Kulusas 3:5 - Ya Baru nga Tulag

⁵ Dikad pe̍ isardeng nu ngarudin diya dake̍c nga tarigagay nga agtaud das iya lubung. Itu ya arig nga patayen nu diya amin nga nailubungan nga ganggangey nun, nga agten iya pannakikamalala, se̍ diya naalas nga panpanunut, se̍ diya nakal-alyew nga tarigagay se̍ ricricna niya beggi, se̍ ya panagagum pe̍. Ta ya aguman toley, ket agbalin nga arig nga diyus da nga daydayawen da.

Kulusas 3:5 Iomraidhean Croise

Matyu 15:19

Ta diya gayat iya tarigagay niya toley, itu diyan diya pagtaudan diya dake̍c nga panpanunut, se̍ ya pumatey, pannakitipun ka bekken na nga asawa, pannakikamalala, panagtakew, se̍ ya panangpabasul nga sibubusid, se̍ ya panamadpadake̍c.

Ruma 1:26

Ket gapu iyan nga winangel dito toltoley nga madi nagdayaw e̍ Apu Diyus, nipamoya na da ngarud kadiya nakal-alyew nga ricna da. Ta diya babey igida, sinabaliyan da ya gangey babey, nga bekken nga lalaki yin ya nakitipunan dan.

Ruma 1:29

Napalaus met igidan ya amin nga kita basul, kinadake̍c, kinaagum, se̍ panaggugura. Napalaus pe̍ igida ya panagapal, pumatey, pannakisupyat, panaglibac, se̍ ya panagparbu. Managtsismis da pe̍.

Ruma 6:13

Ket madi kayu pe̍ nga ipalubusin nga paiturayan ka basul, ya orey nagan na nga parte̍ niya beggi nu, tasun madi da kuma mausar ka dake̍c nga banbanag, no di lugud ipaay nu ngas ya beggi nu e̍ Apu Diyus. Ipaay nu ngarud igina ya amin nga parte̍ niya beggi nu, tasun mausar kuma ngin kadiya nalinteg nga banbanag. Ta sibibiyag kayu met nga toley nga naibilang nga natey itun nga arig nga napagungarin.

Ruma 6:6

Ket nabatad dactidan nga ya sigud nga kinatoley tida, nairaman e̍ Kristu ito pannakailansa na ito krus, tasun mapirdi ya pannakabalin niya gangey tida nga agbasbasul. Ket iya agten iyan, bekken tida kuma ngarud nga paiturayan ka basulin nga arig nga tagabu nactida ya basul.

Ruma 7:23

ket uwed met sabali nga paglinteggan nga tungtungpalen nga gennung diya ricricna niya beggi. Ket maikuntra met yani nga paglinteggan iya paglinteggan nga tartarigagayac nga tungpalen iya lemlemmet ku. Ket ya paglinteggan nga tungtungpalen niya beggic, itu ya mangpilit iyaken, nga arig nga pagbalinen nac nga balud niya basul nga mangituray kadiya parte̍ niya beggic.

Ruma 7:5

Ket itun, nagtungtungpal tida pekkem kadito tarigagay nga tumaud ngas iya kinatoley tida. Ket gapu ta naemmuwan tida ya kunen na ito Linteg, arig nga limallalu pekkem diya dake̍c nga ricna nga uwed kadiya beggi tida. Ket patey ngas met ya pagbanagan tida itun gapu kadiyan.

Ruma 8:13

Ta no tungtungpalen nu ngas diya tartarigagay niya kinatoley nu, ket agbanag kayu met ka pannakatey. Ngem no gapu iya tulung niya Ispiritu ne̍ Apu Diyus, ket isardeng nu diya dake̍c nga wangwangel nu nga tumaud iya tarigagay niya beggi nu, ket agbiyag kayu nad pekkem.

1 Kurintu 5:1

Nadamag ku nga uwed kanu met makikamkamalala iya bungguy nu. Dake̍c nga tutu ya pannakikamalala na, ta orey diya toley nga awan pammati da, madi da met agariman iya agten iyan nga kinadake̍c. Ta nadamag ku nga uwed kanu isa nga lalaki nga ad-adugen na kanu ya agsiyuman igina nga babey.

1 Kurintu 6:11

Ket agten kadiyan ngarud diya duduma dakayu itun. Ngem ita, nagpadalus kayun kadiya basbasul nu, ket naipaay kayun e̍ Apu Diyus, se̍ napalinteg kayu pe̍ yin iya imatang na, gapu mettas iya kinaturay ne̍ Apu Je̍su Kristu se̍ ya Ispiritu niya Diyus tida.

1 Kurintu 6:13

Tutu met pe̍ ya kunen diya duduma nga diya macmakan, agpaay kanu iya bessug. Se̍ ya bessug, ket para kanu kadiya macmakan. Bo a, ngem pudnu met pe̍ nga pukawen nad mettas ne̍ Apu Diyus diya macmakan se̍ orey diya bessug tida met pe̍. Ket no diya beggi tida, bekken nga nisangrat ne̍ Apu Diyus nga maipaay ka pannakikamalala, no di lugud tasun agpaay kuma iya Apu. Ket ya Apu, agsirbi met pe̍ kadiya beggi tida.

1 Kurintu 6:18

Ngarud, adeyyuwan nu kuma ya pannakikamalala, ta maape̍ktaran met ya beggi iya agten iyan nga basul. Diya duduma nga pagbasulan, madi da umape̍ktar iya beggi. Ngem ya toley nga makikamalala, ket ya beggi na mettas ya pagbasulan na.

2 Kurintu 12:21

Madanagan nac ngarud maipanggep idi nga isasacwar ku manin dakayu. Ta kaynun no paalyewwen nac ya Diyus ku maigapu dakayu, no mapaladingit tac nad gapu kadiya adu nga nakabasul iyan. Ta kaynun no madi da pekkem babawiyen dito dake̍c nga ugali da, nga agten iya pannakikamalala, se̍ ya panagtungtungpal da kadiya naalas nga ricricna niya beggi da.

Galasiya 5:24

Ket diya toley nga naikameng e̍ Kristu Je̍sus, ibilang da nga natey yin ya tarigagay niya kinatoley da, nga arig nga nilansa dan ito krus, agraman diya naalas nga ricna da se̍ diya ke̍lugan da.

E̍pe̍su 4:19

Ket gapu ta naigamer ya dake̍c igidan, arig nga nagkalmadura mettin diya nakem dan. Awan ngarud alyew dan nga agtungpal ka orey nagan na nga dake̍c nga ricna niya beggi da, se̍ pulus nga madi mapnec ya e̍lug da nga agwangel latta ka naalas.

Kulusas 2:11

Ket gapu mettas iya pannakaitipun nu e̍ Kristu win, nagbalin kayu met nga arig nga pudnu nga nakugit nga Hudyu win. Ta orey bekken kayu nga Hudyu, uwed met arig nga pannakakugit nun. Ket bekken nga inariman niya toley yani, ta itu ya pannakaipac diya tarigagay niya sibabasul nga kinatoley nu. Ta gapu iya pannakaitipun nu e̍ Kristu win, madi kayu nga paiturayanin iya panpanunut nga tumaud ngas iya kinatoley nun.

1 Te̍salunika 4:3

Ket agten idi ya tarigagayan ne̍ Apu Diyus dakayu: Adeyyuwan nu ya pannakikamalala, ta tarigagayan ne̍ Apu Diyus nga maiyadeyyu kayu kuma ka dake̍c.

1 Te̍salunika 4:5

Bekken kayu kuma nga paiturayan kadiya ricna niya beggi, nga agten iya gangey diya bekken nga mamati nga madi makaem-emmu e̍ Apu Diyus.

1 Timutyu 6:10

Ta ya panangipateg ka kuwarta, ket itu met ya isa nga pagtaudan diya amin nga kita dake̍c. Tutu ngarud, ta uwed da toley nga imadeyyu win iya pammati tida, gapu was iya panagagum da ka kuwarta. Ket iya agten iyan, pinasakit da met ya beggi da, nga aglak-am da ka adu nga leddaangin.

He̍briyu 12:16

Agannad kayu pe̍ tasun awan dakayu ya makikamalala, se̍ tasun awan kuma pe̍ dakayu ya madi mangipateg iya tarigagay ne̍ Apu Diyus, nga agten ito E̍saw itun. Ta to E̍saw, madi na met nipateg to tawid na nga naikari igina itun, nga naipaay igina gapu ta igina ya inauna nga anac. Ta nisukat na met to tawid na ka isa ngas nga pannangan.

He̍briyu 13:4

Dayawen tida kuma nga amin ya panagasawa diya agasawa. Se̍ masapul nga sipupudnu ya tunggal isa iya asawa na. Ta ukumen ngarud ne̍ Apu Diyus diya makikamalala, se̍ diya makitipun ka bekken da nga asawa.

He̍briyu 13:5

Bekken kayu kuma nga naagum ka kuwarta, no di lugud kuntintu kayu ngas iya uwed dakayun. Ta kinunen met ne̍ Apu Diyus nga, “Pulus nga madi naka panawan, winno baybay-an,” kunen na.

Santiyagu 4:1

No maipanggep kadiya dake̍c nga tarigagay nga agtaud iya beggi tida, masikuran diya panpanunut tida, ta maawis tida nga mangtungpal. Ket itu ya gapu na nga uwed dakayu ya panagiinnupir se̍ panagsusuway.

1 Pe̍dru 2:11

Dakayu nga patpatgec, maibilang kayu nga sangsangaili se̍ gan-gannaet ngas met idi nga lubung. Itu nga bilinen nakayu nga sipapasnec, nga bekken kuma nga diya dake̍c nga tarigagay diya beggi nu ya tungtungpalen nu, ta mangkuntra didi kadiya nabaru nga panggep nu.

Paltiing 21:8

Ngem dake̍c nad nga gennung ya pagbanagan diya mangiyalyew iyaken, se̍ diya madi mamati iyaken, se̍ diya narugit ya nakem da, se̍ diya pumapatey, se̍ diya makikamalala, se̍ diya makibiyang kadiya sacsairu winno iya panaggamut, se̍ diya agdaydayaw kadiya didiyusen, se̍ diya amin nga managbusid. Ta ya pagbanagan didi, ket maipisuc da nad ngarud ito dackel nga edyan niya gumilgilab nga apuy se̍ burbura nga asupre̍, nga itu ya maikadduwa nga pannakatey,” kunen na.

Paltiing 22:15

Ngem diya malaskig nga gennung ito siyudad, itu diya bekken nga nadalus nga maiyarig ngas ka asu, se̍ diya makibiyang kadiya sacsairu winno iya panaggamut, se̍ diya makikamalala, se̍ diya pumapatey, se̍ diya agdaydayaw kadiya didiyusen se̍ diya mangipalubus ka busid winno diya managbusid pe̍.