Lukas 8:14 - Ya Baru nga Tulag

¹⁴ Ket dito bukel nga nagdessag iya karuutan nga uwed rasi na, itu diya maiyarig kadiya toley nga makagicna iya kagi ne̍ Apu Diyus, ngem maabac ya pannakabalin na igida, gapu kadiya pakasikuran da, se̍ gapu iya panangtarigagay da ka kinabacnang se̍ pakaragsakan da. Itu nga arig da nga bisic nga madi agmayan.

Lukas 8:14 Iomraidhean Croise

Matyu 13:22

Ket dito bukel nga naiwaris iya karuutan nga uwed rasi na, itu ya maiyarig iya toley nga makagicna iya kagi ne̍ Apu Diyus, ngem awan met pagbanagan niya kagi ne̍ Apu Diyus igina. Ta maabac ya pannakabalin na igida, gapu kadiya pakasikuran iya biyag nga idi se̍ iya panagtarigagay na ka kinabacnang.

Markus 4:19

ngem awan met pagbanagan niya kagi ne̍ Apu Diyus igida. Ta maabac ya pannakabalin na igida, gapu kadiya pakasikuran da iya biyag nga idi, se̍ iya panagtarigagay da ka kinabacnang, se̍ iya panagtarigagay da met kadiya duduma pe̍ nga banbanag.

Lukas 16:13

“Ket panunuten nu pe̍ nga no ya tagabu, madi met mabalin nga duwa ya pagsirbiyan na. Ta no duwa ya amu na, guraen na met ya isa, ket ayaten na nga gennung ya isa. Winno patgen na ya isa, ket kalucsew na nga gennung ya isa. Ngarud, no dakayu, madi met mabalin nga agpaay kayu e̍ Apu Diyus se̍ agpaay kayu pe̍ iya panangipateg ka kuwarta,” kunen na.

Lukas 21:34

“Ket dakayu, agannad kayu ngarud, tasun madi kuma agkapsut ya panpanunut nu gapu iya nalabes nga pagragsakan idi nga lubung, winno gapu iya panage̍ng-e̍nglew, winno gapu iya pakasikuran maipanggep iya panagbiyag nu. Ta no agten iyan, bekken kayu nad nga nakasagana, ket pakakigtutan nu nad met ya panagparang niyan nga timpu win.

Lukas 8:13

Ket dito bukel nga nagdessag ito ginet nga uwed pinas iya uneg na, itu diya maiyarig kadiya toley nga makagicna iya kagi ne̍ Apu Diyus, ket awaten da nga siaanggem. Ngem gapu ta arig da nga mula nga awan nauneg nga gamut da, nalaka da nga mamati iya damu, ngem dagus da nga aglikud no uwed pakasulisugan da.

Lukas 8:15

Ket dito bukel nga nagdessag iya napaw-is nga ginet, itu diya maiyarig kadiya toley nga makagicna pe̍ iya kagi ne̍ Apu Diyus, ket napudnu se̍ nadalus met ya nakem da no magicna da, ket agtalec da ngarud. Naanus da, ket agbanag ka nabaru ya panamati da,” kunen na.

Lukas 8:7

Nagdessag met diya duduma nga bukel iya karuutan nga uwed rasi na. Ket ito dimackel dito ruut, liniyungan da met dito mula ngin.

Juan 15:6

Ket ya madi manglaglagip iyaken, maitemsit ngas nga arig mettas nga isa nga sanga, ket macrit nad ngarudin. Ket diya agten iyan nga sanga, urnungen diya toley, se̍ da ngas itemsit iya apuy, ket mapooran da ngarudin.

1 Timutyu 6:17

Ket no maipanggep kadiya babacnang, ibagam igida nga di da kuma tumangsit gapu iya kinabacnang da. Ta napateg ngas idi nga lubung yan nga kinabacnang da, ket nalaka pe̍ nga mapukaw nad mettas. Bekken kuma nga itu ya namnamaen da, no di lugud e̍ Apu Diyus. Igina ya paggayatan diya amin nga pakaragsakan tida, nga igina met ya manage̍cde̍ kadiya amin nga kasapulan tida.

2 Timutyu 4:10

Ta to De̍mas, pinanawan nac kun, nga nawe̍ enna Te̍salunika ngin. Ta napatpateg met iginan ya madama nga biyag idi nga lubung. Ket e̍ Kre̍se̍nte̍, awan pe̍ yin, ta nawe̍ enna Galasiya. Ket e̍ Titu, nawe̍ met enna Dalmasiya ngin.

He̍briyu 6:1

Dikad pe̍ isardeng tida kuma lugudin ya panangdagdagollit tida kadito nona nga naadal tida nga panursuru win maipanggep e̍ Kristu. Ituluy tida kuma ngarud ya panagadal ka pangpabaked iya panamati tida, nga tarigagayan tidan ya panamati nga nabaked nga awan pagkurangan na. Itu nga awan sirbi na dactidan no pasoliyan tida manin nga adalen dito nona nga panursuru maipanggep iya panagbabawi tida kadito tungtungpalen nga awan mamaay da, se̍ maipanggep no kumaan kuma niya panamati tida e̍ Apu Diyus.