Kulusas 1:12 - Ya Baru nga Tulag

¹² Ta ikarkararag mi nga siaanggem kayu kuma nga agyaman iya Ama, nga igina met ya namagbalin dactida nga maikari nga mairaman iya pannakagun-ud diya toley na nga uwed iya wada.

Kulusas 1:12 Iomraidhean Croise

Matyu 25:34

“Ket kunen nad niya Ari kadiya uwed iya madiwanan na, ‘Umbe̍t kayun, dakayu nga pinagasatan niya Amac! Makipagtawid kayu ngarudin iya pannakairaman nu iya pagiturayan, nga itu ya tawid nu nga naisagana para dakayu manipud ito pannakaparsuwa niya lubung.

Juan 14:6

Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken.

Juan 20:17

Ket kinunen ne̍ Je̍sus igina, “Madi nac icman nga igapus a, ta madic pekkem simoli iya Ama. Mawe̍ ka ngas ipadamag kadiya kakabsat ku, nga sumoli yac kun iya Amac, nga itu pe̍ ya Ama nu, se̍ ya Diyus ku nga Diyus nu met pe̍,” kunen na.

Juan 4:23

Ngem nad mettas, winno orey ita, madatngan ya timpu nga ya kustu nga panagdayaw iya Ama, itu ya maariman iya lemlemmet toley nga maikanatad iya napudnu nga gangey ne̍ Apu Diyus. Ta agten iyan ya gabay niya Ama nga panagdayaw igina.

Aramid 20:32

“Ket ita, ipaaywan nakayu e̍ Apu Diyus, se̍ iya siaayat nga asi na nga nikari na dactida. Ta itu ya makapabileg iya panamati tida se̍ ya makae̍cde̍ iya tawid nga nikari na kadiya amin nga toley na.

Aramid 26:18

Ibon naka ngarud igida, tasun malasin dac gapu iya ibagam igida, tasun pe̍yeng nga e̍ Apu Diyus ya mangituray igidan, nga bekken nga e̍ Satanasin, se̍ tasun wada ya suruten dan, nga bekken nga ya gicbet tin. Ket iya agten iyan, mapakawan diya basbasul dan, gapu iya panamati da iyaken, se̍ maidga dan kadiya maibilang nga toley ne̍ Apu Diyus,’ kunen na iyaken.

Ruma 11:17

Ket diya Hudyu, maiyarig da iya isa nga naimula nga kayu ulibu nga naseple̍ng diya duduma nga sanga na. Ket dakayu nga bekken nga Hudyu, arig kayu met nga sanga niya isa nga atap nga kayu ulibu. Ket arig nga naisilpu kayu iya nakaseple̍ngan nito sanga nito naimula nga ulibu, tasun mairaman kayu pe̍ iya totec dito gamgamut na, nga itu ya mangpabileg iyan nga kayu.

Ruma 15:27

Igida mettas ya akin-nakem nga tumulung kadiya Hudyu ka He̍rusale̍m. Ket ya kinapudnu na, uwed ngarud arig nga utang da kadiya mamati nga Hudyu. Ta diya bekken nga Hudyu, nairaman dan kadiya nabaru nga banbanag nga nipaay ne̍ Apu Diyus kadiya Hudyu. Itu nga rebbeng ngarud met diya bekken nga Hudyu ya tumulung kadiya Hudyu kadiya kasapulan niya panagbiyag da.

Ruma 8:17

Ket gapu ta anac nactidan, agtawid tida nad met pe̍ yin. Ngarud, agtawid tida nad e̍ Apu Diyus, nga makipagtawid tida e̍ Kristu. Ket agten iyan ngarud, ta no tutu nga makipagrigat tida e̍ Kristu, mairaman tida nad met pe̍ iya pannakapadayaw na.

Ruma 9:23

Ket inanusan na ngarud nga siaasi dito toley, tasun maipakaemmu na ya nakaskasdaaw nga kinadayaw na. Ket diya kaasiyan na, itu pe̍ diya iraman na nad iya pannakapadayaw na, ta sigud nga panggep ne̍ Apu Diyus itun pekkem nga didi diya mapadayawan.

1 Kurintu 8:6

Ngem no dactida nga mamati, is-isa ngas ya ibilang tida nga Diyus tida, nga itu nge̍ Apu Diyus nga Ama, nga igina ya pagtaudan niya amin, se̍ igina pe̍ ya pagpaayan tida. Ket is-isa pe̍ ya ibilang tida nga Apu tida, nga itu nge̍ Je̍su Kristu, nga igina ya paggayatan niya amin, se̍ igina met pe̍ ya gapu niya kinauwed niya biyag tida.

1 Kurintu 9:23

Ket agten iyan ngarud ya wanglec kadiya amin nga pangawis ku, gapu ta tarigagayac nga maiwarwaragawag kuma ya Makaparagsac nga Damag, tasun maibulun nac kuma kadiya duduma nga toltoley nga aglak-am iya makaparagsac nga pagbanagan niyan nga damag.

2 Kurintu 11:14

Ngem bekken tida kuma nga masdaaw iya agten iyan nga gangey da. Ta orey e̍ Satanas, emmu na met nga pagbaliwen ya langa na tasun makapagparang nga arig nga isa nga anghe̍l nga mangipawada iya kinapudnu.

2 Kurintu 5:5

Ket e̍ Apu Diyus met ya nangisagana dactida para iyan nga maariman nad mettas. Ket ne̍cde̍ na pe̍ ya Ispiritu na dactida, nga itu ya mangpatalged nga maipaay nad nga tutu dactida diyan.

E̍pe̍su 1:11

Ket e̍ Apu Diyus, matungpal na ngarud diya amin nga panggep na sigun iya pangngeddeng na. Itu nga no dactida, gapu iya pannakaitipun tida e̍ Kristu, pinili nactida nge̍ Apu Diyus, nga agtawid igina. Ta nikeddeng na nga agbalin tida nga toley na, sigun iya panggep na itun pekkem.

E̍pe̍su 1:18

Ngarud, ikarkararag ku nga ipakaawat kuma ne̍ Apu Diyus kadiya panpanunut nu, tasun maawatan nu kuma ya banag niya namnama nga uwed dakayu sigun ito panangpili na dakayu. Ket itu ya nipatawid ne̍ Apu Diyus kadiya toley na, ket idi nga tawid, nakaskasdaaw ya pammadayaw na.

E̍pe̍su 2:18

Ta gapu e̍ Kristu, mabalin tida nga amin ya umadenni yin e̍ Apu Diyus nga Ama, Hudyu man winno bekken nga Hudyu, gapu mettas iya is-isa nga Ispiritu.

E̍pe̍su 3:6

Ket ya panggep na nga nipakaemmu nan, ket agten idi: Gapu iya Makaparagsac nga Damag, uwed dakayu nga bekken nga Hudyu ya gundawayin nga makipagtawid kadiya ipatawid ne̍ Apu Diyus kadiya Hudyu. Naibilang kayu pe̍ yin nga kamkameng niyan nga is-isa nga bungguy, se̍ nairaman kayu pe̍ yin iya pagbanagan nito nikari ne̍ Apu Diyus kadiya Hudyu. Kuwa nu ngarud pe̍ diyanin gapu iya pannakaitipun nu e̍ Kristu Je̍sus.

E̍pe̍su 4:6

Ket se̍ is-isa met ya Diyus nga Ama tida nga amin. Igina met ya kangatuwan iya amin, ket igina ya gapu niya amin, ket igina met ya uwed kadiya amin.

E̍pe̍su 5:11

Ket madi kayu makipagkanunung kadito wangwanglen dito agtungtungpal kadiya nagicbet nga panpanunut da. Awan met patauden da nga nabaru. Madi kayu ngarud makipagkanunung kadiya agten iyan nga kinadake̍c, no di lugud ipakaemmu nu kuma ya kinadake̍c da.

E̍pe̍su 5:20

ta siiiyaman kayu kuma nga pe̍yeng e̍ Apu Diyus nga Ama tida. Ngarud, agyaman kayu gapu kadiya orey nagan na, nga sitatalged kayu gapu iya Apu tida nga Je̍su Kristu.

E̍pe̍su 5:4

Ket madi met pe̍ tumutup nga agibalikas tida kadiya naalas se̍ ya panagkagi nga awan mamaay na, winno ya napalaus nga parparatu, no di lugud mapadayawan kuma nge̍ Apu Diyus gapu iya panagyaman nga ibalbalikas tida.

E̍pe̍su 5:8

Ta itun, tutu met nga nagicbet pe̍ ya panpanunut nu nga agten met pe̍ igida. Ngem itan, uwed dakayun ya nawada nga panpanunut, gapu iya pannakaitipun nu iya Apu. Itu nga agtungpal kayu kuma ngarudin kadiya tumutup nga ugali niya isa nga anac niya wada.

Kulusas 2:2

Agten iyan ngarud ya panangipakat ku dakayu, tasun bumileg kuma ya panpanunut nu nga amin, nga agbalin kuma nga is-isa diya panpanunut nu gapu iya panagiinnayat nu, ket se̍ tasun pakaragsakan nu kuma pe̍ ya pannakaawat nu nga awan pagkurangan na maipanggep iya pudnu. Ket iya agten iyan, maemmuwan nu ngarudin ya panggep ne̍ Apu Diyus maipanggep e̍ Kristu, nga madi pekkem naipakaemmu itun.

Kulusas 3:15

Ket ya talna nga tumaud e̍ Kristu, itu kuma ngarud ya ipateg nu nga pamaayen nu. Ta sangkabungguy kayu nga pinili ne̍ Apu Diyus nga pakaipaayan niyan nga talna. Ket siiiyaman kayu kuma ngarud nga pe̍yeng.

Kulusas 3:17

Ngarud, sipapati kayu kuma ngas e̍ Apu Je̍sus iya orey nagan na nga ar-arimanen nu, orey kadiya kagkagiyen winno wangwanglen nu. Ket sigun iya kinaturay ne̍ Apu Je̍sus, agyaman kayu kuma ngarud e̍ Apu Diyus nga Ama.

Titu 2:14

Igina met ya nangipalubus nga naidatun ya biyag na para dactida, tasun subbuten nactida iya turay diya amin nga kita niya kinadake̍c, se̍ tasun pagbalinen nactida nga kuwa na nga toley nga awanan basul, se̍ napasnec iya panagwangel ka nabaru.

He̍briyu 12:23

Nadateng nu ngarudin ya bungguy diya naibilang nga kaonaan nga anac ne̍ Apu Diyus. Ket didi, nailista pe̍ yin diya nagnagan da enna langit. Nakadateng kayu ngarud mettin iya edyan mettas ne̍ Apu Diyus, nga igina met ya mangkeddeng kadiya amin-amin. Se̍ nadateng nu pe̍ yin dito nat-atey nga toley na nga naibilang nga awan pagkurangan dan iya imatang na.

He̍briyu 3:1

Itu nga dakayu nga kakabsat nga pinili ne̍ Apu Diyus nga toley na se̍ kabulun mi nga maipaayan ka nailangitan nga saad, ut-utuben nu kuma ya maipanggep e̍ Je̍sus. Ta igina met ya nibon ne̍ Apu Diyus nga arig nga apustul, se̍ igina pe̍ ya tutu nga Kangatuwan nga Agsirsirbi nga mangibegbeggi iya pammati tida.

He̍briyu 3:14

Ta siguradu nga nagbalin tidan nga kabulun ne̍ Kristu no ituluy tida nga sipupudnu ya sigud nga panagtalec tida igina nga sipapasnec, agingga iya panungpalan.

Santiyagu 3:9

Ya dila tida, itu ya pagdayaw tida e̍ Apu Diyus nga Apu se̍ Ama tida. Ket itu met pe̍ ya mangibalikas ka dake̍c maipanggep kadiya pada tida nga toley nga pinarsuwa mettas ne̍ Apu Diyus nga kalanglanga na.

1 Pe̍dru 5:1

Dikad pe̍, gapu kadiyan nga banbanag, uwed ibagbagac dakayu nga panglakayen diya bungguy diya mamati. Ta iyaken ya isa nga pada nu nga panglakayen, se̍ isa ngac pe̍ nga nakasingen kadito pannakaparparigat ne̍ Kristu. Se̍ iyaken pe̍ ya isa nga maibulun nad igina iya pakaidayawan na nga dandani maipasingen nin.

1 Juan 1:3

Ngarud, nasingen mi se̍ nagicna mi, ket itu win ya ipakaemmu mi dakayun, tasun agpapada tida kuma ka panpanunut nga mibulubulun iya Ama se̍ iya Anac na nga Je̍su Kristu.

Paltiing 21:23

Se̍ madi met masapul ya sinag winno ya bulan nga mangwada ito siyudad, ta ya dayag mettas ne̍ Apu Diyus ya mangwadwada antuni nin. Ket ya Urbun Karne̍ru, igina met ya pagdilag niyan nga siyudad.

Paltiing 22:14

Nagasat ngarud diya mangpadalus iya sutana da, tasun mae̍cdan da ka kalinteggan nga mangan iya bisic nito kayu nga pagbiyagan enna siyudad, se̍ tasun mapalubusan da nga lumnec kadito ruwangan nito bakud nga umuneg ito siyudad.

Paltiing 22:5

Awan ngarud gabi antuni nin, itu nga madi da nad masapul ya darang niya dilag winno ya sinagin. Ta e̍ Apu Diyus mettas ya mangwada nad igidan. Ket agbiyag da nad nga arig nga ari yin nga agturay ka agnanayun nga awan patingga na.