Paltiing 22:6 - Ya Baru nga Tulag

⁶ Ket kinunen manin nito anghe̍l iyaken, “Pudnu se̍ siguradu nga matungpal didi nga kagi. Ket ya Apu, nga Diyus nga mange̍cde̍ iya panpanunut diya mammadtu gapu iya Ispiritu na, igina mettas ya nangibon iya anghe̍l na ngi nin. Nibon nac ngarud tasun ipakaemmuc kadiya agsirsirbi igina diya masapul nga mapasamac iya di mabayag,” kunen na.

Paltiing 22:6 Iomraidhean Croise

Matyu 13:41

Ta ibon nad niya Anac nga Naipatoley diya anghe̍le̍s na, ket ipac da nad ngarud iya pagiturayan na diya amin nga pakabasulan toley se̍ amin diya managdacdake̍c,

Lukas 1:70

Itu to nipaipadtu ne̍ Apu Diyus itun pekkem kadito mammadtu nga pinili na,

Lukas 16:16

“Ya naisurat iya Bibliya, nga Linteg nito Muyse̍s se̍ diya kagkagi dito mammadtu itun, ket agpaay agingga ngas ito timpu nito Juan nga Mammautisar. Ngem manipud iyan nga timpu, ya Makaparagsac nga Damag maipanggep iya panangituray ne̍ Apu Diyus ya maikaskasaba ngin. Ket makisinsinne̍let ngarudin diya toltoley tasun mairaman da kuma iya panangituray ne̍ Apu Diyus.

Aramid 12:11

Ket ito maawatanin ne̍ Pe̍dru to napasamac igina, kinunen na, “Pudnu gayam nga nibon niya Apu ya anghe̍l na nga inumbe̍t nangisalakan iyaken iya turay ne̍ Ari He̍rude̍s, se̍ kadito amin nga ipagpagarup dito Hudyu nga maariman kuma iyaken,” kunen na.

Aramid 3:18

Ngem to napasamac e̍ Je̍sus itun, itu met ya panangipatungpal ne̍ Apu Diyus ito kinagi dito amin nga mammadtu itun. Ta nipaikagi met ne̍ Apu Diyus igida nga masapul nga agrigat ya Kristu nga ibon na.

Ruma 1:2

Ket idi nga Makaparagsac nga Damag, itun pekkem nga nikari ne̍ Apu Diyus yani, nga nipaisurat na iya nadiyusan nga Bibliya kadito mammadtu na itun.

1 Kurintu 14:32

Ket diya mangikasaba iya kagi ne̍ Apu Diyus, masapul nga emmu da ya mangtengngel iya tarigagay da nga mangasaba.

1 Kurintu 7:29

Ket kakabsat, agten idi ya kayat ku nga kagiyen: Bekken met nga mabayag ya gundaway tida idi nga timpu win. Itu nga manipud ita, diya uwed asawa na, kamuwen da kuma lugud ya panagbiyag da nga agten mettas iya panagsirsirbi diya awan asawa da.

2 Te̍salunika 1:7

Ngem dakayu nga maparparigat, pagnam-ayen nakayu nad met, agten pe̍ iya pamaay na dakami. Mapasamac nad didi no agparang nge̍ Apu Je̍sus nga gayat ka langit. Ibulun na nad diya anghe̍le̍s na nga mae̍cdan ka pannakabalin.

He̍briyu 12:9

Ket agten idi pe̍: Diya ama tida idi nga lubung, pinatigmaanan nactida pe̍ nga anac da, ket sidadayaw tida met nga nagtungpal igida. Dikad pe̍ no maipanggep iya Ama mettas diya kararuwa tida, ad-adda kuma ngarud pekkem nga paiturayan tida igina, tasun e̍cdan nactida ka biyag nga agnanayun.

2 Pe̍dru 1:21

Ta awan pulus kadiyan nga padtu ya nagtaud ngas iya nakem toley, no di lugud nagtaud e̍ Apu Diyus gapu iya panangidalan niya Ispiritu Santu kadiya toley nga nangagi.

2 Pe̍dru 3:2

Ta tantandaanan nu kuma dito kinagkagi dito mammadtu nga nagsirbi e̍ Apu Diyus itun se̍ to paglinteggan niya Apu tida nga Mangisalakan dactida, nga itu ya nibilin diya apustule̍s na dakayu.

Paltiing 1:1

Idi nga surat, ket nakailaunan dito nipaltiing ne̍ Je̍su Kristu. Ket nipakaemmu ne̍ Apu Diyus igina didi, tasun ipakaemmu na kadiya agsirsirbi igina diya mapasamac iya di mabayag. Ket e̍ Kristu, nibon na ya anghe̍l na nga mangipakaemmu kadidi iyaken nga Juan, nga isa nga agsirsirbi igina.

Paltiing 18:20

Aganggem kayu ngarudin, dakayu nga taga-langit! Ngarud, aganggem kayu pe̍ yin, dakayu nga toley ne̍ Apu Diyus, agraman dakayu nga apustule̍s se̍ mammadtu! Aganggem kayu ngarud gapu iya napasamac iyan nga siyudad. Ta ya panangukum ne̍ Apu Diyus ito siyudad, itu met ya panangibales nan ito panangparigat nito siyudad dakayu!

Paltiing 19:9

Ket kinunen manin nito anghe̍l iyaken, “Isurat mu pe̍ yani: Nagasat ngarud diya maawis nga makipangan iya pakalun niya Urbun Karne̍ru,” kunen na. Se̍ kinunen manin nito anghe̍l iyaken, “Didi met diya napudnu nga kagi ne̍ Apu Diyus,” kunen na.

Paltiing 21:5

Ket to nakatugew ito trunu, kinunen na, “Singem! Pabaruwec kun ya amin nga banbanag!” kunen na. Ket kinunen na pe̍, “Isurat mu ya nibagac, ta pudnu se̍ siguradu nga matungpal diyan nga kagi,” kunen na.

Paltiing 21:9

Ket uwed met imadenni iyaken itun nga isa kadito pitu nga anghe̍le̍s nga uwed igida dito pitu nga malukung nga napnu kadito pitu nga modi nga panagrigat itun. Ket to anghe̍l, kinunen na met iyaken, “Umbe̍t ka, ta ipasingec ikew ya Nubya nga asawaen niya Urbun Karne̍ru,” kunen na.

Paltiing 22:1

Ket itun, uwed manin nipasingen nito anghe̍l iyaken, nga wangag nga uwed danum na nga mange̍cde̍ ka agnanayun nga biyag. Ket nakalitlitaw to danum na, nga agten met iya kristal nga masarang. Ket to ayus na, timaud ito trunu nga pagtugawan ne̍ Apu Diyus se̍ ya Urbun Karne̍ru.

Paltiing 22:16

“Iyaken nge̍ Je̍sus. Ket iyaken ya nangibon iya anghe̍l ku ikew, tasun ipakaemmu na diya kinapudnu maipanggep kadidi nga banbanag para kadiya bungbungguy diya mamati. Iyaken ya nagtaud iya kapututan nito Ari Dabid, se̍ iyaken pe̍ ya maawagan ka bituwen nga aggundaway iya parbangun,” kunen ne̍ Apu Je̍sus.

Paltiing 22:7

“Dumngeg kayu!” kinunen ne̍ Apu Je̍sus. “Dagus sac ngarud nga umbe̍t iya di mabayagin! Itu nga pakaragsakan ngarud diya agtungpal kadiya paltiing nga nisurat mu iyan nga libru!” kunen na.

Paltiing 4:1

Kalpasan niyan, uwed manin sabali nga nasingec, ta uwed arig nga silulukat nga gagayangan ka langit. Ket nagicnac manin to timec nga nagicnac itun, nga arig nga uni tangguyub. Ket kinunen na, “Umbe̍t ka idi ngudu, ket ipasingec ikew ya masapul nga mapasamac iya maadpangan nga kalpasan didi,” kunen na.