Kulusas 2:11 - Ya Baru nga Tulag

¹¹ Ket gapu mettas iya pannakaitipun nu e̍ Kristu win, nagbalin kayu met nga arig nga pudnu nga nakugit nga Hudyu win. Ta orey bekken kayu nga Hudyu, uwed met arig nga pannakakugit nun. Ket bekken nga inariman niya toley yani, ta itu ya pannakaipac diya tarigagay niya sibabasul nga kinatoley nu. Ta gapu iya pannakaitipun nu e̍ Kristu win, madi kayu nga paiturayanin iya panpanunut nga tumaud ngas iya kinatoley nun.

Kulusas 2:11 Iomraidhean Croise

Markus 14:58

“Nagicna mi nga kinunen na nga agten idi: ‘Lasangec nad ya Te̍mplu nga pinatdec toley, ket ka unus tellu nga algew, bangunec ya sabali, nga bekken nga inariman toley,’ kunen na met,” kunen da.

Lukas 2:21

Ket kalpasan walu nga algew, ito algew niya panangpakugit da iya ke̍bit sigun iya ugali diya Hudyu, pinanaganan da ka Je̍sus, nga itu yan to nipanagan nito anghe̍l ito sacbay nito pannakainaw na.

Aramid 17:24

“Idi nga Diyus nga ibagac dakayu, itu ya Diyus nga nangariman iya lubung ngi se̍ diya amin nga uwed idi nga lubung. Ket madi met nga aged-edyan kadiya arimanen diya toley nga pagdaydayawan da, ta igina mettas ya Apu nga mangituray iya amin nga uwed ka langit se̍ amin nga uwed iya lubung.

Aramid 7:48

“Ngem e̍ Apu Diyus nga Kangatuwan, bekken met nga pagdaydayawan nga inariman toley ya tutu nga pagedyanan na. Ta agten ito kinunen nito isa nga mammadtu itun, nga nipaikagi ne̍ Apu Diyus igina nga kinunen na,

Ruma 2:29

Ta ya maibilang nga pudnu nga Hudyu iya imatang ne̍ Apu Diyus, itu ya uwed iya nakem na nga gennung ya pudnu nga kinaHudyu na. Ket ya tutu nga kaipapennan niya pannakakugit, ket maipanggep ngarud iya wanglen niya Ispiritu ne̍ Apu Diyus iya nakem niya toley, bekken nga ya panagtungpal niya toley iya naisurat nga linteg. Ket ya pannakaidayaw niya agten iyan nga toley, gayat met e̍ Apu Diyus, bekken nga gayat ka toley.

Ruma 6:6

Ket nabatad dactidan nga ya sigud nga kinatoley tida, nairaman e̍ Kristu ito pannakailansa na ito krus, tasun mapirdi ya pannakabalin niya gangey tida nga agbasbasul. Ket iya agten iyan, bekken tida kuma ngarud nga paiturayan ka basulin nga arig nga tagabu nactida ya basul.

Ruma 7:24

Kackaasi yac mettin! Ta nagan ngarud ya makaisalakan iyaken iya kinatoley nidi nga beggic nga agbanag ngas ka patey?

2 Kurintu 5:1

Ket madi kami ngarud makumsa kadiya pakarigrigatan mi. Ta emmu mi nga orey no matey tida, se̍ mapirdi didi nga beggi tida, nga arig ngas nga bawi diya biyag tida idi nga lubung, ket emmu mi ngarud nga sukatan nad ne̍ Apu Diyus ka madi matey nga beggi no uwed tida ka langitin. E̍ Apu Diyus mettas ya paggayatan niyan nga agnanayun nga beggi nga maiyarig ka baley nga bekken nga inariman toley.

2 Kurintu 5:17

Ket agten iyan met pe̍ ya panangibilang niya orey nagan na nga toley nga maitipun e̍ Kristu. Ta ya toley nga maitipun e̍ Kristu, maiyarig nga kabarbaru nga parsuwa ngin. Ket nabaliwanin dito daan nga panpanunut na ka kabarbaru nga panpanunutin.

Galasiya 2:20

Ngarud, naibilang ngac nga natey yin gapu ta nairaman nac ito pannakailansa ne̍ Kristu ito krus na. Ngem orey naibilang ngac nga nairaman ito pannakatey ne̍ Kristu, sibibiyag gac pekkem. Ngem bekken nga ya gangey niya kinatoley ku ya mangituray iyaken nin, no di lugud ya gangey ne̍ Kristu win, ta uwed met iyaken nge̍ Kristu win. Ket idi nga panagbiyag ku ita, ipaay ku was iya Anac ne̍ Apu Diyus, gapu ta igina met ya patpatiyec, nga igina ya nangipateg iyaken, se̍ ya nangipalubus iya pannakaidatun niya beggi na para iyaken.

Galasiya 5:24

Ket diya toley nga naikameng e̍ Kristu Je̍sus, ibilang da nga natey yin ya tarigagay niya kinatoley da, nga arig nga nilansa dan ito krus, agraman diya naalas nga ricna da se̍ diya ke̍lugan da.

E̍pe̍su 4:22

Dikad pe̍ ipac nu ngarudin to sigud nga gangey nu, nga itu to tinungtungpal nu ito daan nga panagbibiyag nu itun. Ta dake̍c ngas met diyan nga gangey nu nga mangiyaw-awan dakayu gapu kadiya dake̍c nga ricricna niya beggi nu.

Pilipus 3:3

Igida ngarud ya annadan nu, ta ya kinapudnu na, dactida met diya ibilang ne̍ Apu Diyus nga toley na nga arig nga nakugit. Ta dactida diya agdaydayaw e̍ Apu Diyus gapu iya Ispiritu na nga madi masingen. Ket e̍ Kristu Je̍sus met ya pagnamnamaan tida, nga awan lugud pagtalged tida iya mawangel toley.

Kulusas 3:5

Dikad pe̍ isardeng nu ngarudin diya dake̍c nga tarigagay nga agtaud das iya lubung. Itu ya arig nga patayen nu diya amin nga nailubungan nga ganggangey nun, nga agten iya pannakikamalala, se̍ diya naalas nga panpanunut, se̍ diya nakal-alyew nga tarigagay se̍ ricricna niya beggi, se̍ ya panagagum pe̍. Ta ya aguman toley, ket agbalin nga arig nga diyus da nga daydayawen da.

He̍briyu 9:11

Ket ita, inumbe̍t mettin nge̍ Kristu nga Kangatuwan nga Agsirsirbi nga mangibegbeggi dactida e̍ Apu Diyus. Igina ya agsirsirbi nga mangipaay kadiya nabaru nga banbanag nga nabangunin. Ket ya panagsirsirbi ne̍ Kristu, nabarbaru. Ta bekken nga ya uneg niya isa nga pagdaydayawan nga inariman toley ya pagdaydayawan na. Kayat na nga kagiyen, bekken nga idi nga nakaparsuwaan nga lubung ya pagdaydayawan na, no di lugud nangatngatu. Ket se̍ awan pagkurangan niyan nga imuneggan na nga pagdaydayawan na.

He̍briyu 9:24

Diya namaymayat ngarud ya masapulin, ta e̍ Kristu, bekken nga ya nasantuwan nga pagdaydayawan nga inariman toley to imuneggan na. Ta to nona nga pagdaydayawan, ket ladawan ngas niya kustu nga pagdaydayawan nga uwed ka langit. Ngem e̍ Kristu, imuneg ngarud iya pagdaydayawan ka langit iya imatang mettas ne̍ Apu Diyus. Ket ita, uwed met antuni nin nga mangibegbeggi nga maipaay dactida.