Paltiing 3:10 - Ya Baru nga Tulag

¹⁰ Ket no maipanggep ikew, gapu ta nipangag mu to nibagbagac ikew nga aganus ka kuma, ket isalakan naka nad met iya timpu niya panagrigrigat nga umbe̍t nad iya amin nga lubung tasun masigir diya toltoley iya lubung.

Paltiing 3:10 Iomraidhean Croise

Matyu 24:14

“Ket idi nga Makaparagsac nga Damag maipanggep iya nadiyusan nga panangituray, maikasaba nad iya amin nga lubung, tasun uwed kuma pakaemmuwan diya toltoley kadiya amin nga pagiliyan. Ket kalpasan nad nidi, agpatingga yani nga timpu win.”

Matyu 26:41

Agsulap kayu ngarudin nga agkarkararag, tasun madi kayu kuma nga masulisug. Ta orey sipapasnec ya panpanunut niya toley, ket sikakapsut pekkem ya kabaellan niya beggi na,” kunen na.

Matyu 6:13

Se̍ di nakami kuma iturung ka pakasulisugan, no di lugud ilisi nakami iya Managdacdake̍c.’

Markus 14:9

Ket pudnu met nga orey awac iya lubung ya pakaikasabaan niya Makaparagsac nga Damag, maistorya met pe̍ yani nga winangel nidi nga babey, nga itu nad ya pakalaglagipan igina,” kunen na.

Lukas 2:1

Ket itun nga timpu, uwed bilin nito Ari Se̍sar Agustu nga mailista kanu diya amin nga toltoley.

Juan 17:6

“Nipakaemmu naka kadidi nga toley nga nitalec mu iyaken idi nga lubung. Kuwam da nga sigud, ket nitalec mu da iyaken. Ket igida, nagtungpal da iya kagim.

Ruma 1:8

Ket ya mona nga kunec, gapu e̍ Je̍su Kristu, agyaman nac iya Diyus ku nga Apu Diyus, gapu dakayu nga amin. Ta ya panamati nu igina, agdindinamag ngamin iya amin na lubung.

1 Kurintu 10:13

Ket tunggal sulisug nga dumateng dakayu, kadawyan da ngas nga pakasulisugan niya toley. Ket e̍ Apu Diyus, laglagipen nactida nga pe̍yeng, nga madi na ipalubus nga masulisug kayu ka madi nu mabalin nga atipaen. Ta no masulisug kayu, e̍cdan nakayu nge̍ Apu Diyus ka gundaway nu nga makalasat, tasun mabalin nu nga ibturan yan nga panulisug.

E̍pe̍su 6:13

Itu nga usaren nu ya amin nga arig nga pannakakabal nga e̍cde̍ ne̍ Apu Diyus, tasun no uwed dumateng nga dake̍c nga timpu dakayu, mangabac kayu ngarud, nga mangpagtalew kadiya dake̍c nga di mas-asingen. Ket kalpasan niyan nga naiyarig ka pannakilaban nu kadiya dake̍c, ituluy nu pekkem ya panagusar nu kadiyan nga kabal, tasun madi kayu ngarud maabac.

2 Timutyu 2:12

Ket no anusan tida ya panagrigat tida para igina, makipagturay tida nad met igina. Ket no kunen tida nga madi tida em-emmu, kunen na nad met pe̍ nga di nactida em-emmu.

Santiyagu 3:12

Ket maiyarig pe̍ iya kayu nga igus, kakabsat ku. Ta ya kayu nga igus, madi met mamisic ka bisic ulibu. Se̍ ya mula nga ubas pe̍, madi met mamisic ka bisic igus. Ket orey met ya danum nga nape̍t, di met makae̍cde̍ ka naimas.

1 Pe̍dru 4:12

Dakayu nga patpatgec, madi kayu kuma nga masdaaw kadiya pakapadasan nu nga agten ito pangngarig nga pannakapadas iya apuy, ta kadawyan nas met didi.

2 Pe̍dru 2:9

Ket gapu kadiyan nga napasamac itun, maipasingen dactida ya kabaellan niya Apu nga mangilisi kadiya agtungpal igina kadiya pakasulisugan da. Ket maipasingen pe̍ kadiyan ya kabaellan na nga mangipukuc kadiya agdacdake̍c nga toley iya pakadusaan da agingga iya timpu nga panangukum na nad igida.

Paltiing 1:9

Iyaken nga Juan nga kabsat nu ka pammati, ket gapu iya pannakaitipun tida e̍ Je̍sus, kabulun dac met iya panagsagaba gapu igina, se̍ iya pannakairaman kadiya iturayan na, se̍ iya panaganus nga sinanama gapu igina. Ket gapu iya panangikasabac iya kagi ne̍ Apu Diyus, se̍ gapu iya panangipakaemmu ne̍ Je̍sus, uwed dac itun iya puru nga maawagan ka Patmus.

Paltiing 11:10

Ket pakaragsakan nad mettin diya toltoley nga uwed iya lubung ya pannakatey dito duwa. Agraragsac nad ngarud diya toltoley, se̍ agsisinnagut da nad pe̍ gapu ta natey yin dito duwa nga mangipadamag. Ta gapu kadito duwa, adu ya pakarigatan diya toltoley nga uwed iya lubung iyan nga timpu.

Paltiing 13:10

Diya makadateng iya pannakaipanaw da gapu kadiya manggura igida, ket tutu met nga maipanaw da ngas met. Se̍ diya makadateng met iya pannakatey da gapu kadiya mangispada igida, ket tutu met nga matey da ngas ka ispada. Itu nga masapul nga bumileg diya toltoley ne̍ Apu Diyus iya panaganus se̍ panamati da.

Paltiing 13:14

Ket to maikadduwa nga animal, napalubusan nga agipasingen ka nakaskasdaaw iya imatang nito nona nga animal. Ket gapu kadidi nga nawangel nito maikadduwa nga animal, naallilaw na diya toltoley nga naged-edyan iya lubung. Ta binilin na da nga mangariman da ka bultu nga kalanglanga nito nona nga nakan-ansing nga animal, nga itu to natalingu ka ispada itun, ngem nabiyag latta.

Paltiing 13:8

Ket agdaydayaw met igina diya kaaduwan nga toley iya lubung, nga itu diya amin nga bekken nga naisurat ya nagan da iya libru niya Urbun Karne̍ru nga napatey. Ket idi nga libru, itu ya nakaisuratan diya nagnagan nga naisurat ito di pekkem naparsuwa ya lubung, nga igida diya nae̍cdan ka biyag nga agnanayun.

Paltiing 14:12

Itu ya gapu na nga masapul nga aganus nga pe̍yeng diya toley ne̍ Apu Diyus, nga itu diya agtungtungpal kadiya bilbilin na se̍ ya pammati da e̍ Je̍sus.

Paltiing 14:6

Ket itun, uwed nasingec nga sabali manin nga anghe̍l nga agkaykayab iya abac lawa. Igina ya mangipakaemmu ka makaparagsac nga damag maipanggep kadiya agnanayun nga banbanag. Naibon nga mangipakaemmu idi kadiya aged-edyan iya lubung, kadiya amin nga nasyun, kapututan, pagkakagi se̍ pagiliyan.

Paltiing 16:14

Sairu met nga tutu didi nga tellu nga sinan-tukac nga agpaay e̍ Satanas. Emmu da met ya agariman ka nakaskasdaaw. Igida diya mawe̍ kadiya edyan diya ar-ari iya amin nga lubung, tasun urnungen da nga paisagana dito ar-ari nga mawe̍ nad makigubat e̍ Apu Diyus no madatnganin ya agdindinamag nga timpu ne̍ Apu Diyus nga Mannakabalin ka amin.

Paltiing 17:2

Arig met nga nakikamalala igina diya ar-ari iya lubung, ket arig pe̍ nga ne̍nglew win diya toltoley iya lubung, gapu iya ingel niya pannakikamalala na,” kunen na.

Paltiing 17:8

Ket to animal nga nasingem, itu to nagturturay itun, ngem awan mettin ita. Agparang nad mettas manin, ta rumwar nad met ito nakaun-uneg nga ebbut iya ginet. Ngem agbanag lugud das nad ka pakatayan na. Ket nad no aggundaway manin to animal iya lubung, masdaaw ngarud diya bekken nga naisurat ya nagan da iya libru nga nakaisuratan dito nagnagan diya mae̍cdan ka agnanayun nga biyag, manipud ito di pekkem nga naparsuwa ya lubung. Masdaaw da nad ngarud no masingen da to nadgang nga animal nga agparang manin, ta igina met to nagturturay itun, ngem napukaw met itan, ket agparang nad met manin.

Paltiing 2:10

Ket madi ka latta madanagan iya orey nagan na nga pakaparigatan nga dumateng ikew. Tutu met nga sigiren naka ya diyablu iya di mabayag, ta paibalud na diya duduma dakayu. Agpaut nad ka unus sangapulu nga algew ya pakaparigatam. Ngem puminget ka lugud iya panamatim, orey pe̍ no agingga ka patey, ket balangatan nakayu ka biyag nga agnanayun.

Paltiing 3:8

Emmuc met diya wangwangel mu. Itu nga e̍cde̍c ya gundaway mu nga maiyarig iya silulukat nga gagayangan nga awan makaigiset. Emmuc met nga orey e̍teng ngas ya kabaellam, managtungpal ka latta iya kagic, se̍ madi nac met nilibac.

Paltiing 6:10

Ket kinagi met dito kararuwa nga kinunen da ka nabileg, “Apu nga Mannakabalin, ikew ya awan basul na, se̍ napudnu! Nungey yin aya ya panangukum mu kadiya toltoley iya lubung, tasun maibales kuma ngin to pannakatey mi?” kunen da.

Paltiing 8:13

Ket itun, pinumsekkac manin, ket nasingec ya isa nga bugkew nga agkaykayab iya abac lawa, ket nagicnac met to kinagi na ka nabileg, nga kinunen na, “Ay-aay! Kackaasi kayu nga unayin, dakayu nga uwed pekkem iya lubung bayat niya panagpauni diya tellu pekkem nga anghe̍le̍s kadiya tangguyub da, ta itu nad diya tellu pekkem nga panagrigat nu. Ket sisasagana da met nga mangpauni yin!” kunen na.