Kulusas 2:12 - Ya Baru nga Tulag

¹² Ket itu ngarud ya kaipapennan niya panagbautisar nu, ta naibilang kayu nga kabulun ne̍ Kristu ito pannakaitamen na. Ket pakaiyarigan na pe̍ ya pannakaibulun nu ito pannakapaungar na, gapu mettas iya panamati nu ito inariman ne̍ Apu Diyus, ta igina met ya nangpaungar e̍ Kristu.

Kulusas 2:12 Iomraidhean Croise

Lukas 17:5

Ket kinunen dito apustule̍s iya Apu, “Pabilgem kuma ngarud ya panamati mi,” kunen da.

Aramid 14:27

Ket ito nakadateng de̍ Pablu ka Antiyakiya ngin, pinagurnung da ya bungguy mamati, nga nisalaysay da igida dito amin nga nipawangel ne̍ Apu Diyus igida, se̍ to gundaway nga mamati diya bekken nga Hudyu.

Aramid 2:24

Ngem pinagungar met ne̍ Apu Diyus nge̍ Je̍sus, nga winayawayaan nan iya pannakabalin niya patey, ta madi ngarud mabalin nga abaken niya patey nge̍ Je̍sus.

Aramid 2:32

Maipanggep ngarud e̍ Je̍sus mettas dito kinagi nito Ari Dabid itun. Ket amin mi, masacsiyan mi nga pinagungar ngarud ne̍ Apu Diyus nge̍ Je̍sus.

Ruma 4:24

Ta naisurat nga agpaay met pe̍ dactida, ata maibilang tida met pe̍ nga nalinteg no mamati tida e̍ Apu Diyus, nga igina ngarud ya nangpaungar e̍ Je̍sus nga Apu tida.

Ruma 7:4

Kakabsat ku, agten kayu met iyan nga pangngarig, ta awan turay niya Linteg nito Muyse̍s dakayun, gapu ta naibilang kayun nga natey yin. Ta ito nailansa ya beggi ne̍ Kristu ito krus, arig nga nairaman kayu nga natey pe̍ yin, no maipanggep iya turay niya Linteg dakayu. Dikad pe̍ nawayawayaan kayu nga makitipun iya sabali yin, nga itu nge̍ Kristu nga natey se̍ napagungar met itun. Agten iyan ngarud ya kasasaad tidan, tasun uwed kuma nabaru nga pagbanagan niya panagbiyag tidan nga agpaay e̍ Apu Diyus.

1 Kurintu 12:13

Ta amin tida, Hudyu man winno bekken nga Hudyu, tagabu man winno bekken, ket agpapada tida nga nabautisaran nga nakikamkameng e̍ Kristu, gapu mettas iya is-isa nga Ispiritu Santu. Se̍ is-isa yani nga Ispiritu nga nae̍cde̍ dactida, nga arig nga is-isa ya naipainum dactida.

1 Kurintu 15:20

Ngem ya kinapudnu na, napagungar nga tutu nge̍ Kristu win. Ket to pannakapagungar na, maiyarig iya kaonaan nga nagani, ta igina ya pakaemmuwan tidan nga mapagungar ngarud met pe̍ diya duduma nga natey yin.

Galasiya 3:27

Ta dakayu nga nabautisaranin gapu iya pannakitipun nu e̍ Kristu, nipada nu ya gangey nu iya gangey ne̍ Kristu win.

E̍pe̍su 2:8

Ta gapu was iya siaayat nga asi ne̍ Apu Diyus, ket naisalakan kayu ngarud gapu iya panamati nu. Ket ya pannakaisalakan nu, bekken ngarud nga gapu iya bukud nu nga winangel, no di lugud gapu ta nikaasi ne̍ Apu Diyus dakayu.

E̍pe̍su 3:17

Ket se̍ adngec pe̍ nga e̍ Kristu kuma ya pe̍yeng nga mangiturturay kadiya nakem nu gapu iya panamati nu, tasun gapu iya panagiinnayat nu, agbalin nga nauneg se̍ nabaked kuma ya panagnamnama nu.

E̍pe̍su 3:7

Ket no iyaken, gapu iya siaayat nga asi ne̍ Apu Diyus, nagbalin nac nga agsirsirbi nga mangikaskasaba idi nga Makaparagsac nga Damag. Ta itu to saad nga ne̍cde̍ ne̍ Apu Diyus iyaken sigun iya inariman na iyaken gapu iya pannakabalin na.

E̍pe̍su 4:5

Is-isa ngarud ya Apu tida, is-isa ya pammati tida, se̍ is-isa pe̍ ya pakabautisaran tida.

E̍pe̍su 5:14

Itu ya kayat nga kagiyen nito pagkakagi nga kunen na, “Malukag kan, ikew nga docyep! Agungar kan iya pakatayam! Ket iya agten iyan, e̍ Kristu met ya mangwada ikew win,” kunen na.

Pilipus 1:29

Agten iyan ngarud, ta no dakayu, naikaasi met dakayu yan nga gundaway nu nga maigapu e̍ Kristu. Ket idi nga gundaway nu, bekken nas nga ya panamati nu igina ya panggep na, no di lugud ya panangitured nu pe̍ ka rigat nga maigapu igina.

Kulusas 1:29

Dikad pe̍ gapu iyan nga panggep ku, agbannug gac ngarud, ta ipakat ku ya amin nga bileg nga uwed iyaken gapu iya pannakabalin na nga mangpabileg iyaken.

Kulusas 2:13

Ket dakayu itun, naibilang kayu nga arig ngas nga isa nga natey iya imatang ne̍ Apu Diyus. Ta naisina kayu igina gapu ito panagbasbasul nu, se̍ gapu met pe̍ ta bekken nakayu nga toley nga nakugit itun. Ngem itan, orey dakayu mettas, pinagbiyag nakayun, nga ibilang nakayu itan nga kabulun ne̍ Kristu nga napaungar itun, ta pinakawan ne̍ Apu Diyus amin diya basbasul tidan.

He̍briyu 12:2

Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

He̍briyu 6:2

Se̍ madi tida pe̍ masapul nga adalen manin ya maipanggep kadiya nadumaduma nga al-alagaden maipanggep iya pannakadalus, winno ya panangipatey ka ima iya ulu niya maikararagan, se̍ ya panursuru maipanggep iya panagungar nad diya natey, se̍ ya panursuru maipanggep iya pannakaukum nga agnanayun ya dusa na.

1 Pe̍dru 3:21

Ket ya pannakabautisar nu ita, maiyarig ito danum itun, ta itu pe̍ ya pakaisalakanan nu ita. Ngem bekken nga pakadalusan diya beggi nu ka rugit, no di itu ya panangipasingen nu e̍ Apu Diyus nga natalna ya nakem nun, gapu ito panagungar ne̍ Je̍su Kristu.