Kulusas 1:9 - Ya Baru nga Tulag

⁹ Itu nga manipud ito nadamag mi ya maipanggep dakayu, ket ikarkararagan dakayu nga pe̍yeng. Ket ikarkararag mi e̍ Apu Diyus nga awan kuma pagkurangan nu iya pannakaemmu nu iya tarigagay ne̍ Apu Diyus maipanggep dakayu. Ta ikarkararag mi nga mangpasirib kuma ya Ispiritu ne̍ Apu Diyus dakayu, tasun kustu kuma ya pannakaemmu se̍ pannakaawat nu kadiya amin nga banbanag.

Kulusas 1:9 Iomraidhean Croise

Juan 7:17

Ket ya toley nga mayat nga agwangel iya tarigagay ne̍ Apu Diyus, mailasin na met no tutu nga agtaud e̍ Apu Diyus diya isursuruc, winno agkagkagi yac ngas ka kabucbukudac nga turay.

Aramid 12:5

Ket iya agten iyan, uwed nge̍ Pe̍dru ito pagbaludan. Ket dito kamkameng nito bungguy mamati, nikarkararagan da nga sipapasnec e̍ Apu Diyus.

Ruma 12:2

Ket madi kayu paiturayan kadiya ugali diya bekken nga mamati idi nga lubung, no di lugud pabaruwen nu diya panpanunut nu. Agten iyan kuma ngarud, tasun maemmuwan nu ya tarigagay ne̍ Apu Diyus, nga itu diya banbanag nga napaw-is se̍ makaay-ayu igina, se̍ awan pagkurangan da.

1 Kurintu 1:5

Ta gapu iya pannakaitipun nu e̍ Kristu, nae̍cdan kayu kadiya amin nga masapul nu, nga agten kadiya masapul nu iya panangibaga nu se̍ iya pannakaemmu nu maipanggep iya pammati nu.

E̍pe̍su 1:8

Ket idi nga siaayat nga asi na, nipaay na dactida nga sibubuslun. Ket sigun iya kinasirib se̍ pannakaawat ne̍ Apu Diyus,

E̍pe̍su 5:10

Ket diya banbanag ngas nga makaay-ayu iya Apu kuma ya emmuwen nu.

E̍pe̍su 5:17

Itu nga bekken kayu kuma nga agten kadiya awan pannakaawat da, no di lugud agariman kayu kadiya emmu nu nga gabay niya Apu.

E̍pe̍su 6:6

Ket gapu ta naibilang kayu nga agsirsirbi e̍ Kristu win, ket ya tarigagay ne̍ Apu Diyus kuma lugud ya tungtungpalen nu nga sipapasnec kin. Itu nga orey uwed man winno awan toley nga sumingsingen dakayu, nagaget kayu kuma latta. Ta bekken nga ya panangannamung ngas toley ya sapsapulen nu.

Pilipus 1:4

Ket siaanggem mac pe̍ nga pe̍yeng kadiya amin nga panangikarkararag ku para dakayu nga amin.

Kulusas 1:6

Ket idi mettas nga Makaparagsac nga Damag nga naipakaemmu win dakayu, pe̍yeng nga agbanag ka nabaru kadiya amin nga edyan iya lubung. Ket umad-adu met pekkem pe̍ ya paglaingan na kadiya mamati, agten pe̍ dakayu, nanipud ito damu nga nagicna nu se̍ naawatan nu ya kinapudnu maipanggep iya siaayat nga asi ne̍ Apu Diyus.

Kulusas 3:16

Ket diya sursuru nga nagtaud e̍ Kristu, itu kuma ya pe̍yeng nu nga laglagipen iya panagsisinnuru se̍ panagbibinnalakad nu maikanatad iya sirib nga e̍cde̍ ne̍ Apu Diyus. Ket iya agten iyan pe̍, agkankanta kayu kuma, nga agiiyaman kayu kuma nga siaayat e̍ Apu Diyus. Ta agkankanta kayu ngarud kadiya dandaniw nga uwed ayug da, se̍ kadiya kankanta nga pagdayaw e̍ Apu Diyus, se̍ iyayug nu kuma pe̍ diya duduma nga panagdayaw nu.

Kulusas 4:12

Ket e̍ E̍papras met pe̍, nga isa mettas dakayu, nga isa nga agsirsirbi e̍ Kristu Je̍sus, ket makikumusta kanu pe̍ dakayu. Ket pe̍yeng nga sipapasnec nga mangikarkararag dakayu e̍ Apu Diyus. Ta gabay na met no nabaked kuma ya panamati nu, se̍ awan nga pulus duwaduwa nu maipanggep iya orey nagan na nga tarigagayan ne̍ Apu Diyus dakayu.

Kulusas 4:5

Ket no maipanggep iya panagbiyag nu iya imatang diya madi pekkem mamati, ket nasirib kayu kuma, nga usaren nu ngarud ka nabaru diya amin nga gundaway nu igida.

1 Te̍salunika 1:3

Ta iya imatang ne̍ Apu Diyus nga Diyus se̍ Ama tida, pe̍yeng nga laglagipen mi diya nabaru nga wangwanglen nu gapu iya panamati nu, se̍ ya kinagaget nu gapu iya panagayat nu se̍ ya kinabaked niya namnama nu iya Apu tida nga Je̍su Kristu.

1 Te̍salunika 5:17

Se̍ sikakararag kayu pe̍ nga pe̍yeng.

2 Te̍salunika 1:11

Ket itu nga ikarkararagan dakayu ngarud nga pe̍yeng, tasun pagbalinen nakayu kuma nge̍ Apu Diyus nga maikari iya nisagana na nga saad nga ne̍cde̍ na dakayu. Ket ikararag mi pe̍ nga gapu iya pannakabalin na, tulungan nakayu kuma kadiya amin nga nabaru nga pamaay nu se̍ diya gabay nu nga wanglen maigapu iya panamati nu.

Pilimun 1:4

Pe̍yeng nga agyaman nac iya Diyus ku maipanggep ikew, Pilimun, ket no agkararag gac, laglagipen naka.

Pilimun 1:6

Ket ikarkararag ku nga gapu iya pannakitipun mu kadiya padam nga uwed pe̍ panamati da, adu kuma ya napaw-is nga pagbanagan niya panamatim, tasun maawatam kuma nga nalaing maipanggep kadiya amin nga paglaingan nga e̍cde̍ ne̍ Kristu dactida gapu iya pannakitipun tida igina.

He̍briyu 10:36

Masapul nu ngarud ya agten iyan nga panaganus, tasun nad no naariman nun ya tartarigagayan ne̍ Apu Diyus, ket maalac nu ngarudin to nikari na.

He̍briyu 13:21

Ngarud, e̍ Apu Diyus met ya pagkararagac maipanggep dakayu, ket ikararag ku nga ipaay na kuma dakayu diya amin nga nabaru nga masapul nu, tasun makatungpal kayu kuma iya tarigagay na. Ket sapay kuma ta e̍ Apu Diyus, ipawangel na dactida diya makaay-ayu mettas igina, gapu iya tulung ne̍ Je̍su Kristu dactida. Ket madaydayaw kuma ngarud nge̍ Je̍su Kristu ka agnanayun nga awan patingga na. Agten iyan kuma ngarudin.

Santiyagu 1:5

Ket no uwed dakayu ya agkurang ka kinasirib na maipanggep kadidi, ikararag na kuma nga adngen e̍ Apu Diyus, ket suruwan ngarud ne̍ Apu Diyus. Ta manage̍cde̍ nge̍ Apu Diyus kadiya amin nga toley, se̍ madi na paalyewwen diya agadeng igina.

Santiyagu 3:17

Ngem ya kinasirib nga agtaud e̍ Apu Diyus nga uwed ka langit, itu ya kinasirib nga pagtaudan diya agten kadidi: ya napudnu nga banbanag, nga itu ya kangrunaan, se̍ ya panagtutunus, panagtanang se̍ panagtuluc. Ket itu pe̍ ya pagtaudan niya panangaasi se̍ ya panagwangel ka nabaru, nga awan panangiduma winno panaginpupudnu na.

1 Pe̍dru 2:15

Ta ya tarigagayan ne̍ Apu Diyus, ket idi: Gapu iya panangtungpal nu kadiya nabaru nga banbanag, awan mettin makunen diya agdarusudus nga toley nga mangpadake̍c maipanggep kadiya di da maawatan nga banbanag.

1 Pe̍dru 4:2

Ket no agten iyan, bekken nin nga diya dake̍c nga tarigagay niya kinatoley na ya tungtungpalen nan iya panagbibiyag na pekkem idi nga lubung, no di diyan nas gabay ne̍ Apu Diyus ya pe̍yeng na nga tungtungpalen nin.

1 Juan 2:17

Ket diya agten kadiyan nga ugali nga makaawis dakayu, agpatingga da ngas met, ta mapucpukaw mettin ya amin nga uwed iya lubung ngi. Ngem ya toley nga agtungpal iya tarigagay ne̍ Apu Diyus nga gennung, ket agnanayun met.

1 Juan 5:20

Ket emmu tida pe̍ nga inumbe̍tin ya Anac ne̍ Apu Diyus, ket ne̍cdan nactida ka pannakaawat tasun maemmuwan tida ya pudnu nga Diyus. Ket naitipun tidan iya pudnu nga Diyus, ta naitipun tida mettin iya Anac na nga Je̍su Kristu. Igina met ya pudnu nga Diyus se̍ paggayatan niya agnanayun nga biyag.