Juan 6:27 - Ya Baru nga Tulag

²⁷ Ala! Gicnaen nu yani! Bekken kuma nga ya pagbiyag nga mapirdi ngas ya ikarigatan nu nga sapulen, no di lugud ya pagbiyag nga madi maamin, nga itu ya mange̍cde̍ ka agnanayun nga biyag. Ya Anac nga Naipatoley, igina mettas ya mangiyawat dakayu iyan nga pagbiyag. Ta nipasingen nin ne̍ Apu Diyus nga Ama nga uwed igina ya turay na,” kunen na.

Juan 6:27 Iomraidhean Croise

Matyu 17:5

Ket ito madama pekkem nga agkagkagi nge̍ Pe̍dru, uwed met gayam nadarang nga ulep nga nangbugus igida. Ket uwed met pe̍ nagicna da nga timec nga gayat ito ulep, nga kinunen na, “Itu yani ya Anac ku nga dungdungnguwec. Igina ya pakaay-ayuwac. Ipangag nu ngarud ya kagi na!” kunen na.

Matyu 25:46

Ket iya agten iyan, pumanaw nad diyan nga toley nga mawe̍ da iya agnanayun nga pakadusaan da. Ngem diya napalinteg nga toley, mawe̍ da nga gennung iya agnanayun nga pakabiyagan da,” kunen ne̍ Je̍sus.

Matyu 3:17

Ket itun, uwed met timec nga nagicna antuni nga nagtaud ka langit, nga kinunen na, “Itu yani ya Anac ku nga dungdungnguwec. Igina ya pakaay-ayuwac,” kunen na.

Matyu 6:19

“Bekken kuma nga ya kinabacnang idi nga lubung ya punduwen nu. Ta ya kinabacnang idi nga lubung, mapirdi ngas met gapu ka bucbuc se̍ kirang, winno matakew nga takawen diya mangtulisan iya baley.

Matyu 8:20

Ket kinunen ne̍ Je̍sus igina, “Utubem man yani: No diya musang, uwed pagedyanan da nga re̍kab. Ket se̍ diya sibsibud, uwed pe̍ sucbut da. Ngem ya Anac nga Naipatoley, awan met nga gennung pagedyanan na tasun uwed kustu nga pagidaan na,” kunen na.

Markus 1:11

Ket uwed pe̍ timec nga nagicna antuni nga nagtaud ka langit, nga kinunen na, “Ikew ya Anac ku nga dungdungnguwec. Ikew ya pakaay-ayuwac,” kunen na.

Markus 9:7

Ket uwed met ulep itun nga nangbugus igida. Ket uwed met pe̍ nagicna da nga timec nga gayat ito ulep, nga kinunen na, “Itu yani ya Anac ku nga dungdungnguwec. Ipangag nu ngarud ya kagi na!” kunen na.

Lukas 3:22

Ket nagpasegged met igina ya Ispiritu Santu nga sibebeggi, nga umasping ka kalapati. Ket uwed pe̍ nagicna nga timec antuni nga nagtaud ka langit, nga kinunen na, “Ikew ya Anac ku nga dungdungnguwec. Ikew ya pakaay-ayuwac,” kunen na.

Lukas 9:35

Ket uwed pe̍ timec nga timaud ito ulep, nga kinunen na, “Itu yani ya Anac ku nga pinilic. Ipangag nu ngarud ya kagi na!” kunen na.

Juan 10:28

Ket e̍cdac da ngarud iya agnanayun nga biyag, ket madi da mapukaw nga pulus, se̍ awan makaagaw igida iya panangaywan ku.

Juan 11:42

Ket emmuc ngarud nga sigud nga ipangag nac nga kankanayun, ngem kinagic yan gapu ngas kadiya toley nga uwed idi nga aggigicna, tasun patiyen da kuma nga tutu nga ikew ya nangibon iyaken,” kunen na.

Juan 14:6

Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken.

Juan 15:24

Awan kuma ngarud maibilang nga pakabasulan da no madi da kuma nasingen dito inariman ku iya imatang da, nga nakaskasdaaw nga di pekkem naariman toley. Ngem ita, nasingen da mettin, ket dakami nga duwa ya Amac ya gurguraen da.

Juan 17:2

Ta ne̍cdam ya Anac mu ka turay nga mangituray kadiya amin nga toltoley, tasun maipaay na ya biyag nga agnanayun kadiya amin nga nitalec mu igina.

Juan 3:15

Maibayug ngarud, tasun amin nga mamati igina, ket uwed igida ya agnanayun nga biyag,” kunen na.

Juan 3:33

Ngem diya toley nga umawat iya ipakaemmu na, itu diya toley nga mangipakaemmu nga napudnu ya kagi ne̍ Apu Diyus.

Juan 6:40

Ngarud, tarigagay niya Amac nga amin diya makaemmu se̍ mamati iya Anac, mae̍cdan da iya agnanayun nga biyag. Ket pagungarec da nad ngarud iya kaodiyan nga algew win,” kunen na.

Juan 6:47

Pudnu met yani nga kunec: Ya mamati iyaken, uwed iginan ya agnanayun nga biyag.

Juan 6:51

Iyaken mettas ya pagbiyag nga maiyarig ka pakabiyagan nga naggayat ka langit. Ket ya orey nagan na nga toley nga mangan idi nga pagbiyag nga ipaay ku, agbiyag met ka agnanayun. Ket idi nga pagbiyag, itu mettas ya beggic nga iyawat ku nad tasun uwed pakabiyagan diya toltoley idi nga lubung,” kunen ne̍ Je̍sus.

Juan 6:53

Itu nga kinunen ne̍ Je̍sus igida, “Ibagac ya pudnu dakayu: Awan dakayu ya agten iyan nga biyag no madi kayu ngarud mangan iya beggi niya Anac nga Naipatoley se̍ uminum iya daga na.

Juan 6:54

Ta ya mangan iya beggic se̍ uminum iya dagac, uwed iginan ya biyag nga agnanayun. Ket nad iya kaodiyan nga algew, pagungarec ngarud met.

Juan 6:58

“Agten iyan ngarud ya kayat ku nga kagiyen nga pagbiyag nga naggayat ka langit. Bekken nga agten ito pagbiyag nga kinan dito am-ama tida itun. Ta orey nangan da, ket natey da mettas. Ngem ya mangan idi nga pagbiyag nga ibagac, agbiyag met ka agnanayun,” kunen na.

Juan 6:62

Makumsa kayu nad pe̍ aya no masingen nu ya Anac nga Naipatoley nga agpangudu nad nga mawe̍ ito sigud nga edyan na?

Juan 6:68

Ket e̍ Simon Pe̍dru ya nangsungbat nga kinunen na, “Awan met sabali nga gabay mi nga pakitipunan Apu, no di yas ik-ikew. Ta ikew was ya makaibaga iya agnanayun nga pakabiyagan mi.

Juan 8:18

Ket duwa kami met nga mangpanecnec kin, ta iyaken mettas ya isa nga mangipakaemmu iya pudnu maipanggep iya beggic, ket se̍ ya Ama nga nangibon iyaken, igina pe̍ ya isa,” kunen na.

Aramid 10:38

Ket emmu nu met pe̍ nga pinili ne̍ Apu Diyus nge̍ Je̍sus nga iNasare̍t nga nae̍cdan iya Ispiritu Santu se̍ iya pannakabalin na. Ket nagpaspasyar nge̍ Je̍sus nanipud ka Galilya, nga timultulung kadiya toley, se̍ pinalaing na pe̍ diya nasairuwan nga toley, ta uwed met nge̍ Apu Diyus igina.

Aramid 2:22

Ket nituluy ne̍ Pe̍dru to panagpalawag na nga kinunen na, “Kapadpadac nga Israe̍lita, denggen nu kuma ya ibagac. No maipanggep e̍ Je̍sus nga iNasare̍t, nipakaemmu ne̍ Apu Diyus dactida ya nakaibonan na, ta uwed nipasingen na dakayu nga nakaskasdaaw, se̍ milagru se̍ pagilasinan. Ngem emmu nu diyanin, ta nasingen nu met dito nipawangel ne̍ Apu Diyus e̍ Je̍sus itun iya imatang nu mettas.

Ruma 4:11

Ket to pannakakugit nito Abraham, itu ya isa nga pagilasinan nga mangpanecnec nga nibilang ne̍ Apu Diyus nga nalinteg gin, gapu ngas iya panamati na, orey ito di pekkem nakugit itun. Agten iyan ya napasamac tasun to Abraham, agbalin nga maibilang nga ama diya amin nga toltoley nga sumarunu igina nga ibilang ne̍ Apu Diyus nga nalinteg, gapu ngas iya panamati da, orey no bekken da nga nakugit.

Ruma 6:23

Ta ya supapac niya basul, ket patey. Ngem biyag nga agnanayun met nga gennung ya isagut ne̍ Apu Diyus dactida gapu iya pannakaibulun tida e̍ Kristu Je̍sus nga Apu tida.

1 Kurintu 6:13

Tutu met pe̍ ya kunen diya duduma nga diya macmakan, agpaay kanu iya bessug. Se̍ ya bessug, ket para kanu kadiya macmakan. Bo a, ngem pudnu met pe̍ nga pukawen nad mettas ne̍ Apu Diyus diya macmakan se̍ orey diya bessug tida met pe̍. Ket no diya beggi tida, bekken nga nisangrat ne̍ Apu Diyus nga maipaay ka pannakikamalala, no di lugud tasun agpaay kuma iya Apu. Ket ya Apu, agsirbi met pe̍ kadiya beggi tida.

1 Kurintu 9:2

Ket no diya duduma, mabalin nga di dac ibilang nga isa nga apustul. Ngem no dakayu, ibilang dac ngarud nga apustul latta. Ta no maigapu iya Apu, dakayu nga mamati yin ya pakasingnan iya pammanecnec na nga apustul lac nga tutu.

2 Kurintu 4:18

Ta bekken nga diya masingsingen idi nga lubung ya laglagipen mi, no di lugud diya di masingen nga banbanag. Ta diya masingen nga banbanag, ket agpatingga da nad mettas. Ngem diya madi masingen nga banbanag, ket agnanayun da met.

Galasiya 5:6

Ta diya toley nga naitipun e̍ Kristu Je̍sus gapu iya panamati da, bekken met nga ya ugali diya toley nga agpakugit winno ya ugali da nga madi agpakugit ya napateg. Ta ya nasken lugud, itu ya panamati nga mangipasingen ka panagayat.

Pilipus 2:13

Agten iyan kuma ngarud, ta uwed tumulung dakayu, nga itu nge̍ Apu Diyus mettas, tasun maemmuwan nu ya tarigagay na, se̍ tasun mawangel nu diya makaay-ayu igina.

Kulusas 1:29

Dikad pe̍ gapu iyan nga panggep ku, agbannug gac ngarud, ta ipakat ku ya amin nga bileg nga uwed iyaken gapu iya pannakabalin na nga mangpabileg iyaken.

Kulusas 2:22

Awan met mamaay didi nga kankanyew, ta maipanggep ngas kadiya banbanag nga aggibus ngas ya sirbi da, no maamin dan. Ngem ape̍ ngarud nga tungtungpalen nu pekkem diyan? Ta nagtaud da ngas kadiya bilbilin se̍ panursuru toley.

Kulusas 3:2

Ket diya banbanag nga agtaud ka langit, itu kuma ya pe̍yeng nu nga laglagipen nin, nga bekken kuma nga diya agtaud das iya lubung ngi.

1 Te̍salunika 1:3

Ta iya imatang ne̍ Apu Diyus nga Diyus se̍ Ama tida, pe̍yeng nga laglagipen mi diya nabaru nga wangwanglen nu gapu iya panamati nu, se̍ ya kinagaget nu gapu iya panagayat nu se̍ ya kinabaked niya namnama nu iya Apu tida nga Je̍su Kristu.

2 Timutyu 2:19

Ngem ya panursuru nga gayat e̍ Apu Diyus, madi met mariribuc ya pungut na, ta nabaked met. Ket maiyarig nga namarkaan kadidi nga kagi: “Emmu ne̍ Apu Diyus no nagan diya toltoley na.” Se̍ kunen na pe̍, “Amin diya umapu igina, ket masapul nga ipac da diya wangwanglen da nga dake̍c,” kunen na met.

He̍briyu 12:16

Agannad kayu pe̍ tasun awan dakayu ya makikamalala, se̍ tasun awan kuma pe̍ dakayu ya madi mangipateg iya tarigagay ne̍ Apu Diyus, nga agten ito E̍saw itun. Ta to E̍saw, madi na met nipateg to tawid na nga naikari igina itun, nga naipaay igina gapu ta igina ya inauna nga anac. Ta nisukat na met to tawid na ka isa ngas nga pannangan.

He̍briyu 4:11

Dikad pe̍ ikagumaan tida ngarud ya makipaglak-am iyan nga pagtalnaan nga nisagana ne̍ Apu Diyus para dactida. Ikagumaan tida ngarud, tasun awan kuma madi makalak-am iya pagtalnaan na, gapu iya panangkuntra na e̍ Apu Diyus, nga agten mettas kadito sikukuntra nga toley itun pekkem nga madi nakalak-am iyan nga pagtalnaan.

Santiyagu 1:11

Ta no agmatuun ya sinag, macrit diya eddon diya rucruut. Ket diya belbellad da, miterkag dan, ket bekken met nga napaw-isin. Ket agten pe̍ iyan ya bacnang, ta malabes nad pe̍, orey no madama pekkem nga bumacbacnang.

1 Pe̍dru 1:24

Ta agten iya naisurat iya Bibliya nga kunen na, “Amin nga maiyanac ka kinatoley, mabalin nga maiyarig ngas kadiya rucruut. Ket amin nga dayaw toley, maiyarig ngas kadiya bellad rucruut. Ta macrit ngas diya rucruut, ket agterkag ngasin diya bellad da.

2 Pe̍dru 1:17

Ta uwed kami met ito panangipakaemmu ne̍ Apu Diyus nga Ama ito panange̍cde̍ na igina ka dayaw se̍ dayag na. Nae̍cdan ngarud itun, ito nagicna mi to timec mettas ne̍ Apu Diyus nga Katurayan nga Nadayag, nga kinunen na igina, “Itu yani ya Anac ku nga dungdungnguwec. Igina ya pakaay-ayuwac,” kunen na.