Pilipus 4:5 - Ya Baru nga Tulag

⁵ Maipasingen kuma ngarud kadiya toltoley ya kinanacman nu, nga laglagipen nu nga dandani yin ya umbe̍t manin niya Apu.

Pilipus 4:5 Iomraidhean Croise

Matyu 6:25

“Dikad pe̍ idi ngarud ya ibagac dakayu: Madi kayu kuma nga pakadanagan ya pagbiyag nu, nga agten no nagan ya kanen nu winno inumen nu, se̍ madi kayu kuma pe̍ pakadanagan ya beggi nu, nga agten no nagan ya pagkawwes nu. Ta bekken nga didi ya kapatgan, no di ngarud met napatpateg ya biyag ngem kadiya makan, se̍ napatpateg met ya beggi ngem kadiya lupluput.

Matyu 6:34

“Itu nga madi kayu agdanag maipanggep kadiya masapul nu iya sumarunu nga algew. Ta kada sumarunu nga algew, uwed manin tumaud nga pakadanagan nu. Awan kuma idga nu iya pakasikuran nu iya agdama nga algew!”

Lukas 21:34

“Ket dakayu, agannad kayu ngarud, tasun madi kuma agkapsut ya panpanunut nu gapu iya nalabes nga pagragsakan idi nga lubung, winno gapu iya panage̍ng-e̍nglew, winno gapu iya pakasikuran maipanggep iya panagbiyag nu. Ta no agten iyan, bekken kayu nad nga nakasagana, ket pakakigtutan nu nad met ya panagparang niyan nga timpu win.

1 Kurintu 16:22

Ket no uwed da madi mangipateg iya Apu, mailunud da ngas kuma. Sapay kuma ta umbe̍t ka ngarudin, Apu!

1 Kurintu 6:7

Ket orey ngas ya panagdidinnarum nu, itu mettin ya mangipasingen nga uwed nakaabakan nu iya panamati nun. Di nabarbaru no itured nu kuma ngas diya dake̍c nga maariman dakayu, se̍ no masuwitic kayu, ngem iya panangidarum nu iya kabsat nu?

1 Kurintu 8:13

Dikad pe̍ no ya pannangan ku ka karni nga naidatun kadiya didiyusen ya pakaigapuwan niya pakaisacdulan niya kabsat ku ka pammati, ket pulus nga madi yac ngarud mangan kadiyanin, tasun madic kuma arimanen ya pakaisacdulan niya isa nga kabsat ku.

1 Kurintu 9:25

Ket no diya makikonte̍s, timbengngen ngarud nga nalaing niya tunggal isa igida ya beggi na, tasun magun-ud da kuma ya balangat nga maigun-guna. Ket ya agten iyan nga gun-guna da, madi met agpaut ka mabayag, no di ngas mapukaw. Ngem ya magun-ud tida nga gennung, itu ya gun-guna nga madi mapukaw.

2 Kurintu 10:1

Ket uwed da met agkunen nga kapdog gac kanu no uwed dac iya imatang nu, ngem no awan nac dakayun, agbalin nac kanu nga nauyung manin. Ket iyaken mettas nga Pablu, iyaken ya mangibilin nga sipapasnec dakayu itan, ket sigun met iya kinaalumamay se̍ kinapakumbaba ne̍ Kristu yani nga panangibilin ku dakayu.

2 Te̍salunika 2:2

Madi kayu kuma nga nalaka nga mariribukan winno madanagan kadiya damdamag nga magicgicna nu nga nadatngan kanun ya Timpu niya Apu. Madi kayu ngarud patiyen diyan orey no itu ya ipaikagi kanu ne̍ Apu Diyus igida gapu kanu iya Ispiritu na, se̍ madi kayu pe̍ patiyen orey no uwed mangasaba iya agten iyan winno uwed kanu naisurat nga gayat dakami.

Titu 3:2

Madi da kuma agkagkagi ka dake̍c maipanggep iya orey nagan na nga toley, se̍ madi da pe̍ makisuway, no di da lugud makigayyem, se̍ manangaasi da kuma pe̍ kadiya amin nga toley.

He̍briyu 10:25

Uwed met dito duduma nga mamati nga liwayan da ya panaggigimung da. Ngem dactida, madi tida kuma ngarud nga liwayan, no di ad-adda kuma lugud nga agpipinnabileg tida, ta mailasin tida nga dumandani yin ya Timpu niya Apu.

He̍briyu 10:37

Ta agten ito naisurat iya Bibliya nga kunen na, “Iya di mabayag, umbe̍t ngarudin ya it-itonan nu, ket madi met agtactac.

1 Pe̍dru 1:11

Ginabay da ngarud nga emmuwen itun no nagan na se̍ no nungey nga mapasamac ya nipakaemmu niya Ispiritu ne̍ Kristu nga uwed igida, ito nipaipadtu na igida maipanggep iya pannakaparparigat ne̍ Kristu se̍ maipanggep iya pakaidayawan na kalpasan niya panagrigat na.

1 Pe̍dru 4:7

Dandani met aggibus ya aminin, dikad pe̍ nanakem se̍ natanang kayu kuma nga managkararag.

Paltiing 22:20

Ket ya nangipakaemmu iya kinapudnu maipanggep kadidi nga banbanag, kunen na, “Tutu met nga dagus sac nga umbe̍t iya di mabayagin!” kunen na met. Ket idi ya kunec: Agten iyan kuma ngarudin, ta umbe̍t ka kuma ngin, Apu Je̍sus!

Paltiing 22:7

“Dumngeg kayu!” kinunen ne̍ Apu Je̍sus. “Dagus sac ngarud nga umbe̍t iya di mabayagin! Itu nga pakaragsakan ngarud diya agtungpal kadiya paltiing nga nisurat mu iyan nga libru!” kunen na.