Pilipus 2:2 - Ya Baru nga Tulag

² Dikad pe̍ gapu ta uwed diyan dakayu, ilallalu nu kuma ya anggem kun maipanggep dakayu. Ta agtutunus kayu kuma se̍ agiinnayat kayu, se̍ agpapada kayu kuma ka panggep se̍ panpanunut.

Pilipus 2:2 Iomraidhean Croise

Juan 3:29

“Kaspagarigan ya nubyu, ket igina met ya mangasawa iya nubya. Ket ya gayyem niya nubyu, igina met ya agsiput se̍ agdengdengngeg nga siraragsac iya maariman iya pakalun, ket agang-anggem nga unay no magicna na ya kagi niya nubyu. Ket iyaken, agten nac pe̍ iyan, ta agang-anggem mac nga unayin.

Aramid 1:14

Kankanayun nga naguurnung da tasun kaykaysaen da ya agkararag, agraman dito kakabsat ne̍ Je̍sus, se̍ diya babey nga pati e̍ Marya nga ina ne̍ Je̍sus.

Aramid 2:1

Ket ito nadatngan ya algew niya Padaya Pe̍nte̍koste̍s, uwed dito amin nga mamati nga naur-urnung iya isa nga lugar.

Aramid 2:46

Nagkaykaysa da, ket inalgew da nga sangkabungguy nga nawe̍ aggigimung iya Te̍mplu. Nagkaykaysa da kadiya tunggal babaley da, nga pe̍yeng da nga nagtitipun nga nangan. Ket naragsac se̍ natunus ya panagbubulun da.

Aramid 5:12

Ket to Purtiku ne̍ Sulumun ito emwag niya Te̍mplu, itu ya pe̍yeng nga naguurnungan dito mamati itun. Ket adu diya pagilasinan se̍ nakaskasdaaw nga naar-ariman gapu kadiya apustule̍s nga nagsedseddaawan diya toley.

Ruma 12:16

Agtutunus kayu kuma nga pe̍yeng ka panpanunut. Madi kayu kuma tumangsit, no di lugud makigayyem kayu kuma orey kadiya nanumu nga toley. Ket madi kayu kuma pe̍ ipasindayaw ya kinasirib nu.

1 Kurintu 1:10

Kakabsat, gapu iya turay niya Apu tida nga Je̍su Kristu, ipacpakaasic dakayu nga agkikinnaawatan kayu kuma. Ta madi kuma mabingabingay ya bungguy nu, no di lugud is-isa kayu kuma ngin ka panggep se̍ panpanunut.

2 Kurintu 13:11

Ket kakabsat, idi ya modi nga ibagbagac dakayu idi nga surat kun: Aganggem kayu ngas kuma. Ket palinteggen nu kuma ngarudin ya ugali nu, se̍ tungpalen nu kuma ngarud ya pamagbagac dakayu idi nga surat ku. Agkikinnaawatan kayu kuma, se̍ agtutunus kayu kuma pe̍. Ket no agten iyanin, uwed met dakayu nge̍ Apu Diyus, nga igina ya pagtaudan niya ayat se̍ talna.

2 Kurintu 2:3

Itu ya gapu nito panagsurat ku dakayu itun, ta gabay ku no mapalinteg kuma nga mona itun diya nangpaldaang iyaken. Agten iyan ngarud, ta di yac gabay ya umbe̍t tac mapaldaangan gapu dakayu ita, no di gabay ku lugud no paanggemmen dac kuma. Ket emmuc met nga ya makapaanggem iyaken, itu pe̍ ya paganggemman nu.

2 Kurintu 7:7

Ket bekken nas nga ya inumbe̍t na ennid to nangparagsac dakami, no di pe̍ ito nipadamag na nga maipanggep dakayu iyan Kurintu. Ta niliwliwa na dakami to anggem na gapu dakayu, nga itu pe̍ kanu ya pakaliwliwaan na. Nipadamag na pe̍ ya essut nu nga makasingen iyaken manin, ket nibaga na pe̍ ya panagbabawi nu nga silaladingit ito napasamac itun. Nipadamag na pe̍ nga napasnec kayu kanu nga mangisakit iyaken. Ket itu diyan diya makapaanggem nga unay iyaken.

Pilipus 1:4

Ket siaanggem mac pe̍ nga pe̍yeng kadiya amin nga panangikarkararag ku para dakayu nga amin.

Pilipus 2:16

Ta dakayu met diya mangipateg iya panursuru nga pakabiyagan toley. Ket no tutu nga agten iyan ya wangwanglen nu, uwed ngarud pakaragsakac nad iya Timpu ne̍ Kristu, gapu ta bekken nga masayang nad diya panagitured ku se̍ diya banbannug ku gapu dakayu ita.

Pilipus 2:20

Igina ya ibon ku, ta awan sabali nga kapadac nga agten igina nga napudnu ya panangisakit na iya paglaingan nu.

Pilipus 4:2

Ket dakayu, E̍yudiyas nge̍ Sintike̍, ibagbagac nga sipapasnec dakayu nga agtunus kayu kuma ngin, ta agkabsat kayu met gapu iya Apu.

Kulusas 2:5

Ta orey deyyu wac dakayu, silalagip pac latta nga kanayun dakayu. Ket naragsakac ngarud met, gapu ta naemmuwac nga is-isa kayu ka panpanunut, se̍ nabaked pe̍ ya panamati nu e̍ Kristu.

2 Te̍salunika 2:13

Kakabsat, mayat met no pe̍yeng nga agyaman kami e̍ Apu Diyus gapu dakayu nga patpatgen niya Apu. Ta itun pekkem sacbay nidi nga timpu, pinili nakayun nge̍ Apu Diyus nga maisalakan gapu iya panangpalinteg niya Ispiritu Santu dakayu iya imatang ne̍ Apu Diyus, se̍ gapu iya panamati nu iya kinapudnu.

2 Timutyu 1:4

Malagip ku ngarud to leddaang mu nga nagluwaam itun, ket masut tac kun nga makasingen manin ikew tasun makaanggem mac, nga mipac ya essut kun.

Pilimun 1:20

Ngarud, kabsat, paragsaken nac kay idi nga panangtungpal mu kuma gapu iya pannakaitipun mu e̍ Kristu. Ta ipateg mu kuma didi nga kunec ikew, tasun uwed kuma paglaingac kun gapu iya pannakaitipun mu iya Apu.

2 Juan 1:4

Naragsakan nac nga unay, ta naemmuwac nga uwed da anac mu nga sumursurut iya pudnu nga pammati, sigun ito nibilin niya Ama dactida.

3 Juan 1:4

Naragsakan nac ngarud gapu ikew, ta aganggem mac nga unay no madamag ku nga uwed da anac ku ka pammati nga sumursurut iya pudnu nga pammati. Itu ya kadackellan nga makapaanggem iyaken.