Paltiing 13:11 - Ya Baru nga Tulag

¹¹ Ket itun, uwed manin nasingec nga sabali nga animal nga nakan-ansing, ket rinumwar met iya ginet tin. Duwa ya sacgud na nga arig ngas nga sacgud niya isa nga urbun karne̍ru. Ngem ya panagkagi na, arig met nga agkagkagi nga dragun.

Paltiing 13:11 Iomraidhean Croise

Matyu 7:15

“Agannad kayu ngarud, ta uwed da met busid nga mangikaskasaba kanu ka kagi ne̍ Apu Diyus, nga makapagparang dakayu nga arig nga karne̍ru nga nanacman. Ngem ya kinapudnu na, agten da met iya atap nga asu nga nauyung.

Ruma 16:18

Ta diya agariman ka agten iyan, bekken nga e̍ Kristu nga Apu tida ya pagsirsirbiyan da, no di lugud diya ricricna ngas niya beggi da ya ipangpangruna da. Allilawen da ngarud ya panpanunut diya oosogen nga toley, gapu kadiya napaw-is nga kagi da nga makaawis.

2 Te̍salunika 2:4

Ket iyan nga Managsucsukir, kuntraen na nad pekkem diya amin nga ibilang diya toley nga diyus da se̍ diya orey nagan na nga duduma nga daydayawen diya toltoley, tasun ig-igina kuma ngas ya madaydayaw. Ket ipatugew na nad ya beggi na mettas iya Te̍mplu nga pakadayawan ne̍ Apu Diyus, ta kunen na nad nga agbalin kanu nga Diyusin!

Paltiing 11:7

Ket kalpasan nad niya panangipadamag dito duwa nga mangipakaemmu iya pudnu, uwed met nakan-ansing nga sinan-animal nga rumwarin ito nakaun-uneg nga ebbut iya ginet, tasun mawe̍ makidangadang igida. Ket abaken na da nad met nga patayen.

Paltiing 12:17

Ket nakaunget ngarudin to dragun ito babey. Itu nga nawe̍ na ginubat diya duduma pekkem nga an-anac nito babey, nga igida diya agtungtungpal kadiya bilbilin ne̍ Apu Diyus se̍ mangipatpateg iya pudnu nga nipakaemmu ne̍ Je̍sus.

Paltiing 13:1

Ket itun, uwed nasingec nga isa nga nakan-ansing nga animal nga lumlumpuwas iya baybay. Pitu met diya ulu na, ket uwed sangapulu nga sacgud na, nga nakurunaan ya tunggal sacgud. Ket iya tunggal ulu na, uwed naisurat nga nagan nga makainsultu e̍ Apu Diyus.

Paltiing 13:17

Ket madi makapaglaku winno makapagngina ya orey nagan na nga toley, no madi naimarka igina ya nagan nito nona nga nakan-ansing nga animal, winno ya nume̍ru nga kaibatugan niya nagan na.

Paltiing 13:4

Ket dinaydayaw diya amin nga toltoley to dragun, gapu ta igina ya nange̍cde̍ iya kinaturay na ito nakan-ansing nga animal. Se̍ dinaydayaw da pe̍ to nakan-ansing nga animal, nga kinunen da, “Awan kapada nidi nga animal! Awan makaabac igina!” kunen da.

Paltiing 16:13

Ket uwed nasingec itun nga tellu nga mangpadake̍c nga sairu nga arig da nga tukac. Ket rinumwar met didi kadito musung nito dragun, se̍ to nakan-ansing nga animal se̍ to busid nga mammadtu.

Paltiing 17:6

Ket nasingec nga ne̍nglew met to babey, ta ine̍nglew na ya beggi na ito daga dito napatey nga toltoley ne̍ Apu Diyus, nga itu dito napatey gapu iya panangipakaemmu da iya pudnu maipanggep e̍ Je̍sus. Ket napalaus ngarud ya seddaaw ku ito nasingec to babey.

Paltiing 17:8

Ket to animal nga nasingem, itu to nagturturay itun, ngem awan mettin ita. Agparang nad mettas manin, ta rumwar nad met ito nakaun-uneg nga ebbut iya ginet. Ngem agbanag lugud das nad ka pakatayan na. Ket nad no aggundaway manin to animal iya lubung, masdaaw ngarud diya bekken nga naisurat ya nagan da iya libru nga nakaisuratan dito nagnagan diya mae̍cdan ka agnanayun nga biyag, manipud ito di pekkem nga naparsuwa ya lubung. Masdaaw da nad ngarud no masingen da to nadgang nga animal nga agparang manin, ta igina met to nagturturay itun, ngem napukaw met itan, ket agparang nad met manin.