Lukas 24:47 - Ya Baru nga Tulag

⁴⁷ Ket kunen na pe̍ iya Bibliya nga masapul nga gapu iya turay ne̍ Kristu, maikasaba ya damag maipanggep iya panagbabawi, se̍ iya pannakapakawan diya basbasul. Ngarud, mona nga maikasaba idi nga He̍rusale̍m, se̍ maiwaras pe̍ kadiya amin nga pagpagiliyan iya lubung.

Lukas 24:47 Iomraidhean Croise

Matyu 28:19

Itu nga mawe̍ kayu kuma ngarud agpasurut kadiya toltoley kadiya amin nga pagpagiliyan, tasun umapu da iyaken. Bautisaran nu diya pasurut gapu iya turay nga uwed iya Ama, Anac, se̍ iya Ispiritu Santu.

Matyu 3:2

nga kinunen na, “Masapul nga agbabawi kayu kadiya basbasul nu, ta dandani yin ya panangituray niya Nailangitan,” kunen na.

Matyu 9:13

Ket no dakayu, masapul met nga maadal nu ya kaipapennan nidi nga naisurat iya Bibliya nga kunen na, ‘Bekken nga ya panangidatun ka animal ya paggugustuc, no di lugud ya panangaasi.’ Maawatan nu kuma ngarud ya kaipapennan niyan, ta agten met pe̍ iyaken, nga ya numbe̍tac, bekken met nga tasun awisec diya nalinteg nga toley, no di lugud diya managbasul,” kunen na.

Lukas 13:34

“Ay, dakayu nga iHe̍rusale̍m! Pakapateyyan met dito mammadtu ya siyudad nu. Ngarud, diya ibon dakayu ne̍ Apu Diyus, pakabatuwan da met ya siyudad nu. Mame̍npiga met nga gabay ku ya mangurnung kuma dakayu, nga arig nga panangsikuyup niya gaganac kadiya piyec na iya linung diya payac na. Ngem madi kayu met.

Aramid 10:43

E̍ Je̍sus met to nipakaemmu dito amin nga mammadtu nga Hudyu itun, ta nipakaemmu da nga gapu iya kinaturay na, mapakawan diya basbasul diya amin nga mamati igina,” kunen ne̍ Pe̍dru kade̍ Kurne̍lyu.

Aramid 11:18

Ket ito nagicna dito mamati nga Hudyu yan, awan met pangdellawan da e̍ Pe̍dru win, no di lugud nagdayaw da e̍ Apu Diyusin, nga kinunen da, “Agten iyan ngarudin, ta gabay ne̍ Apu Diyus ya mangipaay pe̍ ka pagbabawiyan diya bekken nga Hudyu, nga pakae̍cdan da ka biyag nga agnanayun,” kunen da.

Aramid 13:46

Ngem de̍ Pablu nge̍ Be̍rnabe̍, nagtured da latta nga agkagi, nga kunen da, “Masapul nga dakayu nga Hudyu ya mona nga pakaipalawagan niya kagi ne̍ Apu Diyus. Ngem gapu ta madi kayu gabay, se̍ madi kayu ibilang nga maikari kayu iya agnanayun nga biyag nga naipalawag dakayun, panpanawan dakayu nga Hudyu ngarudin, ta diya bekken nga Hudyu nga gennung ya mangipalpalawagan min.

Aramid 2:38

Ket kinunen ne̍ Pe̍dru igida, “Agbabawi kayu ngarudin, se̍ pabautisaran ya tunggal isa dakayu gapu iya panamati nu e̍ Je̍su Kristu win, tasun mapakawan diya basbasul nu. Ket mae̍cdan kayu pe̍ iya Ispiritu Santu nga sagut ne̍ Apu Diyus.

Aramid 20:21

Se̍ napasnekkac pe̍ nga mangbagbaga kadiya kapadac nga Hudyu, se̍ orey pe̍ kadiya bekken nga Hudyu, ta nibagac nga sumurut da kuma nga sibababawi e̍ Apu Diyus se̍ mamati da iya Apu tida nga Je̍sus.

Aramid 26:18

Ibon naka ngarud igida, tasun malasin dac gapu iya ibagam igida, tasun pe̍yeng nga e̍ Apu Diyus ya mangituray igidan, nga bekken nga e̍ Satanasin, se̍ tasun wada ya suruten dan, nga bekken nga ya gicbet tin. Ket iya agten iyan, mapakawan diya basbasul dan, gapu iya panamati da iyaken, se̍ maidga dan kadiya maibilang nga toley ne̍ Apu Diyus,’ kunen na iyaken.

Aramid 26:20

Ta nipakaemmuc met kadiya amin nga toley, nga masapul da nga agbabawi kadiya basbasul da, se̍ umapu da e̍ Apu Diyus. Se̍ kunec pe̍ nga masapul nga ipasingen da kadiya wangwanglen da ya panagbabawi dan. Agten iyan ngarud to nikaskasabac, nga nangasaba ngac nga nona kadito iDamasku, se̍ kadito iHe̍rusale̍m pe̍, se̍ kadito amin nga il-ili enna prubinsiya nga Hudya, se̍ kadiya bekken nga Hudyu pe̍.

Aramid 28:28

“Itu nga gabay ku pe̍ nga ipakaemmu dakayu nga naipadamag pe̍ yin kadiya bekken nga Hudyu ya panangisalakan ne̍ Apu Diyus. Ket no igida, ipangag da met,” kunen ne̍ Pablu.

Aramid 3:19

Dikad pe̍ ita, agbabawi kayu kuma ngarudin, nga sumoli kayu iya Apu tasun mapunas diya basbasul nu.

Aramid 4:12

Itu nga e̍ Je̍sus ngas met ya makaisalakan ka toley, ta awan sabali nga kinaturay iya lubung nga nipaay ne̍ Apu Diyus nga mangisalakan dactida,” kunen na.

Aramid 5:31

Se̍ nipangatu pe̍ ne̍ Apu Diyus iya kadayawan nga saad. Ket iya agten iyan, uwed din nge̍ Je̍sus iya madiwanan na nga mangituray se̍ mangisalakan ka toley. Agten iyan ngarud ya winangel ne̍ Apu Diyus, tasun uwed dactida nga Israe̍lita ya gundaway nga agbabawi se̍ tasun uwed pakapakawanan tida pe̍.

Ruma 5:20

Ket ya Linteg ne̍ Muyse̍s, nabangun itun tasun maemmuwan diya toley nga adu diya pakabasulan da. Ngem orey no imadu diya basbasul dito toley, ket ad-adu latta met ya siaayat nga asi ne̍ Apu Diyus.

E̍pe̍su 1:6

Agten iyan ya naariman, tasun daydayawen tida kuma ngarud nge̍ Apu Diyus gapu iya nakaskasdaaw nga siaayat nga asi na nga nipaay na dactida gapu iya pannakaitipun tida iya Dungdungnguwen na nga Anac.

E̍pe̍su 3:8

Ket orey iyaken ya kanumuwan kadiya amin nga toley ne̍ Apu Diyus, pinili nac latta nga mangipakaemmu dakayu nga bekken nga Hudyu kadiya nakaskasdaaw nga unay nga banbanag nga ipaay ne̍ Kristu dactida.

Kulusas 1:27

Ket dactida nga toley ne̍ Apu Diyus, dactida mettin ya pinili na nga pangipakaemmuwan nan iya kinakaskasdaaw niyan nga napateg se̍ nadayaw nga panggep na maipanggep kadiya bekken nga Hudyu. Ket ya banag nito panggep na, ket agten idi: Uwed met dakayu nge̍ Kristu win, nga itu ya namnamaen nu nga mairaman kayu kadiya nadayaw nga iturayan na.

1 Juan 2:12

Dakayu nga ebbing, agsurat tac dakayu gapu ta napakawanin diya basbasul nu, gapu iya kinaturay ne̍ Kristu.