Pilipus 1:10 - Ya Baru nga Tulag

¹⁰ Ta diyan kuma ngas nabaru nga banbanag diya ipateg nu. Ket iya agten iyan, awan nad kabulun nu nga kinadake̍c se̍ awan pakapabasulan nu nad iya Timpu ne̍ Kristu.

Pilipus 1:10 Iomraidhean Croise

Matyu 16:23

Ngem e̍ Je̍sus, limaw-ing ngarud, ket kinunen na met e̍ Pe̍dru, “Umadeyyu ka iyaken, Satanas! Ta pakasulisugan naka met! Bekken met nga ya panpanunut ne̍ Apu Diyus yan nga uwed ikew, no di lugud ya panpanunut ngas toley,” kunen na.

Matyu 26:33

Ket e̍ Pe̍dru, kinunen na ngarud e̍ Je̍sus, “Orey no pumanaw da nga amin gapu iya mapasamac ikew, pulus nga madi naka met nga panawan nga gennung!” kunen na.

Juan 1:47

Ket ito nasingen ne̍ Je̍sus nge̍ Natanye̍l nga sumungsungad iya edyan na, kinunen na maipanggep igina, “Singen nu yan. Isa met nga pudnu nga Israe̍lita, ta awan kinabusid igina,” kunen ne̍ Je̍sus.

Juan 3:20

Ta diya amin nga agwangwangel ka dake̍c, kagura da met ya wada. Ket madi da umadenni iya wada, ta madi da gabay nga maipasingen diya dake̍c nga wangwanglen da.

Aramid 24:16

Itu nga wanglec nga pe̍yeng ya kabaellac nga agwangel iya kustu, ta gabay ku no nadalus nga pe̍yeng ya nakem ku, nga awan basbasul ku e̍ Apu Diyus se̍ kadiya toltoley.

Ruma 12:2

Ket madi kayu paiturayan kadiya ugali diya bekken nga mamati idi nga lubung, no di lugud pabaruwen nu diya panpanunut nu. Agten iyan kuma ngarud, tasun maemmuwan nu ya tarigagay ne̍ Apu Diyus, nga itu diya banbanag nga napaw-is se̍ makaay-ayu igina, se̍ awan pagkurangan da.

Ruma 12:9

Ket no maipanggep iya panagayat nu kadiya kapada nu, pudnu kuma ngas, nga awan busid na. Ipalikud nu kuma ya dake̍c, ket ya nabaru, itu ngas ya ipatpateg nu.

Ruma 16:17

Ket kakabsat, ibilin ku nga sipapasnec dakayu nga annadan nu diya toley nga mangpirdi kuma iya panagtutunus nu se̍ mangiyaw-awan dakayu iya panamati nu. Itu diya sumupyat iya panursuru nga naisuru dakayu. Ket adeyyuwan nu ngarud diya agten iyan nga toley.

Ruma 2:18

Emmum ya tarigagay ne̍ Apu Diyus, se̍ emmum pe̍ diya kustu nga banbanag, nga itu ya kunem nga annamungam, ta nasursuruwan ka iya Linteg ne̍ Muyse̍s.

Ruma 7:16

Ket no arimanec latta ya dake̍c nga madic gabay nga wanglen, ipasingec mettin nga pudnu ya kunen na iya Linteg.

Ruma 7:22

Ta orey pagay-ayatac met diya paglinteggan ne̍ Apu Diyus iya lemlemmet ku,

Ruma 8:7

Ta diya toley nga manglagip iya tarigagay niya kinatoley da, guraen da met nge̍ Apu Diyus, ta di da paiturayan iya linteg na. Ket ya kinapudnu na, awan met kabaellan da nga mangtungpal iya paglinteggan na.

1 Kurintu 1:8

Ket igina mettas ya mangpabaked iya panamati nu, tasun awan pakaukuman nu no madatnganin ya Timpu niya Apu tida nga Je̍su Kristu.

1 Kurintu 10:32

Awan kuma wanglen nu nga pakabasulan nga arig nga pakaisacdulan diya Hudyu man winno diya bekken nga Hudyu, winno kadiya pada nu nga mamati.

1 Kurintu 8:13

Dikad pe̍ no ya pannangan ku ka karni nga naidatun kadiya didiyusen ya pakaigapuwan niya pakaisacdulan niya kabsat ku ka pammati, ket pulus nga madi yac ngarud mangan kadiyanin, tasun madic kuma arimanen ya pakaisacdulan niya isa nga kabsat ku.

2 Kurintu 1:12

Agtalged kami ngarud gapu kadiya panangikararag nu dakami. Ket natalna ngas ya nakem mi, ta emmu mi nga napaw-is ya ugali mi iya imatang diya toltoley, se̍ nangruna ya pannakibulun mi dakayu. Ta diyan nas gabay ne̍ Apu Diyus diya winangwangel mi, agten kadiya nalinteg se̍ napudnu. Ket ya panagtungpal mi kadiyan nga gabay ne̍ Apu Diyus, bekken nga sigun iya kinasirib niya kinatoley mi, no di lugud gapu mettas iya sirib nga ikaasi ne̍ Apu Diyus nga siaayat dakami.

2 Kurintu 2:17

No dakami, bekken kami met nga agten kadiya duduma nga mangipacpakaemmu maipanggep e̍ Apu Diyus nga panguwartaan da ngas ya panangasaba da. Ta dakami, gapu iya pannakaitipun mi e̍ Kristu, mangasaba kami sigun iya panangibon ne̍ Apu Diyus dakami. Napudnu ngas met ya panggep mi, ket e̍ Apu Diyus met ya mangsipsiput dakami.

2 Kurintu 6:3

Ket dakami, agannad kami ngarud, tasun awan kuma wanglen mi nga pakaiyaw-awanan diya toley maigapu iya pammati tida, tasun awan makagi nga dake̍c maipanggep iya panagsirbi mi nga mangipakaemmu maipanggep e̍ Kristu.

2 Kurintu 8:8

Ket orey no kunec yan, bekken nakayu met nga bilinen nga mapilpilit ya panagkaasi nu kadiya kapada nu. Ngem ibagac ngas tasun maidilig kuma ya kinapasnec nu iya kinapasnec diya duduma, tasun maemmuwan nga napudnu pe̍ ya panagayat nu.

Galasiya 5:11

Ket no maipanggep iyaken, kakabsat, busid das dito agkunen nga isursuruc pekkem kanu nga masapul tida pekkem mas ya panagpakugit. Busid da met nga tutu, ta no agten iyan kuma ya isursuruc pekkem, ape̍ ngarud nga mairurumen nac latta? Ta no ya paglinteggan Hudyu nga panagpakugit kuma ya isursuruc pekkem, ket awan kuma malucsew iyaken nin iya panangikasabac iya panamati maipanggep iya pannakatey ne̍ Je̍su Kristu ito krus.

E̍pe̍su 4:15

Ngarud, bekken tida kuma nga agten kadiyan, no di tida kuma lugud siaayat nga agkagi ngas ka pudnu nga pe̍yeng. Ket no agten iyan, bumilbileg tida ngarud agingga nga agbalin tida nga awan pagkurangan nan, nga agten mettas iya gangey ne̍ Kristu nga pangulu tida.

E̍pe̍su 5:10

Ket diya banbanag ngas nga makaay-ayu iya Apu kuma ya emmuwen nu.

E̍pe̍su 5:27

Agten iyan ya inariman ne̍ Kristu, tasun paisagana na ya bungguy mamati, tasun napaw-is iya imatang na nad no alac nan. Ta gabay na no awan kuma mansa winno dake̍c niya bungguy mamati, winno orey nagan na nga pagkurangan na, tasun yan nas nadalusan se̍ madi mapabasulin.

E̍pe̍su 6:24

Sapay kuma ta uwed ya siaayat nga asi ne̍ Apu Diyus kadiya amin nga agayat iya Apu tida nga Je̍su Kristu ka ayat nga awan panagpatingga na.

Pilipus 1:16

Ket igida diya mangikasaba maipanggep e̍ Kristu gapu ngas met iya ayat da, ta malasin da nga naisaad dac met idi tasun uwed pannakaipanecnec niya kinapudnu niya Makaparagsac nga Damag.

Pilipus 1:6

Ket siguradu wac nga ilayun ne̍ Apu Diyus ya nabaru nga nirugi nan kadiya nakem nu, agingga ka matungpal nad iya Timpu ne̍ Kristu Je̍sus.

Pilipus 2:16

Ta dakayu met diya mangipateg iya panursuru nga pakabiyagan toley. Ket no tutu nga agten iyan ya wangwanglen nu, uwed ngarud pakaragsakac nad iya Timpu ne̍ Kristu, gapu ta bekken nga masayang nad diya panagitured ku se̍ diya banbannug ku gapu dakayu ita.

1 Te̍salunika 3:13

Ket no agten iyan, pabilgen nad niya Apu diya panpanunut nu, tasun ig-igina ngas ya pangipaayan nu iya panagbiyag nu, nga awan nad pakapilawan nu iya imatang ne̍ Apu Diyus nga Diyus se̍ Ama tida, no umbe̍t nad manin ya Apu tida nga Je̍sus agraman kadiya amin nga toley na.

1 Te̍salunika 5:21

Ngem awan pe̍ lugud panursuru toley nga di nu nga paliiwen nga nalaing. Ket diya kustu nga banbanag, ipateg nu.

1 Te̍salunika 5:23

Sapay kuma ta palinteggen nakayu nge̍ Apu Diyus nga mange̍cde̍ ka talna na, tasun awan nga pulus maipabasul dakayu. Ket aywanan na kuma pe̍ diya nakem nu, diya biyag nu, se̍ diya beggi nu, tasun mailisi kuma didi iya amin nga pagbasulan. Agten iyan kuma agingga mettas iya umbe̍t niya Apu tida nga Je̍su Kristu.

1 Juan 4:1

Patpatgec nga kakabsat, madi kayu kuma patiyen diya amin nga agkunen nga uwed kanu igida ya Ispiritu ne̍ Apu Diyus. Emmuwen nu kuma nga mona no pudnu nga gayat e̍ Apu Diyus ya panpanunut da, ta adu win diya mangaskasaba ka busid iya amin nga lubungin.

Paltiing 2:2

Emmuc diya wangwangel mu, se̍ ya panagbannug se̍ panaganus mu. Emmuc pe̍ nga madi ka ipamoya diya toltoley nga dake̍c ya ugali da. Ket dito busid nga apustule̍s nga nagkunen nga apustule̍s da kanu, ket inemmum da, ket naemmuwam nga busid da met.