Lukas 11:41 - Ya Baru nga Tulag

⁴¹ Dikad pe̍ no maipanggep iya e̍cde̍ nu nga limus, e̍cde̍ nu kuma sigun iya nabaru nga panpanunut nu. Ket no agten iyan ya wangwanglen nu, maibilang met nga nadalus para dakayu diya amin nga banbanagin.

Lukas 11:41 Iomraidhean Croise

Matyu 26:11

Ta ya kinapudnu na, ket kanayun nga uwed da dakayu diya napanglaw. Ngem no iyaken, bekken met nga agnanayun ya kauwed ku dakayu.

Matyu 5:42

Ket no uwed kuma agpakaasi nga agadeng ikew, e̍cdam ngarud. Se̍ no uwed mayat nga tumkew ikew, patkawam ngarud.”

Markus 7:19

Ta ya kanen toley, madi ngarud maigamer iya panpanunut na, no di ngas mawe̍ iya bessug, ket mairuwar nad mettas nga maipay iya kasilya,” kunen na. Ket iya agten iyan, nipakaemmu met ne̍ Je̍susin nga awan makan nga madi maibilang nga nadalus iya imatang ne̍ Apu Diyus.

Lukas 12:33

“Itu nga ilaku nu diya sanicwa nu, ket ya paglakuwan nu, ikaasi nu kadiya napanglaw. Ta ipateg nu kuma ya pagpunduwan nga madi marukup, nga itu ya pagurnungan enna langit ka kinabacnang nga madi macsayan. Ket madi pe̍ makalnec antuni diya mannanakew, se̍ awan pe̍ mabucbuc antuni.

Lukas 16:9

Ket pudnu met nga masapul nga agpautang kayu gapu iya panangikaasi nu iya agten iyan nga nailubungan nga kuwarta, tasun adu kuma diya gagayyem nu. Ta iya agten iyan, no malabes nad ya sirbi niyan nga kuwarta ngin, uwed da latta mangiyuneg nga mangsarabu dakayu enna agnanayun nga pagedyanan.

Lukas 18:22

Ket ito nagicna ne̍ Je̍sus yan nga kunen nito pangulu, ket kinunen na igina, “Uwed pekkem mas isa nga masapul nga wanglem. Ilakum diya amin nga sansanicwam, se̍ ka iwaras ya paglakuwam kadiya napanglaw. Ket iya agten iyan, uwed nad kinabacnang mu ka langitin. Ket kalpasan niya panangiwaras mun, umbe̍t nac suruten nin,” kunen na.

Lukas 19:8

Ket enna baley ne̍ Sakiyu, ginumnukat nge̍ Sakiyu nga kinunen na iya Apu, “Agten idi nin ya wanglec kun, Apu: E̍cde̍c ya kagudduwa niya sansanicwac kadiya napanglaw. Ket ya orey nagan na nga sinikapac, ket mame̍npat met ya kaadu niya isolic igida,” kunen na.

Aramid 10:15

Ket kinunen manin nito timec igina, “Di ka ibilang nga dake̍c ya nibilang ne̍ Apu Diyus nga nadalusin,” kunen na.

Aramid 11:29

Ket dito pasurut niya Apu enna Antiyakiya nga bekken nga Hudyu, nalagip da ya mangipakagtu ka tulung da kadito kakabsat da ka pammati enna pagiliyan diya Hudyu. Nange̍cde̍ ya tunggal isa, sigun iya kabaellan na nga e̍cde̍.

Aramid 24:17

“Ket nabayag gac nga awan ka He̍rusale̍m ka piga nga dagun itun. Ket kasaspuc ku ngas antuni nga nawe̍ nangitulud ka pangtulung nga kuwarta kadiya kailiyac nga makasapul, se̍ mawe̍c pe̍ kuma agdatun iya Te̍mplu.

2 Kurintu 8:12

Ta no disnudu tida nga panggeppen ya mange̍cde̍, mayat met e̍ Apu Diyus ya orey nagan na nga mae̍cde̍ tida, sigun iya kabaellan tida. Ta emmu ne̍ Apu Diyus ya patingga niya kabaellan tida.

E̍pe̍su 4:28

Ket no uwed dakayu ya isa nga mannanakew itun, pagpatinggaen nan ya panagtakew na. Ket agwangel kuma lugud nga sigagaget kadiya nabaru win, tasun uwed kuma maitulung na kadiya uwed kasapulan da.

Titu 1:15

Agten idi: Diya toley nga nadalus ya nakem da, ket awan naibilang igida nga bekken nga nadalus. Ngem diya toley nga narugit ya nakem da, nga madi mamati iya pudnu, ket awan pulus naibilang nga nadalus igida, ta dake̍c met ya panpanunut da se̍ ya nakem da.

He̍briyu 13:16

Ket di nu kuma pe̍ liwayan ya panagariman ka nabaru, se̍ ya panagtitinnulung nga siaasi. Ta diya agten kadiyan, arig da nga datun nu nga makaay-ayu e̍ Apu Diyus.

He̍briyu 6:10

Ta emmu tida nga gapu ta kustu ya pananglinteg ne̍ Apu Diyus, silalagip ngarud kadiya nabaru nga winangel nu. Ket se̍ silalagip pe̍ iya panagayat nu igina, nga ipasingen nu gapu iya panangtulung nu kadiya pada tida nga mamati, nga itu ya winangwangel nu itun, se̍ orey ita pe̍.

Santiyagu 1:27

Ngem no madi kayu makibiyang kadiya dake̍c nga ugali iya lubung ngi, se̍ no tulungan nu diya kackaasi nga ulila se̍ diya balu, ket e̍ Apu Diyus nga Ama tida, ibilang na nga napudnu se̍ awan mansa na ya panagdaydayaw nu.