Lukas 22:41 - Ya Baru nga Tulag

⁴¹ Ket binay-atan na da ka e̍teng, se̍ nagparintumeng nga nagkarkararagin.

Lukas 22:41 Iomraidhean Croise

Matyu 26:39

Ket imadeyyu nge̍ Je̍sus ka e̍teng igida, se̍ nagdarongkeb iya ginet nga nagkarkararagin, nga kinunen na, “Amac! No mabalin nas kuma, mailisi kuma iyaken yani nga panagsagaba nga lak-amec, nga rigat nga arig nga inumec. Ngem bekken kuma ngarud nga ya tarigagay ku ya matungpal, no di lugud ya tarigagay mu,” kunen na.

Markus 14:35

Ket imadeyyu nge̍ Je̍sus ka e̍teng igida, se̍ nagdarongkeb iya ginet nga nagkarkararagin. Nikararag na nga no mabalin, maliclikan na kuma ya umbe̍t nga panagrigat na.

Lukas 18:11

Ket to Parisiyu, nagsikad nga is-isa nga nagkararag. Ket kinunen na, ‘Apu Diyus, agyaman nac ikew, ta bekken nac nga agten kadiya duduma nga toley, nga agten kadiya agtakew, nasikap, se̍ diya makitipun kadiya bekken da nga asawa. Ket bekken nac pe̍ nga agten iya toley nga iyan nga agsingsingir ka buis.

Lukas 18:13

“Ngem to agsingsingir ka buis nga gennung, nagsikad ngas iya nabay-at. Ket di orey limangad, no di lugud dinandantug na ya barukung na nga nagbabawi, nga kinunen na, ‘Apu Diyus, kaasiyan nac kay, ta managbasul lac met,’ kunen na.

Aramid 20:36

Ket ito nalpas ne̍ Pablu to nagkagi yin, nagparintumeng da nga amin, se̍ da nagkararag.

Aramid 21:5

Ket ito nakaduminggu kami antuni nin, pimanaw kami lattan. Ket igida nga amin nga pasurut nga pati babey se̍ diya aanac da, nawe̍ dakami nitulud patingga iya pingit niya baybay iya laskig nito ili, ket nagparintumeng kami nga nagkararag ito panapanag.

Aramid 7:60

Se̍ nagparintumeng, ket binilgan na ya kararag nan nga nipkaw na, “Apu, pakawanem kay didi nga toley idi nga basul da iyaken,” kunen na. Kalpasan na nga nagkagi ka agten iyanin, natey mettin.

Aramid 9:40

Ket e̍ Pe̍dru, pinaruwar na da ito kuwartu, se̍ nagparintumeng nga nagkararagin. Kalpasan na, sinangu na to bangkay, nga kinunen na, “Tabita, bumangun kan,” kunen na. Ket nagmata met nga tutu win. Ket ito nasingen na nge̍ Pe̍dru, bimangun mettin.

He̍briyu 5:7

Ket ito kauwed ne̍ Je̍sus idi nga lubung, nagkarkararag nga nagad-adeng e̍ Apu Diyus, nga igina ngarud ya uwed pannakabalin na nga mangilisi e̍ Je̍sus ka patey. Nagberrit se̍ imawag nge̍ Je̍sus ka nabileg ito panagkararag na. Ket dinngeg ngarud ne̍ Apu Diyus, gapu ta sipapakumbaba nga nagtungpal nge̍ Je̍sus igina.