Pilipus 1:6 - Ya Baru nga Tulag

⁶ Ket siguradu wac nga ilayun ne̍ Apu Diyus ya nabaru nga nirugi nan kadiya nakem nu, agingga ka matungpal nad iya Timpu ne̍ Kristu Je̍sus.

Pilipus 1:6 Iomraidhean Croise

Juan 6:29

Ket kinunen ne̍ Je̍sus, “Idi ya gabay ne̍ Apu Diyus nga wanglen nu: Patiyen nu kuma ngarud ya nibon na,” kunen na.

Aramid 11:18

Ket ito nagicna dito mamati nga Hudyu yan, awan met pangdellawan da e̍ Pe̍dru win, no di lugud nagdayaw da e̍ Apu Diyusin, nga kinunen da, “Agten iyan ngarudin, ta gabay ne̍ Apu Diyus ya mangipaay pe̍ ka pagbabawiyan diya bekken nga Hudyu, nga pakae̍cdan da ka biyag nga agnanayun,” kunen da.

Aramid 16:14

Ket iTiyatira to isa kadito babey nga naggigicna dakami. Lidya ya nagan na, nga isa nga aglaclaku ka nangina nga luput nga nadgang. Ket e̍ Lidya, emmu na ya agdaydayaw e̍ Apu Diyus, orey no bekken nga Hudyu. Ket ne̍cde̍ niya Apu igina ya pannakaawat na kadito kinagi ne̍ Pablu, tasun ipangag na.

1 Kurintu 1:8

Ket igina mettas ya mangpabaked iya panamati nu, tasun awan pakaukuman nu no madatnganin ya Timpu niya Apu tida nga Je̍su Kristu.

2 Kurintu 1:15

Ket ninamnamac nga tutu ya panaganggem nu maigapu dakami. Itu nga pinanggep ku itun nga mona nga sacwaran nakayu, tasun mame̍nduwa nakayu kuma nga paragsaken nga mabisita.

2 Kurintu 2:3

Itu ya gapu nito panagsurat ku dakayu itun, ta gabay ku no mapalinteg kuma nga mona itun diya nangpaldaang iyaken. Agten iyan ngarud, ta di yac gabay ya umbe̍t tac mapaldaangan gapu dakayu ita, no di gabay ku lugud no paanggemmen dac kuma. Ket emmuc met nga ya makapaanggem iyaken, itu pe̍ ya paganggemman nu.

2 Kurintu 7:16

Ket iyaken, aganggem mac nga unay, ta emmuc kun nga mapagtalkan kayu ka aminin.

2 Kurintu 9:4

Ta no umbe̍t tac nad iyan nga edyan nu, kaynun no uwed da nad kabulun ku nga iMase̍dunya. Ket no madateng da nga bekken kayu pekkem nga nakasagana iya itulung nu, ket mapaalyew kamin, ket nangruna dakayu. Ta no agten iyan, agbalin nga busidin ya panagnamnama mi dakayun.

Galasiya 5:10

Ngem sinanama ngac pekkem maipanggep dakayu. Ta gapu iya pannakaitipun tida iya Apu, namnamaec nga sumurut kayu ngarud iya kapanunutac maipanggep kadidi. Ket no ya mangriribuc dakayu, orey no nagan na nga toley, siguradu nga madusa nad mettas.

E̍pe̍su 4:12

Ket binangun ne̍ Kristu amin diyan nga saad, tasun isaganaan nactida nga amin nga toley ne̍ Apu Diyus iya panangtungpal tida kadiya ipawangel ne̍ Apu Diyus dactida. Itu didi diya ipawangel na dactida tasun mapabileg ya bungguy ne̍ Kristu nga maiyarig iya beggi na.

Pilipus 1:10

Ta diyan kuma ngas nabaru nga banbanag diya ipateg nu. Ket iya agten iyan, awan nad kabulun nu nga kinadake̍c se̍ awan pakapabasulan nu nad iya Timpu ne̍ Kristu.

Pilipus 1:29

Agten iyan ngarud, ta no dakayu, naikaasi met dakayu yan nga gundaway nu nga maigapu e̍ Kristu. Ket idi nga gundaway nu, bekken nas nga ya panamati nu igina ya panggep na, no di lugud ya panangitured nu pe̍ ka rigat nga maigapu igina.

Pilipus 2:12

Dikad pe̍ idi ya ibagac dakayu nga patpatgec: Ket itun, gangey nu ya pe̍yeng dac nga ipangpangag. Ket gabay ku no bekken kuma ngas nga iya kauwed ku ya agten iyan, no di lugud ad-adda kuma ya panangipangag nu iyaken ita nga kinaawan ku. Itu nga dakayu kuma mettasin ya makaemmu nga sidadayaw se̍ siaannad iya panangannung nu iya banag niya pannakaisalakan nu.

Pilipus 2:13

Agten iyan kuma ngarud, ta uwed tumulung dakayu, nga itu nge̍ Apu Diyus mettas, tasun maemmuwan nu ya tarigagay na, se̍ tasun mawangel nu diya makaay-ayu igina.

Pilipus 2:16

Ta dakayu met diya mangipateg iya panursuru nga pakabiyagan toley. Ket no tutu nga agten iyan ya wangwanglen nu, uwed ngarud pakaragsakac nad iya Timpu ne̍ Kristu, gapu ta bekken nga masayang nad diya panagitured ku se̍ diya banbannug ku gapu dakayu ita.

Kulusas 2:12

Ket itu ngarud ya kaipapennan niya panagbautisar nu, ta naibilang kayu nga kabulun ne̍ Kristu ito pannakaitamen na. Ket pakaiyarigan na pe̍ ya pannakaibulun nu ito pannakapaungar na, gapu mettas iya panamati nu ito inariman ne̍ Apu Diyus, ta igina met ya nangpaungar e̍ Kristu.

1 Te̍salunika 1:3

Ta iya imatang ne̍ Apu Diyus nga Diyus se̍ Ama tida, pe̍yeng nga laglagipen mi diya nabaru nga wangwanglen nu gapu iya panamati nu, se̍ ya kinagaget nu gapu iya panagayat nu se̍ ya kinabaked niya namnama nu iya Apu tida nga Je̍su Kristu.

2 Te̍salunika 1:11

Ket itu nga ikarkararagan dakayu ngarud nga pe̍yeng, tasun pagbalinen nakayu kuma nge̍ Apu Diyus nga maikari iya nisagana na nga saad nga ne̍cde̍ na dakayu. Ket ikararag mi pe̍ nga gapu iya pannakabalin na, tulungan nakayu kuma kadiya amin nga nabaru nga pamaay nu se̍ diya gabay nu nga wanglen maigapu iya panamati nu.

2 Te̍salunika 3:4

Ket gapu mettas iya Apu, siguradu kami nga tungtungpalen nu ita diya isursuru mi dakayu, se̍ orey nad mettas pe̍ iya timpu nga maadpangan.

Pilimun 1:21

Itu win ya isurat ku ikew, ta namnamaec nga tungpalem yani nga kunec. Ket namnamaec pe̍ nga wanglem ya nasursuruc pekkem ngem idi nga nipacpakaasic ikew.

He̍briyu 10:35

Dikad pe̍ madi kayu kuma pukawen yan nga kinatalged nu, ta nabaru nga unay ya pagbanagan na nga gun-guna.

He̍briyu 12:2

Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

1 Pe̍dru 5:10

Ket e̍ Apu Diyus mettas nga pagtaudan niya amin nga siaayat nga asi, se̍ ya nangpili dakayu nga mairaman iya agnanayun nga pannakaidayaw na gapu e̍ Kristu. Ket igina mettas ya mangan-anay nad dakayu, no malpas yan nga e̍teng nga panagrigat nu. Ket patalgedden nakayu se̍ pabilgen nakayu nad pe̍.

2 Pe̍dru 3:10

Ngem no madatnganin ya Timpu niya Apu, kellat met ya panagparang na, nga agten mettas iya umbe̍t niya isa nga mannanakew. Ket mapukaw nad mettin ya abac lawa, nga uwed nad magicna nga nabileg nga ungug, ket diya masingen nga naisaad iya abac lawa, macset da mettin nga mapukawin. Ket agten nad met pe̍ iyan ya lubung, se̍ amin nga uwed iya sap-ew niya ginet, ta macset da nad mettin.