Kulusas 3:4 - Ya Baru nga Tulag

⁴ Ket nad no agparang manin nge̍ Kristu nga pagtaudan mettas nidi nga biyag nu, ket maiparangarang kayu nad pe̍ iginan, nga itu nad ya pannakairaman nu iya pakaidayawan nan.

Kulusas 3:4 Iomraidhean Croise

Matyu 13:43

Ngem diya nalinteg nga toley nga iturayan nad niya Ama da, masingen nad met ya dayaw da, nga arig da nga sirnac niya darang niya sinag. Ket dakayu nga uwed pannakaawat na, tandaanan nu kuma ngarud yanin.”

Lukas 17:30

Ket agten nad pe̍ iyan no timpu niya panagparang niya Anac nga Naipatoley.

Juan 11:25

Ket kinunen ne̍ Je̍sus igina, “Iyaken mettas ya mangpaungar se̍ mange̍cde̍ ka biyag. Dikad pe̍ ya mamati iyaken, orey no matey, agbiyag nad mettas.

Juan 14:3

Mawe̍ yac ngarud, ket kalpasan niya panangisaganac iya pagedyanan nu ennan, sumoli yac met nga umbe̍t nakayu alaken, tasun ya pagedyanac, itu met pe̍ ya pagedyanan nu.

Juan 14:6

Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken.

Juan 17:24

“Ket Ama, no didi nga toley nga nitalec mu iyaken, gabay ku nga ya kapennac nga edyan, ket itu nad met pe̍ kuma ya edyan da. Gabay ku ngarud ya agten iyan, tasun masingen da kuma ya nadayaw nga kasasaad ku nga nipaay mu iyaken gapu iya panagayat mu iyaken nga sigud, orey ito di pekkem naparsuwa ya lubung.

Juan 20:31

Ket diya naisurat idi nga libru, naisurat da tasun patiyen nu kuma nga e̍ Je̍sus, igina ya Kristu nga Anac ne̍ Apu Diyus. Ket no mamati kayu, maipaayan kayu ngarud ka biyag nga agnanayun, gapu iya kinaturay na.

Aramid 3:15

Ket iya agten iyan, nipapatey nu met ya pagtaudan niya biyag. Ngem pinagungar mettas ne̍ Apu Diyus. Ket dakami, nasacsiyan mi met yan.

Ruma 8:18

Ket no utubec ya kinadayaw nga dumateng dactida no ipakaemmu nad ne̍ Apu Diyus, ket pulus nga madic ikinkiney yin diya rigrigat ku idi nga lubung.

Ruma 8:19

Ta sisasagana ngin ya amin nga parsuwa ne̍ Apu Diyus, nga arig nga agpadpadaan da pe̍ iya panangiparangarang ne̍ Apu Diyus kadiya an-anac na.

1 Kurintu 1:7

Itu nga awan pagkurkurangan nu kadiya ikaasi ne̍ Apu Diyus, bayat niya panagpadaan nu iya pannakaiparang manin niya Apu tida nga Je̍su Kristu.

1 Kurintu 15:43

Ya beggi toley nga naitamen nin, awan met kinapateg nan. Ngem no mapagungar, ket napateg gin. Awan met bileg na no maitamen. Ngem nabileg no agungarin.

2 Kurintu 4:17

Ta amin didi nga pakaparparigatan mi, bekken da nga nadagsen winno agnanayun. Ket itured mi ngasin, gapu iya panagnamnama mi iya kinadayaw nga mae̍cde̍ nad dakami gapu iya panangitured mi kadidi nga pakaparparigatan mi ita. Ket iyan nga kinadayaw, madi ngarud agpatingga se̍ awan kapada na.

Galasiya 2:20

Ngarud, naibilang ngac nga natey yin gapu ta nairaman nac ito pannakailansa ne̍ Kristu ito krus na. Ngem orey naibilang ngac nga nairaman ito pannakatey ne̍ Kristu, sibibiyag gac pekkem. Ngem bekken nga ya gangey niya kinatoley ku ya mangituray iyaken nin, no di lugud ya gangey ne̍ Kristu win, ta uwed met iyaken nge̍ Kristu win. Ket idi nga panagbiyag ku ita, ipaay ku was iya Anac ne̍ Apu Diyus, gapu ta igina met ya patpatiyec, nga igina ya nangipateg iyaken, se̍ ya nangipalubus iya pannakaidatun niya beggi na para iyaken.

Pilipus 3:21

Ket igina met ya mangbaliw nad kadiya kackaasi nga beggi tida. Pagbalinen na da nad nga agten mettas iya napadayaw nga beggi na ita. Ket ya pannakabalin nga usaren na nad iya panangbaliw na dactida, ket itu ya agten mettas nga pannakabalin nga usaren na tasun pagbalinen na nga agpaituray igina diya amin.

1 Te̍salunika 4:17

Kalpasan niyan, dactida nga sibibiyag nga madi pekkem nga natey, maalac tida nad pe̍ nga maibulun igida iya edyan diya ul-ulep, tasun sabten tida ya Apu iya ngudu. Ket iya agten iyan, makipagedyan tida nad iya Apu ka agnanayun.

1 Timutyu 6:14

Bilinen naka nga tungpalem kuma ngarud dito naibilin ikew. Ket madi ka agdardarusudus kadiyan, tasun awan pakamansaam winno pakaumsiyam. Agten iyan kuma ngarud ya panangtungpal mu orey agingga iya algew nga panagparang manin niya Apu tida nga Je̍su Kristu.

2 Timutyu 1:1

Iyaken nge̍ Pablu nga pinagbalin ne̍ Apu Diyus nga isa nga apustul nga agpaay e̍ Kristu Je̍sus. Maikanatad yani ito kari na maipanggep iya biyag nga mae̍cde̍ dactida nga maitipun e̍ Kristu Je̍sus.

2 Timutyu 4:8

Ket itan, uwed naisagana para iyaken nga arig nga gun-gunac. Itu ya kinalinteg niya Apu nga ikutac nad mettas, nga arig nga isa nga kuruna nga igun-guna niya Apu iyaken nad no Timpu na nga manglinteg kadiya toltoley. Ket bekken nas nga iiyaken ya magun-gunaan nad ka agten iyan, no di pe̍ diya amin nga siaayat nga mangpadpadaan iya umbe̍t na manin.

Titu 2:13

Agten iyan kuma ya panagbiyag tida bayat niya panagpadpadaan tida iya makaparagsac nga pagnamnamaan tida, nga itu ya pakasingnan nad iya dayaw ne̍ Je̍su Kristu nga Mangisalakan dactida se̍ Diyus tida nga naturay nga unay.

He̍briyu 9:28

Ket agten pe̍ iyan nge̍ Kristu, ta nam-ame̍nsan ngas nga naidatun, ket kustu para iya amin nga timpu to pannakaidatun na. Naidatun ngarud tasun inagtu na nga nipac diya basbasul diya adu nga toltoley. Ket agparang nad manin nge̍ Kristu ka maikadduwa, ngem bekken nin nga maigapu ka basul ya maikadduwa nga umbe̍tan na, no di lugud tasun mailayunin ya panangisalakan na dactida nga sinanama nga agpadpadaan igina.

1 Pe̍dru 1:13

Itu nga pabilgen nu ngarud ya panpanunut nu, se̍ tanangen nu met pe̍ ya panagpanpanunut nu. Ket isnup nu kuma ngas ya panangnamnama nu iya siaayat nga pakaasiyan nu nad no madatngan ya panagparang ne̍ Je̍su Kristu.

1 Pe̍dru 5:4

Ket nad no agparangin ya Kangatuwan nga Agay-aywan, mae̍cdan kayu ka pangpadayaw dakayu nga arig nga balangat nga madi agkupas.

1 Juan 2:28

Ket itan, an-anac ku, silalagip kayu kuma ngarud e̍ Je̍su Kristu, tasun nad no agparang manin, sinanama tida kuma. Ket iya agten iyan, madi tida nad malyew iya imatang na no umbe̍tin.

1 Juan 3:2

Patpatgec nga kakabsat, an-anac nactida ngarud nge̍ Apu Diyusin. Ngem orey an-anac nactidan, bekken pekkem nga naipakaemmu dactida no kumaan nad niya pagbanagan nidi nga kasasaad tida. Ngem emmu tida nga no agparang nad manin nge̍ Kristu idi nga lubung, agbalin tida met nga agten igina. Ta no masingen tida, nalawag nad dactidan ya kinapudnu maipanggep igina.

1 Juan 5:12

Ya naitipun iya Anac, uwed met igina yan nga biyagin. Ngem ya madi naitipun iya Anac ne̍ Apu Diyus, awan met igina yan nga biyag.

Hudas 1:24

Ket itan, laglagipen tida kuma nga pe̍yeng nge̍ Apu Diyus. Igina met ya uwed kabaellan na nga mangaywan dakayu tasun madi kayu maiturung ka pakabasulan. Se̍ igina pe̍ ya uwed kabaellan na nga mangidateng dakayu nad nga sidadalusin se̍ siraragsac kin iya sangu na, nga itu ya edyan nga pakasingnan iya kinadayaw na.

Paltiing 2:7

“Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, e̍cdac da nad ka kalinteggan da nga mangan ka bisic niya kayu nga pagbiyagan nga uwed iya minuyungan ne̍ Apu Diyus.’”

Paltiing 22:1

Ket itun, uwed manin nipasingen nito anghe̍l iyaken, nga wangag nga uwed danum na nga mange̍cde̍ ka agnanayun nga biyag. Ket nakalitlitaw to danum na, nga agten met iya kristal nga masarang. Ket to ayus na, timaud ito trunu nga pagtugawan ne̍ Apu Diyus se̍ ya Urbun Karne̍ru.

Paltiing 22:14

Nagasat ngarud diya mangpadalus iya sutana da, tasun mae̍cdan da ka kalinteggan nga mangan iya bisic nito kayu nga pagbiyagan enna siyudad, se̍ tasun mapalubusan da nga lumnec kadito ruwangan nito bakud nga umuneg ito siyudad.