Paltiing 21:8 - Ya Baru nga Tulag

⁸ Ngem dake̍c nad nga gennung ya pagbanagan diya mangiyalyew iyaken, se̍ diya madi mamati iyaken, se̍ diya narugit ya nakem da, se̍ diya pumapatey, se̍ diya makikamalala, se̍ diya makibiyang kadiya sacsairu winno iya panaggamut, se̍ diya agdaydayaw kadiya didiyusen, se̍ diya amin nga managbusid. Ta ya pagbanagan didi, ket maipisuc da nad ngarud ito dackel nga edyan niya gumilgilab nga apuy se̍ burbura nga asupre̍, nga itu ya maikadduwa nga pannakatey,” kunen na.

Paltiing 21:8 Iomraidhean Croise

Matyu 10:28

Ket bekken kuma nga diya mabalin nga mangpatey ngas iya beggi ya kansing nu, ta madi da mabalin ya mangpukaw iya kararuwa. Ngem ya kansing nu kuma nga gennung, ket e̍ Apu Diyus. Ta igina, uwed lugud ya turay nga mangpatey iya beggi se̍ mangpukaw pe̍ iya kararuwa ka impiye̍rnu.

Matyu 25:25

Nansing ngac ngamin, itu nga nawe̍ yac nikorob nga nisoroc to kuwartam. Ket uwed idi to kuwarta mun,’ kunen na.

Matyu 8:26

Ket kinunen ne̍ Je̍sus igida, “Ape̍ mansing kayu? Nakapsut met ya panamati nu!” kunen na. Ket bimangun nge̍ Je̍sus, se̍ na met binilin to belluut se̍ palung nga agtalna da. Ket natalna met nga tutu ya aminin.

Markus 9:44

[Itu pe̍ ya edyan diya eg-egges nga madi matey nga mangmangan kadiya uwed antuni. Ket itu met pe̍ ya edyan niya apuy nga madi matey].

Juan 8:44

Ta an-anac nakayu ngarud nge̍ ama nu, nga itu met ya diyablu. Ket ya tarigagay na, itu ya gabay nu nga tungpalen. Pumatpatey met nga sigud, manipud ito damu. Ket pulus nga di na kanunungan ya pudnu, ta awan pulus kinapudnu igina. Ket kadawyan na ya agbusbusid, ta sigud nga managbusid. Ket bekken nas nga iyan, ta igina met pe̍ ya pagtaudan diya amin nga kinabusid.

2 Te̍salunika 2:9

Ngem to Managsucsukir, no agparang nad idi nga lubung, uwed met igina ya turay ne̍ Satanas. Uwed nad ngarud igina diya adu nga kita nga kinabusid nga pannakabalin se̍ pagilasinan se̍ nakaskasdaaw.

1 Timutyu 4:2

Diyan nga panursuru, gayat da met iya pangallilaw diya agbusbusid nga toley. Ket diyan nga toley, arig nga nacset tin ya kananakem da, ta madi da met mailasin ya kinapudnu win.

Titu 1:16

Em-emmu da kanu nge̍ Apu Diyus, ngem masingen tida iya wangwanglen da nga baybay-an da met. Makapaaryec ngarud diyan, se̍ managsukir da met pe̍. Itu nga awan mawangel dan nga maibilang nga nabaru.

He̍briyu 12:24

Se̍ nadateng nu ngarud pe̍ yin ya edyan ne̍ Je̍sus, nga igina met ya mangibabaet dactida e̍ Apu Diyus sigun mettas iya paglinteggan niya baru nga tulag. Se̍ nakadateng kayu pe̍ yin iya nagbanagan nito daga na, nga itu ya pannakawarsi nga pakadalusan nun. Ket bekken ngarud nga agten nas ito naiyayus nga daga nito Abe̍l yan, no di lugud agsirbi iya namaymayat nga banag.

He̍briyu 13:4

Dayawen tida kuma nga amin ya panagasawa diya agasawa. Se̍ masapul nga sipupudnu ya tunggal isa iya asawa na. Ta ukumen ngarud ne̍ Apu Diyus diya makikamalala, se̍ diya makitipun ka bekken da nga asawa.

1 Juan 2:22

Ket no nagan ya agbusid nga kunec, ket itu ya mangagi nga bekken nga e̍ Je̍sus ya Kristu nga nibon ne̍ Apu Diyus. Itu met ya kunec nga kumuntra e̍ Kristu, ta ilibac na met ya Ama se̍ ya Anac.

1 Juan 3:15

Ta orey nagan na nga gumura iya kapada na, maibilang nga pumatey. Ket emmu tida nga diya pumatey, madi da met paiturayan iya turay niya agnanayun nga biyag.

1 Juan 5:10

Dikad pe̍ ya toley nga mamati iya Anac ne̍ Apu Diyus, uwed mettas iya lemlemmet na ya pammanecnec maipanggep kadidi nin. Ngem ya madi mamati iya nipanecnec ne̍ Apu Diyus, arig nga kunen na nga agbusid nge̍ Apu Diyus, ta madi na patiyen ya nipanecnec ne̍ Apu Diyus maipanggep iya Anac na.

Paltiing 14:10

ket itu met ya aglak-am iya panangukum ne̍ Apu Diyus igina, no ipaay nad ne̍ Apu Diyus ya unget na kadiya toltoley. Ket arig nga inumen da nad ya arig nga naingel nga unget ne̍ Apu Diyus, nga awan met lauc na nga pangpalasew. Ket ya agten iyan nga toley, matuctuuc nad met ka apuy se̍ burbura nga asupre̍, ket mapasamac nad met yan iya imatang diya anghe̍le̍s ne̍ Apu Diyus se̍ iya imatang niya Urbun Karne̍ru.

Paltiing 19:20

Ngem natiliw met to nakan-ansing nga animal, se̍ natiliw met pe̍ to busid nga mammadtu. Igina to nangar-ariman ka nakaskasdaaw itun gapu iya pammalubus nga nipaay nito nakan-ansing nga animal. Nipaay na ya pammalubus na, tasun allilawen na dito toley itun nga namarkaan ito marka nito nakan-ansing nga animal, nga igida pe̍ dito nagdaydayaw ito bultu na. Ket natiliw ngarud to nakan-ansing nga animal se̍ to busid nga mammadtu, ket naidegsut da mettin nga sibibiyag ito dackel nga pagapuyan nga gumatgateng gapu ka burbura nga asupre̍.

Paltiing 2:11

“Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, madi da nad madusa ka maikadduwa nga ipapatey.’”

Paltiing 2:2

Emmuc diya wangwangel mu, se̍ ya panagbannug se̍ panaganus mu. Emmuc pe̍ nga madi ka ipamoya diya toltoley nga dake̍c ya ugali da. Ket dito busid nga apustule̍s nga nagkunen nga apustule̍s da kanu, ket inemmum da, ket naemmuwam nga busid da met.

Paltiing 21:27

Ngem awan pulus makauneg nad antuni nga orey nagan na nga bekken nga naibilang nga nadalus iya imatang ne̍ Apu Diyus. Se̍ madi nad pe̍ makauneg antuni diya agwangwangel ka nakal-alyew, winno diya agbusbusid. Ta diya makitipun nad iyan nga siyudad, diyan nas naisurat ya nagan da ito libru niya Urbun Karne̍ru, nga itu ya nakaisuratan diya nagnagan diya mae̍cdan ka biyag nga agnanayun.

Paltiing 22:15

Ngem diya malaskig nga gennung ito siyudad, itu diya bekken nga nadalus nga maiyarig ngas ka asu, se̍ diya makibiyang kadiya sacsairu winno iya panaggamut, se̍ diya makikamalala, se̍ diya pumapatey, se̍ diya agdaydayaw kadiya didiyusen se̍ diya mangipalubus ka busid winno diya managbusid pe̍.

Paltiing 9:17

Ket agten idi to naipasingen iyaken maipanggep kadito kabayu se̍ dito nagsakey: Dito nagsakey, nalingdan met diya barukung da ka kabal nga nadgang, nga agten iya kulur niya apuy, se̍ nangisit nga agten iya kulur niya batu nga sapiru, se̍ nangila nga agten iya kulur niya burbura nga asupre̍. Ket diya ulu dito kabayu, arig met nga ulu niya liyun, ket agipugpugsu da ka apuy, asuc se̍ asupre̍.

Paltiing 9:21

Ket dito toley nga nakalasat, madi da met pe̍ binabawi to panagpatpatey da ka toley, winno to pananggamgamut da, winno to pannakikamkamalala da se̍ to panagtactakew da.