Pilipus 2:12 - Ya Baru nga Tulag

¹² Dikad pe̍ idi ya ibagac dakayu nga patpatgec: Ket itun, gangey nu ya pe̍yeng dac nga ipangpangag. Ket gabay ku no bekken kuma ngas nga iya kauwed ku ya agten iyan, no di lugud ad-adda kuma ya panangipangag nu iyaken ita nga kinaawan ku. Itu nga dakayu kuma mettasin ya makaemmu nga sidadayaw se̍ siaannad iya panangannung nu iya banag niya pannakaisalakan nu.

Pilipus 2:12 Iomraidhean Croise

Matyu 11:12

Ket nanipud ito nagparang nito Juan nga Mammautisar agingga ita mettas, sumilse̍let diya naagawa nga toley, tasun ipilit da ya pannakalak-am kuma niya beggi da iya panangituray niya Nailangitan.

Matyu 11:29

Paituray kayu kuma ngarud iya paglinteggac, nga maiyarig ka sangul nu, ket agpaisuru kayu iyaken. Ta iyaken, natuluc se̍ napakumbaba ngac met. Dikad pe̍ no umbe̍t kayu iyaken, ket mapatalna kayu ngarud.

Aramid 16:29

Ket to agbanbantay, pinasibtan na diya dilag, se̍ na inalistuwan ya nimuneg ito edyan de̍ Pablu nge̍ Silas, ket nagparintumeng ngarud iya sangu da nga agpilpilpig iya ansing na.

Aramid 9:6

Ngem itan, gumnukat kan nga mawe̍ ka umuneg iya ili yin. Ket antuni ya pakaemmuwam no nagan ya masapul mu nga wanglen,” kunen na.

Ruma 2:7

Agten idi ya pananggun-guna na kadiya toley: Uwed da toley nga siaanus nga agwangwangel ka nabaru, gapu ta ipateg da ya panangpadayaw se̍ panangparaem ne̍ Apu Diyus igida, se̍ ya awan patingga na nga biyag nga ipaay na. Ket didi nga toley met diya pangipaayan nad ne̍ Apu Diyus iya biyag nga agnanayun.

1 Kurintu 15:58

Dikad pe̍ patpatgec nga kakabsat, nabileg kuma nga pe̍yeng ya panamati nu, se̍ madi kayu kuma maawis ka sabali. Ket napasnec kuma nga pe̍yeng ya panagsirbi nu iya Apu, ta emmu nu nga uwed paglaingan niya panagbannug nu iya panagsirbi nu iya Apu.

1 Kurintu 2:3

Tutu nga ito uwed dac iyan nga edyan nu, nakapsut tac ngas, ket sidadayaw wac se̍ siaannad dac met pe̍ nga unay gapu iya gagarac.

1 Kurintu 4:14

Ket ya nisurat ku nga idi, bekken ngarud nga tasun iyal-alyew nakayu, no di lugud tasun bagbagaan nakayu, ta ibilang nakayu nga patpatgec nga anac.

2 Kurintu 7:15

Ket imir-irut ya ayat na dakayu no malaglagip na ya kinamanagtungpal nu nga amin, se̍ ito panangsangaili nu nga sidadayaw se̍ siaannad igina.

E̍pe̍su 6:5

Dakayu nga tagabu, managtungpal kayu kuma nga sidadayaw se̍ siaannad kadiya ipawangel diya amu nu dakayu. Sipapasnec kayu ngarud nga agtungpal kadiya amu nu idi nga lubung, nga arig nga e̍ Kristu mettas ya pagsirbiyan nu.

Pilipus 1:27

Ket kangrunaan, itunus nu kuma ya panagbiyag nu iya Makaparagsac nga Damag maipanggep e̍ Kristu. Agten iyan kayu kuma tasun orey no awan nac pekkem iya edyan nu, winno no makadateng ngac nad nga sumacwar dakayun, ket madamag ku kuma nga nabaked ya panagbubulun nu gapu iya is-isa nga panpanunut nu, nga is-isa ya panggep nu iya panagtungpal nu iya rebbeng nu iya pammati tida nga maigapu iya Makaparagsac nga Damag.

Pilipus 1:29

Agten iyan ngarud, ta no dakayu, naikaasi met dakayu yan nga gundaway nu nga maigapu e̍ Kristu. Ket idi nga gundaway nu, bekken nas nga ya panamati nu igina ya panggep na, no di lugud ya panangitured nu pe̍ ka rigat nga maigapu igina.

Pilipus 1:5

Ta laglagipec ya pannakibulun nu iyaken iya panangipakaemmuc iya Makaparagsac nga Damag, nanipud ito damu nga naikasaba dakayu agingga ita.

Pilipus 1:6

Ket siguradu wac nga ilayun ne̍ Apu Diyus ya nabaru nga nirugi nan kadiya nakem nu, agingga ka matungpal nad iya Timpu ne̍ Kristu Je̍sus.

Pilipus 2:19

Ket iya di mabayag, ibon ku kuma dakayu nge̍ Timutyu, no ipalubus ne̍ Apu Je̍sus. Ibon ku tasun maragsakan nac nad gapu kadiya maipadpadamag na iyaken nga maipanggep dakayu.

Pilipus 4:1

Dikad pe̍ dakayu nga patpatgec se̍ pakaessutac nga kakabsat se̍ pakaanggemmac se̍ pakaidayawac, ngarud, dakayu nga patpatgec, pabakedden nu kuma ngarudin ya panamati nu nga maikanatad kadiyan nga nibagac.

Pilipus 4:15

Ket dakayu nga iPilipus, emmu nu met nga ito damu nito panangikasabac dakayu iya Makaparagsac nga Damag, ito pimanaw wac ka Mase̍dunya, ket awan duduma nga bungguy nga nakitipun iyaken maipanggep iya mange̍cde̍ se̍ umawat, no di yas dacdakayu.

1 Te̍salunika 1:3

Ta iya imatang ne̍ Apu Diyus nga Diyus se̍ Ama tida, pe̍yeng nga laglagipen mi diya nabaru nga wangwanglen nu gapu iya panamati nu, se̍ ya kinagaget nu gapu iya panagayat nu se̍ ya kinabaked niya namnama nu iya Apu tida nga Je̍su Kristu.

2 Timutyu 2:10

Itu nga anusac ngas ya orey nagan na, para kadiya pinili ne̍ Apu Diyus nga toley na. Agten ngarud iyan ya wanglec, tasun maisalakan da pe̍ gapu e̍ Kristu Je̍sus nga mangiraman igida iya pannakapadayaw na nga madi agpatingga.

He̍briyu 12:1

Ket no dactida ita, arig nga nale̍cbut tidan kadito adu nga toley, ta uwed pekkem dactida ita diya pammanecnec da maipanggep ito panamati da. Itu nga ipac tida kuma ngarudin diya amin nga manggapus dactida iya panamati tida, se̍ ya pakabasulan tida nga mangsipar iya panamati tida. Ket se̍ an-anusan tida ngarud nga itultuluy ya panagtungpal tida iya rebbeng niya panamati tida, nga maiyarig iya panagtarus niya isa nga makilumba nga sisingen nan ya pagpatinggaan niya pannakilumba na.

He̍briyu 4:1

Ket para dactida ita met pe̍ yan nga naikari nga pagtalnaan nga nisagana ne̍ Apu Diyus. Itu nga agannad tida kuma ngarud, tasun awan dactida ya maibilang nga madi makalak-am iya pannakipaginana e̍ Apu Diyus iyan nga pagtalnaan tida.

He̍briyu 4:11

Dikad pe̍ ikagumaan tida ngarud ya makipaglak-am iyan nga pagtalnaan nga nisagana ne̍ Apu Diyus para dactida. Ikagumaan tida ngarud, tasun awan kuma madi makalak-am iya pagtalnaan na, gapu iya panangkuntra na e̍ Apu Diyus, nga agten mettas kadito sikukuntra nga toley itun pekkem nga madi nakalak-am iyan nga pagtalnaan.

He̍briyu 5:9

Ket ito nakasagana nge̍ Je̍susin para iya awan pagkurangan na nga saad na, igina ya nagbalin nga pakaisalakanan ka agnanayun diya amin nga agtungpal igina.

1 Pe̍dru 2:11

Dakayu nga patpatgec, maibilang kayu nga sangsangaili se̍ gan-gannaet ngas met idi nga lubung. Itu nga bilinen nakayu nga sipapasnec, nga bekken kuma nga diya dake̍c nga tarigagay diya beggi nu ya tungtungpalen nu, ta mangkuntra didi kadiya nabaru nga panggep nu.

2 Pe̍dru 3:18

Ngem sapay kuma ta bumilbileg pekkem ya panamati nu iya Apu tida se̍ Mangisalakan dactida nga Je̍su Kristu, gapu iya siaayat nga panangaasi na dakayu, se̍ gapu iya pannakaemmu nu maipanggep igina. Igina kuma ya madaydayaw, orey ita nga timpu, se̍ iya maadpangan pe̍ nga agnanayun!