Kulusas 3:8 - Ya Baru nga Tulag

⁸ Ngem itan, ipac nu kuma ngarud diya amin nga dake̍c, nga agten kadiya gura, se̍ unget, se̍ ya panangpasakit ka nakem niya pada nu nga toley, se̍ ya panangibaga ka dake̍c maipanggep iya kapada nu, se̍ ya panangibalikas ka naalas.

Kulusas 3:8 Iomraidhean Croise

Matyu 5:22

Ket ya ibagac dakayu, ket ya amin nga orey makaunget ngas iya kapada na, rebbeng na met ya maisangu nga maukum kadiya kustisiya. Se̍ ya orey nagan na nga mangagi iya kapada na nga, ‘Awan nakem mu!’ ket rebbeng na met ya maisangu iya Kunse̍hus. Se̍ ya mangagi nga, ‘Turpi ka!’ ket rebbeng na met ya maipisuc iya apuy nga pagdusaan enna impiye̍rnu.

Markus 7:22

se̍ ya pannakitipun ka bekken na nga asawa, se̍ ya panagagum, panaglucluku, panagsikap, se̍ ya agariman ka naalas, se̍ ya panagiwan, panamadpadake̍c, panagpasindayaw, se̍ ya nadarusudus nga panagbiyag.

Ruma 13:13

Ket ya gangey tida ita, natacneng ngas kuma, nga maitutup iya gangey diya maipaay iya algew. Itu nga bay-an tida ngarud ya panaglucluku se̍ panage̍ng-e̍nglew. Awan kuma ngarud dactida ya pannakikamalala winno duduma pe̍ nga naalas nga wangwangel. Awan kuma ngarud pe̍ yin diya panagsusupyat winno panagiman.

1 Kurintu 3:3

Kunec yani ta tungtungpalen nu pekkem ya tarigagay ngas niya kinatoley nu. Ta ya panagiinnapal nu se̍ ya panagsusupyat nu, ket itu yan ya mangipanecnec nga tungtungpalen nu pekkem ya tarigagay niya kinatoley nu. Ket ya panagbiyag nu, agten mettas iya ugali diya madi mamati.

2 Kurintu 12:20

Ta madanagan nac, nga no makadateng ngac nad iya edyan nun, kaynun no ya nakem nun, sabali iya namnamaec dakayu. Ket no agten iyan, ya nakem ku, sabali ngarud nad pe̍ yin iya namnamaen nu iyaken. Ta kaynun no uwed nad madatngac nga panagsusuway nu se̍ panagiinnimun nu, se̍ siuuyung nga panagiinnunget nu, se̍ panagsisinnupyat nu, winno kaynun no uwed nad panagpipinnadake̍c nu se̍ panagiinnamis nu, winno panagpaspasindayaw nu, se̍ panagkusu nu.

Galasiya 5:15

Ngem no pe̍yeng kayu nga agsisinnuway se̍ agpipinnasakit, nga arig kayu nga animal nga agkikinnagat, annadan nu, ta kaynun no agpipinnirdi kayun.

Galasiya 5:20

Agten pe̍ kadiya agtungpal kadiya didiyusen, se̍ ya panaggamut. Tumaud pe̍ iya kinatoley diya panaggiginnura, panagsusupyat, panagiman, se̍ ya panagung-unget. Agten pe̍ kadiya panagagawa, panagsuway, se̍ ya panamagsisina kadiya panpanunut diya toltoley.

Galasiya 5:26

Awan kuma ngarud dactidan diya agtitinnangsit, winno agsisinnuting, winno agiinnapal.

E̍pe̍su 4:22

Dikad pe̍ ipac nu ngarudin to sigud nga gangey nu, nga itu to tinungtungpal nu ito daan nga panagbibiyag nu itun. Ta dake̍c ngas met diyan nga gangey nu nga mangiyaw-awan dakayu gapu kadiya dake̍c nga ricricna niya beggi nu.

E̍pe̍su 4:25

Dikad pe̍ ipac nu ngarud ya panagbusbusidin. Ket ya tunggal isa dakayu, pudnu kuma ngasin ya ibaga nu kadiya kapada nu, ta kamkameng nactida nga amin ya is-isa nga bungguy.

E̍pe̍su 4:26

Ket no uwed unget nu, agteppel kayu ngarudin, tasun madi kuma agbanag ka basul ya unget nu. Madi kuma magidaman ya unget nu, no di lugud nalaka ngas nga agbaaw.

E̍pe̍su 4:29

Masapul nga awan dake̍c nga ibalikas nu, no di yas diya balikas nga mangpabileg ka nakem niya toley ya ibalikas nu, sigun iya kasapulan niya katkatbar nu, tasun matulungan kuma diya aggigicna dakayu.

E̍pe̍su 5:4

Ket madi met pe̍ tumutup nga agibalikas tida kadiya naalas se̍ ya panagkagi nga awan mamaay na, winno ya napalaus nga parparatu, no di lugud mapadayawan kuma nge̍ Apu Diyus gapu iya panagyaman nga ibalbalikas tida.

Kulusas 3:5

Dikad pe̍ isardeng nu ngarudin diya dake̍c nga tarigagay nga agtaud das iya lubung. Itu ya arig nga patayen nu diya amin nga nailubungan nga ganggangey nun, nga agten iya pannakikamalala, se̍ diya naalas nga panpanunut, se̍ diya nakal-alyew nga tarigagay se̍ ricricna niya beggi, se̍ ya panagagum pe̍. Ta ya aguman toley, ket agbalin nga arig nga diyus da nga daydayawen da.

Kulusas 3:9

Ket madi kayu pe̍ agbibinnusid, ta lagipen nu kuma nga binaybay-an nun to sigud nga gangey niya kinatoley nu, agraman diya dake̍c nga pagbanagan na.

1 Timutyu 1:13

Ito nona, nagkagkagi yac ka maikuntra igina. Ket igina met ya nakaipaayan nito panangirurumen se̍ pananguy-uyaw ku. No pe̍ agten iyan, kinaasiyan nac pekkem nge̍ Apu Diyus, ta madi yac naawatan dito winangwangel ku itun, gapu ta madi yac pekkem mamati itun.

1 Timutyu 1:20

Mairaman met kadiya agten iyan de̍ Hime̍nyu nge̍ Ale̍handru. Nipalubus ku da ngasin iya pannakabalin ne̍ Satanas, bareng no masursuruwan da kuma nga madi agkagi ka maikuntra e̍ Apu Diyus.

He̍briyu 12:1

Ket no dactida ita, arig nga nale̍cbut tidan kadito adu nga toley, ta uwed pekkem dactida ita diya pammanecnec da maipanggep ito panamati da. Itu nga ipac tida kuma ngarudin diya amin nga manggapus dactida iya panamati tida, se̍ ya pakabasulan tida nga mangsipar iya panamati tida. Ket se̍ an-anusan tida ngarud nga itultuluy ya panagtungpal tida iya rebbeng niya panamati tida, nga maiyarig iya panagtarus niya isa nga makilumba nga sisingen nan ya pagpatinggaan niya pannakilumba na.

Santiyagu 2:7

Diya babacnang met pe̍ diya agkagkagi ka dake̍c maipanggep iya nadayaw nga turay niya Apu tida, nga igina mettas ya nangitalkan nu.

1 Pe̍dru 2:1

Dikad pe̍ gapu ta naibilang kayu nga nabalbaliwan nga naiyanac kin, masapul nga ipac nun diya amin nga dake̍c nga ganggangey nu, agten kadiya amin nga panagsikap se̍ panaginsisingpet, panagimun, se̍ amin nga panagumsi ka kapadpada nu.

2 Pe̍dru 2:18

Tutu met yan, ta napalaus met ya panagbuwakaw dito mangisursuru ka busid. Ngem awan met sirsirbi diya kagkagiyen da. Ket iya agten iyan, awisen da met diya toley nga kapanpanaw iya pannakikabulun da kadiya toley nga agtungpal kadiya busid nga banbanag. Awisen da ngarud diyan nga kapanpanaw nga toley, ta pangpayayat da kadiyan nga toley diya naalas nga tarigagayan niya kinatoley da.

2 Pe̍dru 2:7

Ngem to toley nga Lot, nagtungtungpal kadiya nalinteg, orey nasikuran nga unay itun gapu kadito naalas nga winangwangel dito dake̍c nga kailiyan na. Ket nisalakan met ne̍ Apu Diyus to Lot itun.

Hudas 1:13

Ket nalaka nga malasin ya kinadake̍c niya ugali da, ta nakal-alyew diya wanglen da. Itu met ya arig nga nalaka nga pakasingnan ka rokac nga tumaud ka dackel nga palung iya baybay. Ket maiyarig da met pe̍ ka bituwen nga or-orey ya pananalan na. Ngarud, naisagana ngin para kaditun nga toley ya pakadusaan da, nga itu ya agnanayun nga gicbet ito nauneg nga lugar.

Hudas 1:8

Ket agten met pe̍ iyan dito toley iya edyan nu ita nga madi mangipateg e̍ Apu Diyus. Diya arapaap da ngas met ya mamettan da kadiya tungtungpalen da. Ket iraman da met diya begbeggi da mettas kadiya bekken nga nadalus, se̍ ibilang da nga awan pateg na ya naisaad nga turay, se̍ laisen da pe̍ diya nadayaw nga nailangitan.

Paltiing 16:9

Nacset ngarud diya toltoley yin ka nakaru nga pudut. Ngem nagkagkagiyan latta diya toltoley nge̍ Apu Diyus ka dake̍c, orey igina met ya akin-turay kadiyan nga panagrigat da. Agten iyan ngarud, se̍ madi da latta binabawi to kinadake̍c da. Ket iya agten iyan, madi da nagdayaw e̍ Apu Diyus.