Paltiing 13:16 - Ya Baru nga Tulag

¹⁶ Ket to maikadduwa nga animal, pinilit na diya toltoley, nga mamarkaan da iya diwanan nga ima da, winno iya muging da. Pinilit na ngarud diya amin nga toltoley, diya nanumu man winno diya mabigbig, se̍ orey diya nabacnang winno diya napanglaw, se̍ diya siwayawaya man winno diya tagabu.

Paltiing 13:16 Iomraidhean Croise

Aramid 26:22

“Ngem e̍ Apu Diyus, pe̍yeng nac nga tultulungan nga orey patingga ita. Itu nga uwed dac idi nin nga mangipacpakaemmu kadiyan, orey kadiya nanumu man, winno mabigbig nga toley. Ket ya ipacpakaemmuc, itu mettas dito nipadtu pe̍ nito Muyse̍s se̍ dito mammadtu itun.

1 Kurintu 12:13

Ta amin tida, Hudyu man winno bekken nga Hudyu, tagabu man winno bekken, ket agpapada tida nga nabautisaran nga nakikamkameng e̍ Kristu, gapu mettas iya is-isa nga Ispiritu Santu. Se̍ is-isa yani nga Ispiritu nga nae̍cde̍ dactida, nga arig nga is-isa ya naipainum dactida.

Galasiya 3:28

Dikad pe̍ gapu iya pannakaitipun nu e̍ Kristu Je̍sus, naibilang kayu nga agpapada ngin. Awan ngarud nagdudumaanin diya Hudyu se̍ bekken nga Hudyu iya imatang ne̍ Apu Diyus, ket awan pe̍ pagdumaanin niya tagabu winno bekken nga tagabu, se̍ awan pe̍ pagdumaan niya lalaki winno babey, ta is-isa kayu nga aminin.

Galasiya 6:17

Ket iya agten iyanin, manipud ita, awan kuma mangriribuc iyaken nin. Ta uwed met pe̍ pe̍gpe̍glat iya beggic nga itu ya pakasingnan iya panangparigat diya toley iyaken gapu iya panagsirsirbic e̍ Je̍sus.

E̍pe̍su 6:8

Ta laglagipen nu kuma nga gun-gunaan niya Apu ya orey nagan na nga toley nga agariman ka nabaru, orey tagabu man winno bekken nga tagabu ya mangariman.

Kulusas 3:11

Ket diya toley nga uwed igida yani nga kabarbaru nga gangey, awan pulus maibilang nga pagdudumaan niya kinatoley dan, orey bekken nga Hudyu man winno Hudyu, orey nakugit man winno diya madi agtungpal iyan nga ugali, agten pe̍ kadiya di pekkem makaemmu iya ugali Griye̍gu, se̍ diya taga-Sitya nga awan adal da. Ngarud, awan met pagdudumaan diya toley yin, orey tagabu man winno siwayawaya nga toley, ta e̍ Kristu met ya ibilang tida nga kangrunaanin, se̍ igina met ya katurayan ka amin.

2 Timutyu 3:8

Ket diya toley nga mangallilaw kadiya agten iyan nga babey, agten da met kade̍ Hane̍s nge̍ Hambre̍s nga nagsukir e̍ Muyse̍s itun. Ta didi nga mangallilaw nga kunec, pagsukiran da nad met pe̍ ya pudnu. Dake̍c ya uwed iya panpanunut da, ket bekken met nga pudnu ya panamati da.

Paltiing 11:18

Nakaunget diya bekken nga mamati, ngem nipasingem lattan ya unget mu igida. Ta nadatnganin ya timpu niya pannakaukum diya natey yin, se̍ ya timpu niya pananggun-gunam kadito nangasaba nga nagsirsirbi ikew itun, se̍ kadiya amin nga toley mu, nga itu diya amin nga pasurut niya kinaturay mu, orey diya mabigbig man, winno nanumu. Ngarud, timpu mettin niya pannakapirdi dito nangpirdi kadiya uwed iya lubung,” kunen da.

Paltiing 15:2

Ket uwed nasingec nga arig nga baybay nga sarming ya sap-ew na, ket uwed pe̍ apuy na. Ket nasingec pe̍ dito nagballaigi nga nangabac ito nakan-ansing nga animal se̍ ito bultu na, se̍ ito nume̍ru nga kaibatugan niya nagan na. Ket dito nagballaigi, agsisikad dan iya pingit nito baybay nga sarming, ket nakaikem da met ka pagtukar nga arpa, nga ne̍cde̍ ne̍ Apu Diyus igida.

Paltiing 19:18

Ta umbe̍t kayu mangan iya sebbit dito ar-ari se̍ dito kumande̍r dito suldadu se̍ dito mabigbig nga toley. Ket uwed pe̍ kanen nu nga sebbit dito kabayu se̍ dito nagsakey igida, se̍ ya sebbit diya duduma nga toltoley, tagabu se̍ siwayawaya, mabigbig se̍ nanumu,” kunen na.

Paltiing 19:20

Ngem natiliw met to nakan-ansing nga animal, se̍ natiliw met pe̍ to busid nga mammadtu. Igina to nangar-ariman ka nakaskasdaaw itun gapu iya pammalubus nga nipaay nito nakan-ansing nga animal. Nipaay na ya pammalubus na, tasun allilawen na dito toley itun nga namarkaan ito marka nito nakan-ansing nga animal, nga igida pe̍ dito nagdaydayaw ito bultu na. Ket natiliw ngarud to nakan-ansing nga animal se̍ to busid nga mammadtu, ket naidegsut da mettin nga sibibiyag ito dackel nga pagapuyan nga gumatgateng gapu ka burbura nga asupre̍.

Paltiing 19:5

Ket itun, uwed nagicnac nga isa nga timec nga gayat ito trunu, nga kinunen na, “Dayawen nu ngarud ya Diyus tida, dakayu nga amin nga agsirsirbi igina! Ngarud, dakayu nga amin nga mangipatpateg igina, mabigbig man, winno nanumu, dayawen nu ngarud ya Diyus tida!” kunen na.

Paltiing 20:12

Ket nasingec itun diya natey, nga mabigbig se̍ nanumu, nga agsisikad iya sangu nito trunu. Ket uwed met liblibru nga mabicbicrad antuni nin. Ket nabicrad pe̍ yin ya sabali nga libru itun, nga itu to libru nga nakaisuratan diya nagnagan diya mae̍cdan ka biyag nga agnanayun. Ket nakedngan met itunin ya kasasaad dito nat-atey, maikanatad kadiya winangwangel da nga naisurat kadito liblibru.

Paltiing 20:4

Ket uwed da pe̍ nasingec itun nga truntrunu. Ket nagtugtugew kadito truntrunu diya nae̍cdan ka turay nga mangukum. Ket nasingec met pe̍ diya kararuwa dito napatpatey nga naputul diya ulu da, gapu iya panangipakaemmu da iya pudnu maipanggep e̍ Je̍sus se̍ iya kagi ne̍ Apu Diyus. Didi diya madi pe̍ nagdaydayaw itun ito nakan-ansing nga animal se̍ ito bultu na, se̍ madi da pe̍ pinamarkaan diya muging da winno ima da ito marka nito nakan-ansing nga animal. Ket didi nga toley, napagungar da mettin, se̍ da nakipagturay e̍ Kristu ka unus sangaribu nga dagun.

Paltiing 6:15

Ket itun, nagsorsoroc mettin diya ar-ari nga agturturay nga uwed iya lubung, se̍ diya duduma pe̍ nga uwed saad da iya gubiye̍rnu, se̍ diya pangpangulu diya suldadu, se̍ diya babacnang se̍ diya duduma pe̍ nga mabigbig nga toley. Ngarud, diya amin nga toley, orey diya tagtagabu winno diya siwayawaya nga toley, ket nagsorsoroc da ngarud kadiya liyaliyang se̍ kadiya dadackel nga batu kadiya tagtageytey.

Paltiing 7:3

Ket kinunen na ngarud kadito eppat nga anghe̍le̍s, “Madi kayu pekkem pirdiyen ya ginet, winno ya baybay, winno diya kaykayu, agingga ka di kami mamarkaan diya muging diya agsirsirbi iya Diyus tida,” kunen na.