Juan 8:44 - Ya Baru nga Tulag

⁴⁴ Ta an-anac nakayu ngarud nge̍ ama nu, nga itu met ya diyablu. Ket ya tarigagay na, itu ya gabay nu nga tungpalen. Pumatpatey met nga sigud, manipud ito damu. Ket pulus nga di na kanunungan ya pudnu, ta awan pulus kinapudnu igina. Ket kadawyan na ya agbusbusid, ta sigud nga managbusid. Ket bekken nas nga iyan, ta igina met pe̍ ya pagtaudan diya amin nga kinabusid.

Juan 8:44 Iomraidhean Croise

Matyu 12:34

Ape̍? Dakayu, ket arig kayu was nga putputut diya nagita nga malaga! Ta madi kayu met maikagi diya nabaru, gapu ta dake̍c ya uwed iya panpanunut nu! Ngarud, ya uwed iya lemlemmet niya isa nga toley, itu mettas ya maikagi niya musung na.

Matyu 13:15

Ta kimapsut mettin ya pannakaawat didi nga toley, se̍ narigat ya pannakagicna dan, se̍ nagkulinget dan. Ta no bekken nga agten iyan, kaynun no malasin da ya masingen da, se̍ natarus igida ya magicna da, se̍ maawatan da ya panunuten da, ket kaynun no sumoli da iyaken tasun agasac da,’ kunen nito Isayas itun.

Matyu 13:38

To lapug, itu ya lubung ngi. To nabaru nga eggic, itu diya toley nga agpaituray iya nadiyusan nga panangituray. Ket dito dake̍c nga ruut, itu diya toley nga agpaituray iya diyablu nga managdacdake̍c.

Juan 6:70

Ket kinunen ne̍ Je̍sus igida, “Sangapulu ket duwa kayu ngarud nga pinilic. Ngem ya kinapudnu na, sairu met ya isa dakayu,” kunen na.

Juan 7:17

Ket ya toley nga mayat nga agwangel iya tarigagay ne̍ Apu Diyus, mailasin na met no tutu nga agtaud e̍ Apu Diyus diya isursuruc, winno agkagkagi yac ngas ka kabucbukudac nga turay.

Juan 8:38

Ket no iyaken, isuruc ngas maipanggep kadiya nasingec iya edyan niya Amac. Ket dakayu, wanglen nu pe̍ diya nipakaemmu mettas niya ama nu dakayu,” kunen na.

Juan 8:41

Ngem no dakayu, ket tultuladen nu ngarud ya gangey mettas niya ama nu,” kunen na. Ket kinunen da e̍ Je̍sus, “Ay! Kayat mu nga kagiyen aya nga bastardu kami? Is-isa met ya Ama mi, ket itu mettas nge̍ Apu Diyus,” kunen da.

Juan 8:55

Ket dakayu, madi kayu em-emmu ya Amac. Ngem iyaken, em-emmuc met. Ket no kunec nga madic em-emmu, agbusid dac met nga agten dakayu. Ngem em-emmuc met. Ket ya kagi na, itu ngarud ya tungtungpalec.

Aramid 13:10

se̍ kinunen na igina, “Hoy, ikew! Anac naka nge̍ Satanas! Maikuntra ka kadiya amin nga nabaru. Naglaing mu ket lugud nga agbusbusid se̍ mangal-allilaw! Ape̍, ta pacpakilluwem ya nabaru nga kagi niya Apu?

Aramid 24:9

Ket dito kabulun ne̍ Te̍rtulu nga Hudyu, nakipagkaypa da nga nagpabasul igina, nga kinagkagi da nga pudnu kanu dito kinunen ne̍ Te̍rtulu.

Aramid 5:3

Ket kinunen ne̍ Pe̍dru igina, “Ananyas, ape̍ pinalubusam nge̍ Satanas nga mangituray ikew, nga agbusid ka iya Ispiritu Santu win? Ta binatim met ya duduma nga bayad nito ginet mu.

2 Kurintu 11:3

Ngem madanagan nac maipanggep dakayu gapu kadito sabali nga mangaskasaba. Ta kaynun no maallilaw kayu nga agten ito E̍ba itun nga inallilaw nito malaga gapu iya kinasikap na. Ket no mapagten kayu iyan, kaynun no maiyaw-awan kayu iya napasnec se̍ napudnu nga panagsirbi nu e̍ Kristu win.

1 Pe̍dru 5:8

Agtanang kayu se̍ agsalsalukag kayu kuma pe̍. Ta ya kakuntra nu nga diyablu, arig nga di makatalna nga liyun nga ngumerngernger nga agsapsapul ka kanen na.

2 Pe̍dru 2:4

Siguradu nga agten iyan, ta orey diya anghe̍le̍s nga nagbasul itun, madi kinaasiyan ne̍ Apu Diyus da, no di lugud pinapen na da iya pakabaludan da nga nauneg nga lugar. Ket uwed da pekkem antuni nga sibabalud iya nagicbet nga unay nga lugar, agingga iya pannakadusa da nad mettas.

1 Juan 1:8

No kunen tida nga awan basul tida, allilawen tida ya beggi tida, ket madi tida met emmu ya pudnu nga pammati.

1 Juan 2:21

Madic met kunen nga madi kayu pekkem emmu ya pudnu maipanggep iya pammati tida, ta emmu nu ngarudin. Ngem isurat ku yani dakayu gapu ta gabay ku was nga ipalagip dakayu, se̍ gapu ta emmu nu met nga awan busid nga tumaud iya kinapudnu.

1 Juan 2:4

No uwed toley nga agkunen kuma nga, “Em-emmuc kun nge̍ Apu Diyus,” kunen na kuma, ngem madi na tungpalen diya bilbilin ne̍ Apu Diyus, ket agbusbusid met yan nga toley, ket madi na met emmu ya pudnu nga pammati.

1 Juan 3:12

Bekken tida kuma nga agten ito Kain nga kameng niya diyablu nga managdacdake̍c. To Kain, pinatey na met to adi na itun. Ta dito wangwangel nito adi na, ket nalinteg. Ngem dito wangwangel ne̍ Kain nga gennung, dake̍c met. Itu ya gapu na nga pinatey na to adi na.

1 Juan 3:15

Ta orey nagan na nga gumura iya kapada na, maibilang nga pumatey. Ket emmu tida nga diya pumatey, madi da met paiturayan iya turay niya agnanayun nga biyag.

Hudas 1:6

Ket laglagipen nu kuma pe̍ dito anghe̍le̍s nga naglablabes ito turay nga naitalec igida, ta pimanaw da met ito naibilin nga pagedyanan da itun. Ket ya Apu, nibalud na da iya nauneg nga lugar nga nagicbet, ket nakawaran da met pe̍ ennan ka kawar nga agnanayun ya baked na, agingga nga madatngan nad ya pannakaukum iya nakaskasdaaw nga Timpu.

Paltiing 12:9

Ket to dackel nga dragun, naidegsut ngarud manipud ka langitin. Ngarud, igina yan to sinan-malaga itun pekkem, se̍ ya maawagan ka diyablu nga itu nge̍ Satanas. Igina met ya mangal-allilaw kadiya toltoley iya amin nga lubung. Naidegsut ngarud iya ginet tin, ket naidegsut pe̍ yin dito anghe̍le̍s na.

Paltiing 13:14

Ket to maikadduwa nga animal, napalubusan nga agipasingen ka nakaskasdaaw iya imatang nito nona nga animal. Ket gapu kadidi nga nawangel nito maikadduwa nga animal, naallilaw na diya toltoley nga naged-edyan iya lubung. Ta binilin na da nga mangariman da ka bultu nga kalanglanga nito nona nga nakan-ansing nga animal, nga itu to natalingu ka ispada itun, ngem nabiyag latta.

Paltiing 2:10

Ket madi ka latta madanagan iya orey nagan na nga pakaparigatan nga dumateng ikew. Tutu met nga sigiren naka ya diyablu iya di mabayag, ta paibalud na diya duduma dakayu. Agpaut nad ka unus sangapulu nga algew ya pakaparigatam. Ngem puminget ka lugud iya panamatim, orey pe̍ no agingga ka patey, ket balangatan nakayu ka biyag nga agnanayun.

Paltiing 21:8

Ngem dake̍c nad nga gennung ya pagbanagan diya mangiyalyew iyaken, se̍ diya madi mamati iyaken, se̍ diya narugit ya nakem da, se̍ diya pumapatey, se̍ diya makikamalala, se̍ diya makibiyang kadiya sacsairu winno iya panaggamut, se̍ diya agdaydayaw kadiya didiyusen, se̍ diya amin nga managbusid. Ta ya pagbanagan didi, ket maipisuc da nad ngarud ito dackel nga edyan niya gumilgilab nga apuy se̍ burbura nga asupre̍, nga itu ya maikadduwa nga pannakatey,” kunen na.

Paltiing 22:15

Ngem diya malaskig nga gennung ito siyudad, itu diya bekken nga nadalus nga maiyarig ngas ka asu, se̍ diya makibiyang kadiya sacsairu winno iya panaggamut, se̍ diya makikamalala, se̍ diya pumapatey, se̍ diya agdaydayaw kadiya didiyusen se̍ diya mangipalubus ka busid winno diya managbusid pe̍.

Paltiing 9:11

Ket uwed met ari da nga mangituray igida, nga itu ya dake̍c nga anghe̍l nga mangituray ito nakaun-uneg nga ebbut iya ginet. Ket ya nagan nito anghe̍l, Abaddun no kagi He̍briyu, ket Apulyun met ya nagan na ka kagi Griye̍gu, nga kayat na nga kagiyen, “Mangpukaw.”