Juan 5:26 - Ya Baru nga Tulag

²⁶ Tutu met nga agten iyan, ta ya Ama mettas ya pagtaudan niya biyag, ket itu nga ne̍cde̍ na met pe̍ iya Anac na ya turay nga mange̍cde̍ ka biyag.

Juan 5:26 Iomraidhean Croise

Juan 1:4

Idi nga maawagan ka Kagi, igina ya pagtaudan niya biyag. Ket idi nga biyag, itu ya arig nga mangwada iya lemlemmet diya toley.

Juan 10:18

Awan makapatey iyaken, ngem agdisnudu wac nga mangipalubus iya pannakapatey ku. Ta uwed iyaken ya turay nga mangiyawat iya biyag ku nga mapatey, se̍ uwed met pe̍ iyaken ya turay nga mangpasoli mettas iya biyag ku. Agten iyan ngarud to nibilin niya Amac nga wanglec,” kunen na.

Juan 11:25

Ket kinunen ne̍ Je̍sus igina, “Iyaken mettas ya mangpaungar se̍ mange̍cde̍ ka biyag. Dikad pe̍ ya mamati iyaken, orey no matey, agbiyag nad mettas.

Juan 11:26

Ket diya sibibiyag pekkem nga mamati iyaken, pulus nad nga madi matey ka agnanayunin. Patiyem kad yan nga kunec?” kunen na.

Juan 14:19

Ket iya di mabayag, madi dac masingen nin diya bekken nga mamati. Ngem no dakayu, malasin dac nad lugud. Ket gapu ta sibibiyag gac nad pekkem, sibibiyag kayu met pe̍.

Juan 14:6

Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken.

Juan 4:10

Ket kinunen ne̍ Je̍sus igina, “No emmum kuma ngas ya sagut nga ipaay ne̍ Apu Diyus, se̍ no nagan ku nga agad-adeng ikew ka inumec nga danum, ikew kuma ngin ya umadeng iyaken, ket e̍cdan naka ka makabiyag nga danum,” kunen na.

Juan 6:57

“Agten idi: Ya Ama nga sibibiyag, igina ya nangibon iyaken idi. Ket gapu ta igina ya pagtaudan niya biyag, agbiyag gac met. Ket agten iyan met pe̍ ya toley nga mangan iyaken, ta agbiyag met pe̍ gapu iyaken.

Juan 8:51

Pudnu met yani nga ibagac dakayu: Ya orey nagan na nga mangtungpal kadiya kagic, madi aglak-am ka pannakatey,” kunen na.

Aramid 17:25

Ket idi nga Diyus, madi na pe̍ masapul ya tulung tida nga toley igina, ta awan pulus kasapulan na. Ta igina met ya mange̍cde̍ dactida nga amin nga toley iya anges tida se̍ biyag tida se̍ orey nagan na nga uwed dactida.

1 Kurintu 15:45

Ket ya agten iyan, maikanatad ito naisurat iya Bibliya nga kunen na, “E̍ Adan nga kaonaan nga toley, naparsuwa nga nae̍cdan ka biyag nga kinatoley,” kunen na. Ngem ya maawagan ka nodi nga Adan, igina ya Ispiritu nga mange̍cde̍ ka biyag nga agnanayun.

1 Timutyu 1:17

Sapay kuma ta daydayawen tida nge̍ Apu Diyus nga agnanayun nga Ari tida nga madi matey. Itu ya is-isa nga Diyus ket madi pe̍ masingen toley. Madaydayaw kuma ka agnanayun nga awan patingga na! Agten iyan kuma.

1 Timutyu 6:16

Igina ngas ya awan pannakatey na. Ket igina, aged-edyan met ka wada nga madi maadenniyan niya toley. Pulus nga awan pekkem toley nga nakasingen igina, ket awan pe̍ makasingen igina ita, ta awan makabael. Igina kuma ya madaydayaw nga mannakabalin ka agnanayun. Agten iyan kuma.

He̍briyu 1:2

Ngem ita nga kaodiyan nga timpu win, nipakaemmu nan ya kagi na dactida gapu iya Anac na. Igina met pe̍ ya pinagparsuwa ne̍ Apu Diyus iya amin nga uwed iya lubung, se̍ igina pe̍ ya pinili ne̍ Apu Diyus nga agtawid kadiya amin.

Paltiing 21:6

Ket kinunen na manin iyaken, “Natungpal ngarud diyan nga kagi yin! Iyaken met ya pangrugiyan se̍ ya panggibusan niya amin, ya pagtaudan se̍ ya pagtungpalan niya amin. Ket diya mewwew, painumec da iya danum niya ubbug nga mange̍cde̍ ka biyag, nga awan bayad na.

Paltiing 22:1

Ket itun, uwed manin nipasingen nito anghe̍l iyaken, nga wangag nga uwed danum na nga mange̍cde̍ ka agnanayun nga biyag. Ket nakalitlitaw to danum na, nga agten met iya kristal nga masarang. Ket to ayus na, timaud ito trunu nga pagtugawan ne̍ Apu Diyus se̍ ya Urbun Karne̍ru.

Paltiing 22:17

Ket, “Umbe̍t ka kuma ngin!” kunen met niya Ispiritu ne̍ Apu Diyus se̍ ya Nubya. Ket diya makagicna idi nga ayab, kunen da kuma pe̍, “Umbe̍t ka kuma ngin!” Ket diya mewwew, umadenni da kuma ngarud nga makiinum, ta mapalubusan mettin diya mayat nga makiinum ito danum nga mange̍cde̍ ka biyag, ket awan pe̍ bayad na.

Paltiing 7:17

Ta ya Urbun Karne̍ru nga uwed iya sangu niya trunu, igina met ya agay-aywan igidan, ket iturung na da ka arig nga ubbug nga mange̍cde̍ ka biyag. Ket liwliwaen ne̍ Apu Diyus da, tasun awan pulus agberberrit igidan,” kunen na.