Kulusas 2:6 - Ya Baru nga Tulag

⁶ Ket gapu ta makiapu kayu e̍ Kristu Je̍susin, makitipun kayu kuma ngarud pe̍ igina iya panagbiyag nun.

Kulusas 2:6 Iomraidhean Croise

Matyu 10:40

“Ket ya mangrispitar dakayu, maibilang nga iyaken mettas ya rispitaren na. Ket iya agten iyan, ya mangrispitar iyaken, rispitaren na met pe̍ ya nangibon iyaken.

Juan 13:20

“Pudnu met yani nga ibagac dakayu: Ya umawat iya ibon ku, maibilang nga iyaken mettas ya awaten na. Ket iya agten iyan, ya umawat iyaken, awaten na met pe̍ ya nangibon iyaken,” kunen na.

Juan 14:6

Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken.

1 Kurintu 1:30

Ta e̍ Apu Diyus mettas ya nangpaitipun dactida e̍ Kristu Je̍sus, nga igina ya pinagbalin ne̍ Apu Diyus nga pagtaudan niya sirib tida, se̍ ya pannakapalinteg tida iya imatang na, se̍ ya pannakaisaad tida nga toley na, se̍ ya pannakawayawaya tida kadiya basbasul tidan.

2 Kurintu 5:7

Ta ita, panamati ngas met maipanggep iya pannakaitipun tida nad igina ya pagnamnamaan mi iya panagbiyag mi, ta madi tida pekkem masingen.

Galasiya 2:20

Ngarud, naibilang ngac nga natey yin gapu ta nairaman nac ito pannakailansa ne̍ Kristu ito krus na. Ngem orey naibilang ngac nga nairaman ito pannakatey ne̍ Kristu, sibibiyag gac pekkem. Ngem bekken nga ya gangey niya kinatoley ku ya mangituray iyaken nin, no di lugud ya gangey ne̍ Kristu win, ta uwed met iyaken nge̍ Kristu win. Ket idi nga panagbiyag ku ita, ipaay ku was iya Anac ne̍ Apu Diyus, gapu ta igina met ya patpatiyec, nga igina ya nangipateg iyaken, se̍ ya nangipalubus iya pannakaidatun niya beggi na para iyaken.

Galasiya 3:26

Ta gapu iya panamati nu, nagbalin kayu nga amin nga an-anac ne̍ Apu Diyusin, gapu iya pannakaitipun nu e̍ Kristu Je̍sus.

E̍pe̍su 4:1

Ket itan, iyaken, uwed dac iya pagbaludan nga idi gapu iya panagsirbic iya Apu. Ket sipapasnekkac nga mangbagbaga dakayu nga maitutup kuma ya ugali niya panagbiyag nu iya kinadayaw niya saad nu nga nangpiliyan ne̍ Apu Diyus dakayu.

Pilipus 1:27

Ket kangrunaan, itunus nu kuma ya panagbiyag nu iya Makaparagsac nga Damag maipanggep e̍ Kristu. Agten iyan kayu kuma tasun orey no awan nac pekkem iya edyan nu, winno no makadateng ngac nad nga sumacwar dakayun, ket madamag ku kuma nga nabaked ya panagbubulun nu gapu iya is-isa nga panpanunut nu, nga is-isa ya panggep nu iya panagtungpal nu iya rebbeng nu iya pammati tida nga maigapu iya Makaparagsac nga Damag.

Kulusas 1:10

Ket agten iyan ngarud ya ikarkararag mi, ta gabay mi no agbiyag kayu kuma nga tumutup iya Apu. Ta diyan nas makaay-ayu igina ya pe̍yeng nu nga wangwanglen kuma, ta agbanag kuma ka nabaru diya amin nga nadumaduma nga wangwanglen nu, se̍ umad-adu kuma pe̍ ya pannakaemmu nu maipanggep iya gangey ne̍ Apu Diyus.

Kulusas 3:17

Ngarud, sipapati kayu kuma ngas e̍ Apu Je̍sus iya orey nagan na nga ar-arimanen nu, orey kadiya kagkagiyen winno wangwanglen nu. Ket sigun iya kinaturay ne̍ Apu Je̍sus, agyaman kayu kuma ngarud e̍ Apu Diyus nga Ama.

1 Te̍salunika 4:1

Ket itan, kakabsat, uwed pekkem ibaga mi kuma dakayu. Nisuru mi dakayu itun ya panagbiyag nga makaay-ayu e̍ Apu Diyus. Agten iyan kuma pe̍ ya panagbiyag nu, ta itu ya ipalagip se̍ ibilin mi nga sipapasnec dakayu gapu e̍ Apu Je̍sus. Ket emmu mi met nga makaay-ayu ngarudin ya panagbiyag nu e̍ Apu Diyus, ngem laclaingen nu pekkem kuma.

He̍briyu 3:14

Ta siguradu nga nagbalin tidan nga kabulun ne̍ Kristu no ituluy tida nga sipupudnu ya sigud nga panagtalec tida igina nga sipapasnec, agingga iya panungpalan.

1 Juan 2:6

Ya agkunen nga, “Laglagipec nge̍ Apu Diyus,” kunen na, ket masapul nga tuladen na met ya nalinteg nga ugali ne̍ Apu Je̍sus.

1 Juan 5:20

Ket emmu tida pe̍ nga inumbe̍tin ya Anac ne̍ Apu Diyus, ket ne̍cdan nactida ka pannakaawat tasun maemmuwan tida ya pudnu nga Diyus. Ket naitipun tidan iya pudnu nga Diyus, ta naitipun tida mettin iya Anac na nga Je̍su Kristu. Igina met ya pudnu nga Diyus se̍ paggayatan niya agnanayun nga biyag.

Hudas 1:3

Dakayu nga patpatgec, napalaus ya panggep ku itun nga agsurat dakayu maipanggep iya is-isa nga lak-amen tida nga pannakaisalakan. Ngem ita, emmuc nga masapul nga sabali lugud ya isurat ku dakayun. Ta maricnac nga masapul nga agsurat tac dakayu, tasun ibagbagac nga sipapasnec dakayu nga ikalinteggan nu kuma ya panursuru niya pammati tida, nga itu ya nitalec ne̍ Apu Diyus dactida nga toley na. Nitalec na yani nga panursuru dactida nga nam-ame̍nsan nas itun, ket awan met panagbaliw na.