Paltiing 2:5 - Ya Baru nga Tulag

⁵ Dikad pe̍ bilinen naka ngarud nga laglagipem to kasasaad mu ito sacbay nidi nga pannakairradum. Agbabawi ka ngarudin. Ket dito nabaru nga winangwangel mu ito damu, itu manin ya wanglem kuma itan. Ta no madi ka agbabawi se̍ madi ka pasoliyen ditun nga nabaru, umbe̍t ku was nad ipac ya dilag mu iya nakaipayan na.

Paltiing 2:5 Iomraidhean Croise

Matyu 5:14

“Ket maiyarig kayu pe̍ manin ka dilag nga mangwada kadiya toltoley iya lubung. Ket emmu tida nga ya siyudad nga uwed iya tuctuc niya tageytey, madi ngarud mailinged.

Matyu 5:15

Ket agten met pe̍ iya dilag. Ta no sibtan niya isa nga toley, ket madi na met tacban ka salupan, no di lugud ipay na iya kustu nga pakaipayan na, tasun madilagan diya amin nga uwed iya uneg niya baley.

Markus 12:9

Ket kinunen manin ne̍ Je̍sus, “Ket ita, nagan ngarud ya wanglen nito akin-kuwa ito kaubasan? Mawe̍ na ngarud pukawen dito makisugsugpun, se̍ na italec ka sabali to kaubasanin.

Lukas 1:17

“Ket mon-ona nad nga maibon ya anac nu ngem iya Apu, ket maidalan nad iya pannakabalin niya Ispiritu ne̍ Apu Diyus, nga agten ito pannakabalin nga uwed ito mammadtu nga E̍lyas itun. Pagtutunusen nad niya anac nu diya am-ama se̍ diya an-anac. Palinteggen na nad diya nasukir ya panpanunut da, ka panunut nga nalinteg. Ket iya agten iyan, paisagana nad niya anac nu diya toltoley, tasun uwed da nga nakasagana iya umbe̍tan niya Apu,” kunen nito anghe̍l.

Lukas 20:16

Mawe̍ na da ngarud pukawen, se̍ na italec ka sabali to kaubasanin,” kunen na. Ket ito nagicna diya toltoley yan, kinunen da, “Ay, bekken kuma nga agten iyan, a!” kunen da.

Galasiya 5:4

Ket dakayu nga mangipagarup nga mapalinteg kayu iya imatang ne̍ Apu Diyus gapu iya panagtungpal nu iya Linteg, nisina nu mettin ya beggi nu iya pannakaitipun e̍ Kristu, ket pulus nga awan mamaay na dakayun ya siaayat nga panangaasi ne̍ Apu Diyus.

Pilipus 2:15

tasun awan kuma pakapilawan winno pakapabasulan nu. Ket no agten iyan, awan dake̍c nga masingen dakayu iya imatang diya nakillu se̍ naalas nga toltoley idi nga lubung. Ngarud, an-anac nakayu nge̍ Apu Diyus, nga maiyarig kayu ka nasilap nga bitbituwen nga mangwada igida nga uwed iya gicbet.

He̍briyu 10:32

Ngem ita, laglagipen nu kuma to kasasaad nu ito damu nu pekkem ya makaawat maipanggep iya pammati tida, nga arig nga nawadaan kayun. Ta itun, situtured nga inan-anusan nu to panagsagaba nu gapu iya nakaru nga panagrigat nu itun.

2 Pe̍dru 3:17

Dikad pe̍ dakayu nga patpatgec, gapu ta naemmuwan nu diyanin maipanggep kadito mangisursuru ka busid, agannad kayu ngarudin. Ta kaynun no masulisug kayu met pe̍ nga sumurut iya irradu diya toley nga madi agtungpal e̍ Apu Diyus. Ket no maiyaw-awan kayu kadiyan, maisina kayu ngarudin iya pagnamnamaan nun.

Hudas 1:24

Ket itan, laglagipen tida kuma nga pe̍yeng nge̍ Apu Diyus. Igina met ya uwed kabaellan na nga mangaywan dakayu tasun madi kayu maiturung ka pakabasulan. Se̍ igina pe̍ ya uwed kabaellan na nga mangidateng dakayu nad nga sidadalusin se̍ siraragsac kin iya sangu na, nga itu ya edyan nga pakasingnan iya kinadayaw na.

Paltiing 1:20

Ket no maipanggep kadito pitu nga bituwen nga nasingem iya diwanan nga imac, se̍ dito pitu nga balituc nga dilag, agten idi ya kaipapennan da: Diya pitu nga bituwen, igida diya kaiyarigan diya anghe̍le̍s nga agay-aywan kadito pitu nga bungguy diya mamati. Ket diya pitu nga balituc nga dilag, itu diya kaiyarigan dito pitu nga bungguy,” kunen na.

Paltiing 16:9

Nacset ngarud diya toltoley yin ka nakaru nga pudut. Ngem nagkagkagiyan latta diya toltoley nge̍ Apu Diyus ka dake̍c, orey igina met ya akin-turay kadiyan nga panagrigat da. Agten iyan ngarud, se̍ madi da latta binabawi to kinadake̍c da. Ket iya agten iyan, madi da nagdayaw e̍ Apu Diyus.

Paltiing 2:16

Itu nga masapul nga agbabawi ka lugudin kadiyan, ta no madi ka babawiyen, dagus sac mettas nga umbe̍t iya edyan mu iya di mabayag, ket igubat ku met kadituni ya ispada nga uwed iya musung ku.

Paltiing 2:19

Emmuc met diya wangwangel mu, agten iya panagayat mu, se̍ ya nabileg nga panamatim, se̍ ya panagtulung mu se̍ panaganus mu. Ket emmuc met nga ad-adu pekkem diya nabaru nga wangwanglem ita ngem ito damu.

Paltiing 2:2

Emmuc diya wangwangel mu, se̍ ya panagbannug se̍ panaganus mu. Emmuc pe̍ nga madi ka ipamoya diya toltoley nga dake̍c ya ugali da. Ket dito busid nga apustule̍s nga nagkunen nga apustule̍s da kanu, ket inemmum da, ket naemmuwam nga busid da met.

Paltiing 3:19

Ket maemmuwam kuma nga balakadac se̍ palinteggec met diya ay-ayatec. Dikad pe̍ agpasnec ka kuma ngarud, ket ibabawi mun diya basbasul mu.