Matyu 6:2 - Ya Baru nga Tulag

² “Itu nga no mangikaasi ka kadiya makasapul, madi ka kuma ipacpakaemmu kadiya toltoley ya wangwanglem. Ta bekken kayu kuma ngarud nga agten kadito aginsisingpet nga toley nga agpatangguyub met kadiya gigimungan se̍ kadiya kalkalsada, tasun dayawen diya toley da. Pudnu met nga itu wasin ya gun-guna diya agten iyan nga toley.

Matyu 6:2 Iomraidhean Croise

Matyu 6:5

“Ket no agkararag ka, madi ka kuma pe̍ tultuladen diya aginsisingpet. Ta magustuwan da ya agkararag nga nakasikad kadiya gigimungan se̍ kadiya paguurnungan toley kadiya kalkalsada, tasun masingen diya toley da. Pudnu met nga itu wasin ya gun-guna dan.

Matyu 6:16

“Ket no uwed kari nu gapu iya pammati nu, nga mangiparit iya beggi nu nga mangan, singen nu tasun madi kuma mad-adlaw iya langa nu ya panaganus nu, nga agten iya gangey diya aginpapasnec. Ta pasabaliyen da ya langa diya rupa da, tasun masingen diya toley ya panaganus da nga madi mangan. Ket pudnu met nga itu wasin ya gun-guna dan.

Juan 5:41

“Ket iyaken, bekken nga ya panangpadayaw niya toley ya sapsapulec.

He̍briyu 13:16

Ket di nu kuma pe̍ liwayan ya panagariman ka nabaru, se̍ ya panagtitinnulung nga siaasi. Ta diya agten kadiyan, arig da nga datun nu nga makaay-ayu e̍ Apu Diyus.

Lukas 20:46

“Annadan nu ngarud diya manursuru iya Linteg. Magustuwan da ya agpaspasyar nga nakasutana, se̍ magustuwan da met ya makabkablaawan nga sidadayaw no uwed da iya tindaan. Paggugustu da met pe̍ ya agtugew kadiya kadayawan nga tugtugew iya gigimungan, se̍ ya kangrunaan nga pagtugawan kadiya padaya.

Juan 7:18

Ta ya agkagi ka kabucbukudan na ngas nga turay, ket ya pakaidayawan niya beggi na mettas ya sapsapulen na. Ngem no ya pannakaidayaw niya nangibon igina ya panggep na ya isa nga toley, napudnu se̍ awan kinabusid niyan nga toley.

1 Pe̍dru 4:11

Kaspagarigan no ya pannakabalin nga mangaskasaba kuma ya naitalec ikew, mangasaba ka ngarud, ngem silalagip ka kuma nga ya kagi ne̍ Apu Diyus met ya ikaskasaba mun. Ket no ya pannakabalin nga tumulung ya naitalec ikew, ket tumulung ka ngarud, ngem sitatalec ka iya kabaellan nga e̍cde̍ ne̍ Apu Diyus. Agten iyan kuma ya wanglen nu, tasun e̍ Apu Diyus ya maidaydayaw iya amin nga wangwanglen nu, gapu e̍ Je̍su Kristu, ta igina met ya maikari nga madayaw se̍ agturay ka agnanayun. Agten iyan kuma.

E̍pe̍su 4:28

Ket no uwed dakayu ya isa nga mannanakew itun, pagpatinggaen nan ya panagtakew na. Ket agwangel kuma lugud nga sigagaget kadiya nabaru win, tasun uwed kuma maitulung na kadiya uwed kasapulan da.

Galasiya 2:10

Yan nas nibilin da dakami, ket laglagipen mi kuma kanu diya napanglaw nga Hudyu. Ket itu met pe̍ ya gabay ku nga tungpalen.

Aramid 10:4

Ket nakam-amutleng ngarud nge̍ Kurne̍lyu ito anghe̍l, ta nakigtut mettin, ket kinunen ne̍ Kurne̍lyu, “Nagan na, apu?” kunen na. Ket kinunen nito anghe̍l, “Silalagip nge̍ Apu Diyus ikew, ta inannamungan na dito karkararag mu, se̍ emmu na pe̍ ya panangaasim kadiya makasapul.

1 Timutyu 6:18

Itu nga ibagam igida nga wanglen da kuma nga pe̍yeng ya nabaru para kadiya makasapul, nga ibilang da kuma nga kinabacnang dan ya panangtulung da ka toley. Ngarud, managkaasi da kuma nga bekken nga nakirmet.

Ruma 12:8

Ket no ya pannakabalin nga mangpabileg iya lemlemmet niya pada tida nga toley ya nae̍cde̍ dactida, itu kuma ngarud ya biyangan tidan. Ket no uwed dactida ya pannakabalin nga mange̍cde̍ kadiya uwed dactida, nasayud tida kuma ngarud nga mangiwaras kadiya kasapulan diya toley. No uwed dactida ya pannakabalin nga mangipangulu, nagaget tida kuma ngarud nga mangipangulu. Ket no ya panangaasi ya nae̍cde̍ nga pannakabalin tida, mangaasi tida kuma ngarud nga siraragsac.

Aramid 24:17

“Ket nabayag gac nga awan ka He̍rusale̍m ka piga nga dagun itun. Ket kasaspuc ku ngas antuni nga nawe̍ nangitulud ka pangtulung nga kuwarta kadiya kailiyac nga makasapul, se̍ mawe̍c pe̍ kuma agdatun iya Te̍mplu.

Aramid 10:31

Ket kinunen nito lalaki iyaken, ‘Kurne̍lyu, inannamungan ne̍ Apu Diyus ya kararag mu, se̍ laglagipen na diya panangaasim kadiya makasapul.

Aramid 10:2

Ket orey bekken nga Hudyu nge̍ Kurne̍lyu, igina se̍ diya kabbalay na, managdayaw da met pe̍ e̍ Apu Diyus. Nakaasi pe̍ nga unay kadiya Hudyu nga napanglaw, se̍ managkararag pe̍ e̍ Apu Diyus.

Aramid 9:36

Ket enna ili nga Huppa itun, uwed isa nga babey nga pasurut ne̍ Je̍sus, nga agnagan ka Tabita. (Durkas ya nagan na ka kagi Griye̍gu, nga kayat na nga kagiyen, ugsa.) Ket pe̍yeng nga agwangwangel to Tabita kadiya napaw-is, nga situtulung se̍ sikakaasi kadiya makasapul.

Juan 13:29

Ket gapu ta e̍ Hudas to nagik-ikem iya laclakassa nga pupunduwan da ka kuwarta, pinagarup dito duduma kadito adalan no nibaga ne̍ Je̍sus igina nga mawe̍ kuma ngumina ka kasapulan da iya padaya, winno nibaga na nga mawe̍ kuma mange̍cde̍ ka kasapulan diya napanglaw.

Juan 5:44

“Madi nu ngarud mabalin ya mamati iyaken, ta ya kalikaguman nu, bekken nga ya panangannamung niya is-isa nga Diyus dakayu, no di lugud ya pammadayaw niya pada nu nga toley.

Lukas 6:42

Ket bayat niya kauwed pekkem niya tabla iya matam, ape̍ nga kunem iya kapadam nga, ‘Da, kabsat, ta ipac ku ya puling mu.’ Ay! Aginlilinteg ka met no agten iyan! Ta masapul nga ipac mu pekkem nga mona ya tabla nga uwed iya mismu nga matam, tasun nabatad ya panagsingem nga mangipac iya puling nga uwed iya mata niya kapadam.”

Markus 12:39

Paggugustu da met pe̍ ya agtugew kadiya kadayawan nga tugtugew iya gigimungan, se̍ ya kangrunaan nga pagtugawan kadiya padaya.

Pilimun 1:7

Laglagipen naka ngarud, ta naparagsakac se̍ napabileg gac, kabsat, gapu iya pannakaemmuc iya panagayat mu kadiya padam nga mamati, ta mangpabileg ka kanu pe̍ yin kadiya nakem diya toley ne̍ Apu Diyus.

1 Te̍salunika 2:6

Madi mi met tinarigagayan ya panangdayaw nu dakami winno ya panagdayaw diya duduma nga toley.

Aramid 11:29

Ket dito pasurut niya Apu enna Antiyakiya nga bekken nga Hudyu, nalagip da ya mangipakagtu ka tulung da kadito kakabsat da ka pammati enna pagiliyan diya Hudyu. Nange̍cde̍ ya tunggal isa, sigun iya kabaellan na nga e̍cde̍.

Lukas 13:15

Ngem kinunen niya Apu igina, “Ape̍ kad nga aginlilinteg kayu? Ta orey iya tunggal isa dakayu, istimaren nu met diya ayam nu, orey no Algew Ngilin. Ta ukasan nu met ya baka winno asnu nu, nga iyalis nu manipud iya panganan na, tasun iturung nu iya papainuman.

Lukas 12:56

Ngem ape̍ nga aginsisirib kayu? Emmu nu met ya mangilasin iya langa niya abac lawa se̍ ya lubung ngi, ngem ape̍ ngarud nga madi kayu malasin ya banag niya agdama nga timpu?”

Lukas 12:33

“Itu nga ilaku nu diya sanicwa nu, ket ya paglakuwan nu, ikaasi nu kadiya napanglaw. Ta ipateg nu kuma ya pagpunduwan nga madi marukup, nga itu ya pagurnungan enna langit ka kinabacnang nga madi macsayan. Ket madi pe̍ makalnec antuni diya mannanakew, se̍ awan pe̍ mabucbuc antuni.

Lukas 11:43

“Kackaasi kayu nad ngarud, dakayu nga Parisiyu! Ta magustuwan nu ya agtugew kadiya kadayawan nga pagtugawan kadiya gigimungan, se̍ magustuwan nu pe̍ ya makabkablaawan nga sidadayaw no uwed kayu iya tindaan.

Lukas 11:41

Dikad pe̍ no maipanggep iya e̍cde̍ nu nga limus, e̍cde̍ nu kuma sigun iya nabaru nga panpanunut nu. Ket no agten iyan ya wangwanglen nu, maibilang met nga nadalus para dakayu diya amin nga banbanagin.

Lukas 6:24

“Ngem no dakayu nga nabacnang, kackaasi kayu nga gennung, ta ita ngas met ya pannakaliwliwa nu.

Markus 7:6

Ket kinunen ne̍ Je̍sus igida, “Pudnu met to padtu nito Isayas itun maipanggep dakayu nga aginlilinteg, ta nisurat na nga kinunen ne̍ Apu Diyus, ‘Didi nga toltoley, daydayawen dac met kadiya balbalikas da, ngem bekken met nga iyaken ya tutu nga ipatpateg da.

Matyu 24:51

Ket dusaen ngarud niya amu na, ket ipababa na ya saad na nga iraman na ngasin kadiya naukum nga managinlilinteg nga toley. Ket diya uwed antuni nga edyan, agberrit se̍ agngaretnget da ngarud,” kunen ne̍ Je̍sus.

Matyu 23:6

Paggugustu da met pe̍ ya agtugew kadiya kangrunaan nga pagtugawan kadiya padaya, se̍ diya kadayawan nga tugtugew iya gigimungan.

Matyu 22:18

Ngem e̍ Je̍sus, emmu na ngarud to dake̍c nga panggep da, itu nga kinunen na igida, “Ape̍ sintiren dac, dakayu nga aginsisingpet?

Matyu 16:3

Ket no degdeggang se̍ gumicbet ya abac lawa iya agsapa, kunen nu met nga, ‘Agenneg no deddan,’ kunen nu. Agten iyan ngarud ya kinalaing nu nga mangilasin iya langa niya abac lawa, ngem ape̍ ngarud nga madi kayu malasin diya pakasingnan iya ita nga timpu?]

Matyu 15:7

Ay, dakayu nga aginlilinteg! Pudnu met to padtu nito Isayas itun maipanggep dakayu ito kinunen na,

Matyu 7:5

Ay! Aginlilinteg ka met no agten iyan! Ta masapul nga ipac mu pekkem nga mona ya tabla nga uwed iya mismu nga matam, tasun nabatad ya panagsingem nga mangipac iya puling nga uwed iya mata niya kapadam.

Matyu 5:18

Ta ya kinapudnu na, no kumaan niya panagpaut niya abac lawa se̍ lubung, itu pe̍ yin ya panagpaut niya orey nagan na nga le̍tra se̍ orey tulnec ngas niya Linteg, agingga ka matungpal nad ya aminin.

Matyu 6:3

Ngem ya kustu nga wanglem kuma nga gennung, no mangikaasi ka, ket madi ka kuma ipakaemmu ya wangwanglem, tasun arig nga madi maemmuwan niya katigid nga imam ya wangwanglen niya diwanan mu.

Matyu 23:5

“Ket diya amin nga wangwanglen da, pagpasindayaw da ngas met iya imatang diya toltoley. Itu nga arimanen da nga dackel dito tekkut kuma nga nakaisuratan Bibliya nga maisimpa iya beggi da. Itu pe̍ nga arimanen da nga deddu diya balayubey diya gayad diya ke̍bal da.

1 Kurintu 13:3

Ket orey no ikaasic kuma diya amin nga sanicwac kadiya napanglaw, se̍ orey no iyawat ku kuma ya beggic nga pooran da gapu iya pammatic, ket no awan latta ayat ku, awan met pe̍ mamaay na yan nga paglaingac.