Paltiing 8:10 - Ya Baru nga Tulag

¹⁰ Ket pinauni nito maikatlu nga anghe̍l to tangguyub na, ket uwed met niterkagin nga gayat iya abac lawa nga isa nga dackel nga bituwen nga arig nga mapocpooran nga nagateng nga dilag. Ket dinumsag met iya pagkatlu diya wangwangag, se̍ kadiya ub-ubbug.

Paltiing 8:10 Iomraidhean Croise

Matyu 25:1

Nituluy ne̍ Je̍sus ya panagkagi na, nga kinunen na, “Ya panangituray niya Nailangitan kadiyan nad nga algew, maiyarig iya agten idi: Uwed sangapulu nga babbalasang nga nakipakalun. Ket nawe̍ da nga sumabet iya umbe̍t nga nubyu, nga nagkakalneb da ka nidal-ag nga dilag.

Lukas 10:18

Ket kinunen ne̍ Je̍sus igida, “Pudnu met yan, ta naimatangac met ya kellat nga pannakaidegsut ne̍ Satanas manipud ka langit, nga arig mettas nga panagsel-it.

Hudas 1:13

Ket nalaka nga malasin ya kinadake̍c niya ugali da, ta nakal-alyew diya wanglen da. Itu met ya arig nga nalaka nga pakasingnan ka rokac nga tumaud ka dackel nga palung iya baybay. Ket maiyarig da met pe̍ ka bituwen nga or-orey ya pananalan na. Ngarud, naisagana ngin para kaditun nga toley ya pakadusaan da, nga itu ya agnanayun nga gicbet ito nauneg nga lugar.

Paltiing 1:20

Ket no maipanggep kadito pitu nga bituwen nga nasingem iya diwanan nga imac, se̍ dito pitu nga balituc nga dilag, agten idi ya kaipapennan da: Diya pitu nga bituwen, igida diya kaiyarigan diya anghe̍le̍s nga agay-aywan kadito pitu nga bungguy diya mamati. Ket diya pitu nga balituc nga dilag, itu diya kaiyarigan dito pitu nga bungguy,” kunen na.

Paltiing 12:4

Ket to ipus na, inapras na met ya pagkatlu diya bitbituwen iya abac lawa, ket naidegsut da iya ginet tin. Ket to dragun, nagsisikadin ito sangu nito babey nga dandani aganac kin, ta gabay na nga kanen kuma ya ke̍bit nito babey, no maiyanac kin.

Paltiing 14:7

Ket kinunen nito anghe̍l ka nabileg, “Ipangag nu ngarud nge̍ Apu Diyusin, se̍ dayawen nu pe̍ yin! Ta nadatngan mettin ya timpu niya panangukum na. Itu nga agdayaw kayu ngarud e̍ Apu Diyusin, nga igina mettas ya namarsuwa iya abac lawa, ginet, baybay se̍ diya ubbug,” kunen na.

Paltiing 16:4

Ket nibuyat mettin nito maikatlu nga anghe̍l ya mayan nito malukung na kadiya wangwangag se̍ ub-ubbug, ket nagbalin pe̍ nga daga diya danum dan.

Paltiing 6:13

Ket diya bitbituwen, naiterterkag da iya ginet itun nga gayat iya abac lawa, nga arig met nga agterterkag diya naata pekkem nga bisic niya kayu nga igus no mabluut ka nabileg ya kayu win.

Paltiing 8:7

Pinauni ngarud nito mona nga anghe̍l to tangguyub na, ket arig nga naudanan ya lubungin ka lalagu se̍ apuy nga nalaukan met ka daga. Nacset mettin ya pagkatlu niya uwed iya sap-ew niya ginet, ket nacset ngarud ya pagkatlu diya amin nga kaykayu, se̍ diya amin nga rucruut.

Paltiing 9:1

Ket itun, pinauni ngarud nito maikalima nga anghe̍l to tangguyub nan, ket uwed nasingec nga arig nga bituwen manin nga niterkag iya lubungin. Ket to sinan-bituwen, nae̍cdan met ka tulbec niya ruwangan niya nakaun-uneg nga ebbut iya ginet.

Paltiing 9:15

Ket iya agten iyan, naukasan ngarudin dito eppat nga anghe̍le̍s, ta agingga itun, nag-agton da nga sisasagana iya pakaibonan da iyan mettas nga uras, algew, bulan se̍ dagun. Ta nadatngan itunin ya panangpukaw da iya pagkatlu diya amin nga toltoley iya lubung.

Paltiing 9:18

Ket dito apuy se̍ asuc se̍ burbura nga asupre̍ nga rinumwar kadito musung dito kabayu, pakaiyarigan da ya tellu nga mangpukaw ka toley. Ket gapu kadidi nga tellu nga mangpukaw, natey met ya pagkatlu niya bilang diya amin nga toley iya lubung.