi:

Kulusas 4:5

Ket no maipanggep iya panagbiyag nu iya imatang diya madi pekkem mamati, ket nasirib kayu kuma, nga usaren nu ngarud ka nabaru diya amin nga gundaway nu igida.

1 Te̍salunika 4:12

Agten iyan ya wanglen nu kuma ngarud, tasun raemmen nakayu diya di pekkem mamati, se̍ tasun bekken kayu nga siaadeng kadiya duduma iya kasapulan niya panagbiyag nu.

1 Timutyu 2:2

Ikararagan tida ngarud diya ari se̍ amin diya agtuturay, tasun mabalin tida kuma ya agbiyag nga natalna se̍ napaw-is, se̍ tasun makatungpal tida iya panamati tida se̍ ya natacneng nga panagbiyag.

1 Timutyu 3:11

Ket diya asawa da met pe̍, masapul nga naraem gapu iya kinatacneng da. Ta madi da kuma managsadap, no di agtimbeng da. Ket se̍ masapul da pe̍ nga mapagtalkan ka orey nagan na.

1 Timutyu 3:4

Masapul pe̍ nga isa nga nalaing nga mangituray iya kakobung na, tasun bekken nga nasukir diya anac na no di nanakem da.

1 Timutyu 4:12

Ket no uwed ya manguyaw ikew gapu iya kinaebbing mu, madi ka latta malyew, no di lugud ipasingem ya kustu nga pagtuladan diya mamati. Ipasingem ngarud yan gapu mettas iya nabaru nga panagkagi se̍ panagbiyag mu, ya panagayat mu, ya panamatim, se̍ diya nadalus nga pangpanggep mu.

1 Timutyu 5:10

Ket masapul pe̍ nga uwed maemmuwan diya toltoley nga wangwanglen da nga nabaru, agten iya panangpadackel kadiya anac da ka nabaru nga sursuru, se̍ ya managsangaili, se̍ ya managistimar kadiya pada da nga mamati, se̍ ya managkaasi kadiya kackaasi. Ngarud, diya balu nga ilista nu, yan nas agisnup kadiya amin nga nabaru nga kabaellan da nga wanglen.

1 Timutyu 5:2

Ket no diya bacbaket, ibilang mu da nga inam. Ket diya kapatadam nga babey, ibilang mu da nga kakabsat, nga siaannad ka ngarud tasun awan dake̍c nga panpanunut mu maipanggep igida.

Titu 1:8

Bekken kuma ngarud nga agten iyan. Ta ya panglakayen, masapul nga isa nga nalaing nga mangsangaili, se̍ mangipateg kadiya nabaru nga banbanag. Se̍ masapul pe̍ nga nanakem se̍ nalinteg ya panglakayen. Masapul pe̍ nga isa nga napasnec iya panamati na e̍ Apu Diyus, se̍ mangtimbeng iya beggi na.

Titu 2:14

Igina met ya nangipalubus nga naidatun ya biyag na para dactida, tasun subbuten nactida iya turay diya amin nga kita niya kinadake̍c, se̍ tasun pagbalinen nactida nga kuwa na nga toley nga awanan basul, se̍ napasnec iya panagwangel ka nabaru.

Titu 2:2

Isurum diya lallakay nga agtimbeng da se̍ agnacnacman da, se̍ naannad da pe̍ kuma. Isurum pe̍ igida nga awan kuma kurang niya panamati, panagayat, se̍ panaganus da.

Titu 2:7

Ket ya panagbiyag mu, Titu, ket itu kuma ya kustu nga pagtuladan da iya panagwangel ka nabaru maipanggep iya orey nagan na nga banbanag. Itu nga ipasingem kuma nga napudnu se̍ napasnec ka iya panangisurum.

Titu 3:14

Ket isurum kuma diya kabulun tida ennan nga makibiyang da kadiya nabaru nga wangwangel, tasun makatulung da kuma kadiya toley nga uwed kasapulan da, se̍ tasun uwed nabaru nga pagbanagan niya panagbiyag da.

He̍briyu 11:2

Ket gapu ta uwed panamati diya am-ama tida itun pekkem, inannamungan ne̍ Apu Diyus da.

He̍briyu 13:18

Ket ya ibagac dakayu, gabay ku nga ikarkararagan dakami kuma. Madi kayu kuma umikeb iya panangikararag nu dakami, ta maemmuwan nu kuma nga natalna ya nakem mi, gapu ta emmu mi nga maiparbeng amin nga winangel mi. Diya nalinteg ngas met ya pe̍yeng mi nga pangpanggeppen nga wanglen.

Santiyagu 1:27

Ngem no madi kayu makibiyang kadiya dake̍c nga ugali iya lubung ngi, se̍ no tulungan nu diya kackaasi nga ulila se̍ diya balu, ket e̍ Apu Diyus nga Ama tida, ibilang na nga napudnu se̍ awan mansa na ya panagdaydayaw nu.

Santiyagu 3:17

Ngem ya kinasirib nga agtaud e̍ Apu Diyus nga uwed ka langit, itu ya kinasirib nga pagtaudan diya agten kadidi: ya napudnu nga banbanag, nga itu ya kangrunaan, se̍ ya panagtutunus, panagtanang se̍ panagtuluc. Ket itu pe̍ ya pagtaudan niya panangaasi se̍ ya panagwangel ka nabaru, nga awan panangiduma winno panaginpupudnu na.

1 Pe̍dru 1:22

Ket itan, nadalusan kayu mettin gapu iya panagtungpal nu iya kinapudnu. Dikad pe̍ uwed din dakayu ya napudnu nga panagayat kadiya kakabsat nu ka pammati yin. Itu nga ipasnec nu kuma ngin ya napudnu nga panagiinnayat nu.

1 Pe̍dru 2:12

Pe̍yeng nu kuma nga ipasingen diya nabaru nga ug-ugali nu kadiya toley nga di mamati e̍ Apu Diyus. Tasun iyan, orey kunen da ita nga dake̍c kayu kanu nga toley, malasin da met nga nabaru nga tutu diya wangwanglen nu. Ket iya agten iyan, dayawen da nad met nge̍ Apu Diyusin, no madatngan ya timpu niya pananglinteg na.

1 Pe̍dru 4:8

Ket ya kangrunaan na, ituluy nu kuma nga pe̍yeng ya panagiinnayat nu nga sipapasnec. Ta ya panagayat, itu ya pakalingdan diya adu nga basbasul.

2 Pe̍dru 3:1

Idi nga surat, itu ya maikadduwa nga surat nga nisurat ku dakayu nga patpatgec. Ket agpada met ya panggep nidi nga surat ku se̍ ito nona. Ta padasec manin ya mangalayu dakayu iya napudnu nga nakem, gapu iya panangipalagip ku dakayu.

1 Juan 3:18

Patpatgec nga an-anac, ya panagayat tida, ket bekken kuma ngas nga kagi tida winno kasaba tida ya patingga na, no di lugud ipasingen tida ya panagayat tida gapu kadiya wangwanglen tida, tasun pudnu kuma ya panagayat tida.

1 Juan 3:3

Ket amin diya sinanama kadiyan gapu e̍ Kristu, masapul nga iparis da met ya panagbiyag da iya kinadalus na.

1 Juan 4:1

Patpatgec nga kakabsat, madi kayu kuma patiyen diya amin nga agkunen nga uwed kanu igida ya Ispiritu ne̍ Apu Diyus. Emmuwen nu kuma nga mona no pudnu nga gayat e̍ Apu Diyus ya panpanunut da, ta adu win diya mangaskasaba ka busid iya amin nga lubungin.