Pilipus 3:10 - Ya Baru nga Tulag

¹⁰ Ket ya ipatpateg ku ngarud ita, ket itu ya pannakaem-emmuc e̍ Kristu, se̍ ipatpateg ku pe̍ ya panaglak-am ku iya pannakabalin nga naipasingen ito panagungar na. Ket se̍ ipatpateg ku pe̍ ya panaglak-am ku ka panagrigrigat nga arig mettas kadito panagrigrigat ne̍ Kristu itun, tasun pumarparis sac kuma iginan ito pannakatey na.

Pilipus 3:10 Iomraidhean Croise

Matyu 20:23

Ket kinunen ne̍ Je̍sus igida, “Ngarud, mairaman kayu nad nga tutu iya rigat nga arig nga inumec. Ngem to inadeng nu nga makipagtugew kayu kuma iya madiwanan ku se̍ iya makatigid ku, ket bekken ku met nga karbengngan ya mangisaad iya agten iyan. Ta naipaay mettin diyan nga saad kadiya nangisaganaan ne̍ Amac,” kunen na.

Juan 10:18

Awan makapatey iyaken, ngem agdisnudu wac nga mangipalubus iya pannakapatey ku. Ta uwed iyaken ya turay nga mangiyawat iya biyag ku nga mapatey, se̍ uwed met pe̍ iyaken ya turay nga mangpasoli mettas iya biyag ku. Agten iyan ngarud to nibilin niya Amac nga wanglec,” kunen na.

Juan 17:3

Ket ya banag nidi nga biyag nga agnanayun, ket itu ya pannakaem-emmu da ikew nga is-isa se̍ pudnu nga Diyus, se̍ ya pannakaem-emmu da pe̍ e̍ Je̍su Kristu, nga itu ya nibon mu.

Ruma 8:17

Ket gapu ta anac nactidan, agtawid tida nad met pe̍ yin. Ngarud, agtawid tida nad e̍ Apu Diyus, nga makipagtawid tida e̍ Kristu. Ket agten iyan ngarud, ta no tutu nga makipagrigat tida e̍ Kristu, mairaman tida nad met pe̍ iya pannakapadayaw na.

Ruma 8:29

Ta itun pekkem, emmu ne̍ Apu Diyusin diya toley nga isaad na ita. Ket igida diya sigud nga panggep na nga pagbalinen nga pakasingnan mettas iya gangey ne̍ Je̍su Kristu nga Anac na, tasun e̍ Je̍su Kristu ya maibilang nga kainunaan se̍ katurayan nga kabsat diya amin nga pagbalinen ne̍ Apu Diyus nga anac na.

Ruma 8:36

Ta agten ngarud ito kunen na iya Bibliya nga, “Gapu iya panamati mi ikew, aggidgidam nga agpeggad kami ka pannakapatey. Ket naibilang kami ngasin nga arig nga karne̍ru nga naisagana ngin nga maparti,” kunen na.

2 Kurintu 1:10

Nisalakan nakami met ito nakan-ansing nga pakatayan mi kuma, ket emmu mi nga isalakan nakami nad pekkem kadiya duduma nga peggad. Ket ig-igina ngas ya pagnamnamaan mi nga mangisalakan nad manin dakami,

2 Kurintu 1:5

Ta orey no nawadwad diya pannakaparparigat mi gapu iya pannakairaman tida iya kasasaad ne̍ Kristu, nawadwad met pe̍ diya pannakaliwliwa mi gapu igina.

2 Kurintu 13:4

Ta orey naipasingen nga tutu ya kinakapsut niya kinatoley ne̍ Kristu ito nailansa nga napatey ito krus, ket ita, sibibiyag met manin. Itu ya pakasingnan iya pannakabalin ne̍ Apu Diyus igina. Ket no dakami, uwed pe̍ dakami ya agten mettas nga kinakapsut nga uwed e̍ Kristu itun, gapu iya pannakaitipun mi igina. Ngem no maipanggep iya panagsirbi mi nad dakayu, naturay kami met pe̍. Ta gapu iya pannakairaman mi iya nakabiyagan ne̍ Kristu gapu iya pannakabalin ne̍ Apu Diyus, situturay kami nad met no umbe̍t kami iyan.

Galasiya 2:20

Ngarud, naibilang ngac nga natey yin gapu ta nairaman nac ito pannakailansa ne̍ Kristu ito krus na. Ngem orey naibilang ngac nga nairaman ito pannakatey ne̍ Kristu, sibibiyag gac pekkem. Ngem bekken nga ya gangey niya kinatoley ku ya mangituray iyaken nin, no di lugud ya gangey ne̍ Kristu win, ta uwed met iyaken nge̍ Kristu win. Ket idi nga panagbiyag ku ita, ipaay ku was iya Anac ne̍ Apu Diyus, gapu ta igina met ya patpatiyec, nga igina ya nangipateg iyaken, se̍ ya nangipalubus iya pannakaidatun niya beggi na para iyaken.

Galasiya 6:17

Ket iya agten iyanin, manipud ita, awan kuma mangriribuc iyaken nin. Ta uwed met pe̍ pe̍gpe̍glat iya beggic nga itu ya pakasingnan iya panangparigat diya toley iyaken gapu iya panagsirsirbic e̍ Je̍sus.

E̍pe̍su 4:13

Ket agten iyan kuma ya maariman agingga nga agkaykaysa tidan iya panamati tida se̍ iya pannakaawat tida maipanggep iya Anac ne̍ Apu Diyus. Ta agbalin kuma nad nga naan-anay diya nakem tida maipanggep kadidi, nga agten mettas kuma iya nakem ne̍ Kristu nga awan pagkurangan na.

Pilipus 3:8

Ngarud ita, ibilang ku nga awan sirsirbi yin niya orey nagan na, ta napatpateg met ya pannakaem-emmuc e̍ Kristu Je̍sus nga Apuc kun ngem iya orey nagan na. Ket gapu idi nga pannakaemmuc igina, naipac iyaken nin amin dito pagtalged ku itun. Ket ibilang ku da ngasin nga arig nga basura, tasun maalac ku ya gun-gunac nga pannakibulun ku e̍ Kristu.

Kulusas 1:24

Ket no maipanggep iyaken, aganggem mac ngasin, orey maparparigat tac. Ta diya rigrigat ku wi, ket agbanag da met iya panagsirbic nga maipaay dakayu nga mamati. Ta diya rigrigat ku, bagic da ngas nga anusan, nga agten met kadito rigrigat nga nitured ne̍ Kristu itun. Ket masapul nga itured ku met pe̍ agingga ka matungpalin ya tarigagay na maipanggep iya beggi na, nga itu ya bungguy mamati.

Kulusas 2:13

Ket dakayu itun, naibilang kayu nga arig ngas nga isa nga natey iya imatang ne̍ Apu Diyus. Ta naisina kayu igina gapu ito panagbasbasul nu, se̍ gapu met pe̍ ta bekken nakayu nga toley nga nakugit itun. Ngem itan, orey dakayu mettas, pinagbiyag nakayun, nga ibilang nakayu itan nga kabulun ne̍ Kristu nga napaungar itun, ta pinakawan ne̍ Apu Diyus amin diya basbasul tidan.

Kulusas 3:1

Ket dakayu, naibilang kayun nga kabulun ne̍ Kristu ito pannakapagungar na. Itu nga diya ipatpateg nu kuma ngin, ket diyan nas banbanag nga agtaud ka langit. Itu mettas ya edyan ne̍ Kristu nga naipatugew win iya kadayawan nga saad, nga itu ya madiwanan ne̍ Apu Diyus.

1 Pe̍dru 1:3

Madaydayaw kuma ngarud nge̍ Apu Diyus, nga Diyus se̍ Ama niya Apu tida nga Je̍su Kristu! Ta gapu iya dackel nga asi na dactida, ne̍cdan nactida ka nabalbaliwanin nga pannakaiyanac. Itu ya nakabiyagan tida nga pagnamnamaan tidan, nga nae̍cde̍ dactida gapu iya panagungar ne̍ Je̍su Kristu.

2 Pe̍dru 1:13

Ta ya kunec, mayat no palpalagipan nakayu kadiyan, bayat niya uwed pekkem anges nidi nga beggic.

1 Juan 2:3

Ket masiguradu tida nga tutu nga em-emmu tida nge̍ Apu Diyus no tungpalen tida diya bilbilin na.

1 Juan 2:5

Ngem ya agtungtungpal nga gennung iya kagi ne̍ Apu Diyus, napaw-is nga tutu win ya pagbanagan niya panagayat ne̍ Apu Diyus igina. Ket agten idi ya pakaemmuwan tida nga kameng nactida nge̍ Apu Diyus:

Paltiing 1:18

Iyaken ya sibibiyag nga pe̍yeng. Natey yac itun, ngem ita, singem, sibibiyag gac kun ka agnanayun. Ket iyaken ya nakaitalkan diya arig nga tulbec niya pannakabalin niya patey se̍ ya pagtuukan diya natey enna Hade̍s.