Kulusas 2:8 - Ya Baru nga Tulag8 Agannad kayu ngarud, ta kaynun no macna kayu iya panagpilusupu diya mangallilaw kuma dakayu kadiya busid nga sursuru nga awan sirsirbi na. Bekken nga gayat e̍ Kristu ya sursuru da, no di lugud patauden da ngas kadiya ug-ugali toley, sigun mettas kadiya sursuru nga tumaud das idi nga lubung. Faic an caibideil |
Ket uwed da pe̍ antuni diya manursuru nga pasurut niya panursuru E̍pikuryu se̍ Istuwiku, ket nakidiskutir da e̍ Pablu. Ket kinunen da pe̍, “Eppes ngas met ya kagkagiyen niya agbuwabuwakaw nga idi,” kunen da. Ket dito duduma, kinunen da, “Maipanggep kadiya sabsabali nga didiyusen kid ya kagkagiyen niyan,” kunen da, ta nikasaba ne̍ Pablu ya Makaparagsac nga Damag maipanggep e̍ Je̍sus, se̍ ya panagungar na.
Agten kayu ngarud iyan itun nga timpu, ta diya dake̍c nga gangey diya toley nga madi mamati e̍ Apu Diyus idi nga lubung, ket itu met diya winangwangel nu itun. Ta nagtungtungpal kayu itun iya agturay nga uwed pannakabalin na iya abac lawa. Itu met ya pannakabalin nga mangiturturay ita kadiya agsucsukir e̍ Apu Diyus.
Itu nga madi kayu lugud paiturayan kadiya mangallilaw dakayu, orey nagan na nga toley nga mangipapilit kuma dakayu iya ugali da. Ipapilit da ya ugali da nga mangiparit iya beggi kadiya kalinteggan toley. Se̍ ipapilit pe̍ diya agten iyan nga toley ya ugali da nga agdaydayaw kadiya anghe̍le̍s. Ta diya mangisursuru iya agten kadiyan, mayat da nga mangipaspasindayaw kadiya ipakaemmu kanu diya nailangitan igida. Ngem awan met banag nga tutu niya panangipaspasindayaw da, ta timaud das met kadiya nailubungan nga panpanunut da.
Ket gapu ta naibilang kayu nga kabulun ne̍ Kristu ito pannakatey na, nawayawayaan kayun kadiya sursuru nga agtaud das idi nga lubung. No agten iyan, ape̍ ngarud nga tultuladen nu pekkem diya ug-ugali nga nagtaud das idi nga lubung? Ape̍ agtungtungpal kayu pekkem kadiya bilbilin diya agten kadiyan nga ug-ugali maipanggep kadiya maiparit kanu dakayu?
Pakasikapan tida ngarud diyan nga tungtungpalen, ta arig da nga tutu nga tumaud ka nabaru nga kinasirib. Ta diyan nga tungtungpalen, maipanggep iya sigagaed nga panagdayaw kadiya nailangitan, se̍ maipanggep iya pananglikud kadiya kalinteggan tida, se̍ maipanggep pe̍ iya panangipaidam kadiya kasapulan niya beggi. Ngem diya agten kadiyan, awan met pateg da, ta awan itulung da nga mangtimbeng kadiya dake̍c nga ricna niya beggi.
Dikad pe̍ madi kayu kuma maallilaw kadiya nadumaduma nga panursuru nga sabali. Ta ya siaayat nga panangaasi ne̍ Apu Diyus kuma ngas ya mangpabileg dactida, nga bekken lugud nga diya al-alagaden maipanggep kadiya macmakan. Ta no dito nagtungtungpal kadiyan nga al-alagaden, awan met tulung nga nae̍cde̍ igida gapu kadiyan nga tungtungpalen da.
Dikad pe̍ dakayu nga patpatgec, gapu ta naemmuwan nu diyanin maipanggep kadito mangisursuru ka busid, agannad kayu ngarudin. Ta kaynun no masulisug kayu met pe̍ nga sumurut iya irradu diya toley nga madi agtungpal e̍ Apu Diyus. Ket no maiyaw-awan kayu kadiyan, maisina kayu ngarudin iya pagnamnamaan nun.