Juan 4:10 - Ya Baru nga Tulag

¹⁰ Ket kinunen ne̍ Je̍sus igina, “No emmum kuma ngas ya sagut nga ipaay ne̍ Apu Diyus, se̍ no nagan ku nga agad-adeng ikew ka inumec nga danum, ikew kuma ngin ya umadeng iyaken, ket e̍cdan naka ka makabiyag nga danum,” kunen na.

Juan 4:10 Iomraidhean Croise

Lukas 11:13

Ngarud, orey dakayu nga toley nga uwed kinadake̍c na, emmu nu met latta ya mange̍cde̍ ka nabaru kadiya anac nu. Ket no ya Ama nu nga uwed ka langit, di ngarud nangnangruna ya panange̍cde̍ na iya Ispiritu Santu kadiya agadeng igina?” kunen na.

Juan 16:3

Agten kadiyan ngarud ya wanglen da nad dakayu, ta madi da met em-emmu ya Ama winno iyaken.

Juan 17:3

Ket ya banag nidi nga biyag nga agnanayun, ket itu ya pannakaem-emmu da ikew nga is-isa se̍ pudnu nga Diyus, se̍ ya pannakaem-emmu da pe̍ e̍ Je̍su Kristu, nga itu ya nibon mu.

Juan 3:16

Tutu met yan, ta gapu iya napalaus nga panagayat ne̍ Apu Diyus kadiya toltoley idi nga lubung, niyawat na ya kackaisu nga Anac na, tasun amin nga mamati igina, madi mapukaw, no di lugud mae̍cdan ka agnanayun nga biyag.

Juan 4:14

Ngem diya amin nga uminum iya danum nga e̍cde̍c igida, madi da nad mewwew win. Ta ya danum nga e̍cde̍c, agbalin nga arig nga ubbug nga kumkumbuwar manipud iya uneg niya toley, ket mange̍cde̍ igina ka makabiyag nga danum, nga itu ya biyag nga agnanayun,” kunen na.

Juan 6:35

Ket e̍ Je̍sus, kinunen na ngarud igida, “Iyaken met yan nga pagbiyag, nga maiyarig ka makan nga pakabiyagan. Itu nga ya umadenni nga sumurut iyaken, madi met mabisinin. Ket ya mamati iyaken, madi pe̍ mewwew win.

Juan 6:51

Iyaken mettas ya pagbiyag nga maiyarig ka pakabiyagan nga naggayat ka langit. Ket ya orey nagan na nga toley nga mangan idi nga pagbiyag nga ipaay ku, agbiyag met ka agnanayun. Ket idi nga pagbiyag, itu mettas ya beggic nga iyawat ku nad tasun uwed pakabiyagan diya toltoley idi nga lubung,” kunen ne̍ Je̍sus.

Aramid 9:11

Ket kinunen niya Apu igina, “Mawe̍ ka iya kalsada nga maawagan ka Nalinteg. Ket enna baley de̍ Hudas, damagem ya isa nga toley nga iTarsu nga agnagan ka Saulu, ta uwed antuni nga agkarkararag.

Ruma 8:32

Ngarud, e̍ Apu Diyus, madi na nipaidam ya mismu nga Anac na nga Je̍sus, no di lugud nipalubus na nga napatey nga agpaay dactida nga amin. Ket gapu ta nipaay na ya Anac na dactida itun, di nactida ngarud kanunungen iya panange̍cde̍ na nga siaasi iya Anac na ka amin nga banbanag?

1 Kurintu 1:30

Ta e̍ Apu Diyus mettas ya nangpaitipun dactida e̍ Kristu Je̍sus, nga igina ya pinagbalin ne̍ Apu Diyus nga pagtaudan niya sirib tida, se̍ ya pannakapalinteg tida iya imatang na, se̍ ya pannakaisaad tida nga toley na, se̍ ya pannakawayawaya tida kadiya basbasul tidan.

1 Kurintu 10:4

se̍ iminum da pe̍ nga amin ito danum nga pinagayus ne̍ Apu Diyus ito batu. Ket e̍ Kristu mettas ya kaiyarigan nitun nga batu nga pe̍yeng nga uwed igida itun.

2 Kurintu 9:15

Ket no dactida, agyaman tida ngarud pe̍ e̍ Apu Diyus, gapu iya panangaasi nga nisagut na dactidan, nga awan kapada na!

E̍pe̍su 2:8

Ta gapu was iya siaayat nga asi ne̍ Apu Diyus, ket naisalakan kayu ngarud gapu iya panamati nu. Ket ya pannakaisalakan nu, bekken ngarud nga gapu iya bukud nu nga winangel, no di lugud gapu ta nikaasi ne̍ Apu Diyus dakayu.

He̍briyu 6:4

Agten tida kuma ngarud iyan, ta emmu tida nga diya toley nga sumina iya panamati da, awan lugud pagbabawiyan dan no tutu nga nakaawat dan. Ngarud, no naglak-am dan iya panangaasi ne̍ Apu Diyus se̍ iya kauwed niya Ispiritu Santu,

1 Juan 5:20

Ket emmu tida pe̍ nga inumbe̍tin ya Anac ne̍ Apu Diyus, ket ne̍cdan nactida ka pannakaawat tasun maemmuwan tida ya pudnu nga Diyus. Ket naitipun tidan iya pudnu nga Diyus, ta naitipun tida mettin iya Anac na nga Je̍su Kristu. Igina met ya pudnu nga Diyus se̍ paggayatan niya agnanayun nga biyag.

Paltiing 21:6

Ket kinunen na manin iyaken, “Natungpal ngarud diyan nga kagi yin! Iyaken met ya pangrugiyan se̍ ya panggibusan niya amin, ya pagtaudan se̍ ya pagtungpalan niya amin. Ket diya mewwew, painumec da iya danum niya ubbug nga mange̍cde̍ ka biyag, nga awan bayad na.

Paltiing 22:17

Ket, “Umbe̍t ka kuma ngin!” kunen met niya Ispiritu ne̍ Apu Diyus se̍ ya Nubya. Ket diya makagicna idi nga ayab, kunen da kuma pe̍, “Umbe̍t ka kuma ngin!” Ket diya mewwew, umadenni da kuma ngarud nga makiinum, ta mapalubusan mettin diya mayat nga makiinum ito danum nga mange̍cde̍ ka biyag, ket awan pe̍ bayad na.

Paltiing 7:17

Ta ya Urbun Karne̍ru nga uwed iya sangu niya trunu, igina met ya agay-aywan igidan, ket iturung na da ka arig nga ubbug nga mange̍cde̍ ka biyag. Ket liwliwaen ne̍ Apu Diyus da, tasun awan pulus agberberrit igidan,” kunen na.