Juan 14:26 - Ya Baru nga Tulag

²⁶ Ngem gapu nad iya kinaturay ku, ibon niya Ama dakayu ya Mamagbaga, nga itu ya Ispiritu Santu. Ket itu nad ya mangisuru dakayu iya amin nga banag maipanggep kadidi, se̍ ipalagip na nad pe̍ dito amin nga nibagac dakayu.

Juan 14:26 Iomraidhean Croise

Matyu 1:18

Ket agten idi ya kasasaad nito pannakaiyanac ne̍ Je̍su Kristu: E̍ Marya nga ina na, naitulag itunin nga maiyasawa e̍ Huse̍. Ket sacbay niya panagtipun da, naemmuwan nga uwed met bucsit nan, ket gapu met iya Ispiritu Santu ya bucsit na.

Matyu 1:20

Ngem ito uwed iya lemlemmet na pekkem yan, uwed met isa nga anghe̍l niya Apu nga nagpasingen igina iya pasmeg na. Ket kinunen met nito anghe̍l, “Huse̍ nga kapututan ne̍ Ari Dabid, madi ka umikeb nga umawat e̍ Marya nga asawa mun, ta gapu mettas iya Ispiritu Santu ya bucsit na.

Matyu 28:19

Itu nga mawe̍ kayu kuma ngarud agpasurut kadiya toltoley kadiya amin nga pagpagiliyan, tasun umapu da iyaken. Bautisaran nu diya pasurut gapu iya turay nga uwed iya Ama, Anac, se̍ iya Ispiritu Santu.

Matyu 3:11

“Ket iyaken ita, danum ya pamautisar ku dakayu gapu iya panagbabawi nu. Ngem uwed nad umbe̍t nga sumarunu iyaken nga dacdackel ya pannakabalin na ngem iyaken, ket di yac pe̍ maikari nga orey no mangabsin ngas iya palloka na para igina. Ket igina, ya Ispiritu Santu se̍ apuy met ya pamautisar na nad dakayu.

Markus 12:36

Nagan ya kunen nu maipanggep ito kinunen nito Dabid, ito niturung niya Ispiritu Santu, ta kinunen na nga, ‘Kinunen niya Apu iya Apuc, “Agtugew ka idi nga madiwanan ku agingga nga mapasukuc diya gumurgura ikew, nga arig nga ipatey ku ya sakam igida,”’ kunen nito Dabid itun.

Markus 13:11

Ket no tacmen dakayu nga idarum, madi kayu nad madanagan no nagan ya kagiyen nu kuma igida. Basta ikagi nu was ya maipakaemmu dakayu iyan mettas nga kanitu. Ta ya kinapudnu na, bekken nad nga agtaud dakayu diya ikagkagi nu, no di lugud agtaud iya Ispiritu Santu.

Lukas 1:15

Ta yan nga anac nu, napateg nad iya imatang niya Apu. Ket masapul nga madi nad uminum ka basi winno orey nagan na nga makapae̍nglew. Ket manipud iya pannakaiyanac na, maturayan nad iya Ispiritu Santu.

Lukas 1:35

Ket kinunen nito anghe̍l igina, “Umbe̍t met ikew ya Ispiritu Santu, ket uwed nad met ikew ya pannakabalin niya Kangatuwan. Itu nga ya iyanac mu nad nga awan basul na, ket maawagan ka Anac ne̍ Apu Diyus.

Lukas 1:41

Ket ito nagicna ne̍ E̍lisabe̍t to kablaaw ne̍ Marya, kimiwa mettin ya ke̍bit iya bessug na. Ket e̍ E̍lisabe̍t, naidalanin iya Ispiritu Santu,

Lukas 1:67

Ket e̍ Sakaryas nga ama ne̍ Juan, naidalan iya Ispiritu Santu itun, ket nagipadtu nga kinunen na,

Lukas 11:13

Ngarud, orey dakayu nga toley nga uwed kinadake̍c na, emmu nu met latta ya mange̍cde̍ ka nabaru kadiya anac nu. Ket no ya Ama nu nga uwed ka langit, di ngarud nangnangruna ya panange̍cde̍ na iya Ispiritu Santu kadiya agadeng igina?” kunen na.

Lukas 2:25

Ket enna He̍rusale̍m itun, uwed isa nga lakay nga agnagan ka Simyun. Nalinteg yan nga toley, se̍ managtungpal iya pammati na, ket pinadpadaanan na nga sinanama ya pannakaliwliwa diya iIsrae̍l. Ket uwed pe̍ igina ya Ispiritu Santu.

Lukas 24:49

Ket agten idi: Ibon ku dakayu to nikari niya Amac. Ket masapul nga madi kayu ngarud pekkem pumanpanaw idi nga siyudad, agingga nga di kayu pekkem mae̍cdan ka pannakabalin nga gayat ka langit,” kunen na.

Lukas 3:22

Ket nagpasegged met igina ya Ispiritu Santu nga sibebeggi, nga umasping ka kalapati. Ket uwed pe̍ nagicna nga timec antuni nga nagtaud ka langit, nga kinunen na, “Ikew ya Anac ku nga dungdungnguwec. Ikew ya pakaay-ayuwac,” kunen na.

Juan 1:33

Madi yac pe̍ emmu itun no nagan na yani nga nibon ne̍ Apu Diyus. Ngem e̍ Apu Diyus nga nangibon pe̍ iyaken nga mamautisar ka danum, ket kinunen na met iyaken itun nga, ‘Masingem nad ya Ispirituc nga sumegged nga makitipun iya isa nga toley. Ket itu yanin ya mamautisar ka Ispiritu Santu,’ kunen na iyaken.

Juan 12:16

Ngem dito adalan ne̍ Je̍sus, madi da pekkem naawatan itun ya kaipapennan diyan nga napasamac. Ngem ito simoli nge̍ Je̍sus ka langit nga pakaidayawan nan, nalagip dan nga uwed met naisurat nga agten iyan iya Bibliya maipanggep igina, ket naawatan dan nga natungpal met nga tutu win.

Juan 14:16

Ket agadeng ngac nad iya Ama, ket paibon ku igina ya sumukat nga Mamagbaga dakayu, tasun uwed dakayu nga agnanayunin.

Juan 14:25

“Nibagac didi dakayu ita, ta makipagedyan nac pekkem dakayu.

Juan 15:26

“Ket umbe̍t nad ya Mamagbaga nga ibon ku dakayu, nga gayat iya Ama. Itu ya Ispiritu nga mangipakaemmu iya pudnu, se̍ itu met pe̍ ya Ispiritu nga aggayat iya Ama. Ket igina nad ya mangipakaemmu iya kinapudnu maipanggep iyaken.

Juan 16:7

Ngem ibagac ya pudnu dakayu: Nabarbaru met para dakayu no pumanaw wac. Ta no madi yac pumanaw, madi met umbe̍t dakayu ya Mamagbaga. Ngem no pumanaw wac kun, ibon ku mettas dakayu.

Juan 2:22

Itu ya gapu na nga ito napagungar nge̍ Je̍susin, nalagip dito adalan na nga kinagi na yan. Itu nga namati da ngarud ito naisurat iya Bibliya se̍ ito kinagi ne̍ Je̍sus.

Juan 20:22

Ket ito nakagi na yanin, imanges nga inasngawan na da, ket kinunen na, “Awaten nu ya Ispiritu Santu.

Juan 6:45

Malagip nu to naisurat iya Bibliya nga kinunen dito mammadtu, ‘Ket igida, sursuruwan nad ne̍ Apu Diyus da nga amin,’ kinunen da itun. Ket tutu met nga amin diya agad-adal se̍ mangipangag e̍ Apu Diyus, umadenni da ngarud nga sumurut iyaken.

Juan 7:39

Ket yan nga kinagi na, itu ya maipanggep iya Ispiritu Santu nga mae̍cde̍ nad kadiya mamati e̍ Je̍sus. Ngem madi pekkem nae̍cde̍ ya Ispiritu Santu itun, ta madi pekkem simoli nge̍ Je̍sus ka langit nga pakaidayawan na.

Aramid 1:2

patingga ito pannakaipangudu na ka langit. Ket sacbay nga naipangudu ka langit, uwed bilbilin nga nibilin na kadito pinili na nga apustule̍s na, ket nibilin na didi gapu iya panangidalan niya Ispiritu Santu igina.

Aramid 1:4

Ket ito name̍nsan nga naguurnung da, itu yani ya nibilin ne̍ Je̍sus igida: “Madi kayu pekkem pumanaw ka He̍rusale̍m, ta itonan nu pekkem to nikari niya Ama nga nibagac dakayu itun.

Aramid 1:8

Ngem dito banbanag nga kinagic se̍ winangel ku, ket emmu nu dan. Ket no umbe̍t nad dakayu ya Ispiritu Santu, paturedden nakayu nad gapu iya pannakabalin na, tasun mangipakaemmu kayu iya kinapudnu maipanggep iyaken. Mangipakaemmu kayu nad ennid He̍rusale̍m, se̍ iya amin nga prubinsiya nga Hudya ngi, se̍ enna prubinsiya nga Samarya, se̍ orey pe̍ iya amin nga lubung,” kunen na.

Aramid 11:16

Ket nalagip kun to kinagi niya Apu itun, ito kinunen na, ‘To Juan, binautisaran nakayu ngarud ka danum itun. Ngem uwed nad panagbautisar nu nga pannakaiyalubu niya Ispiritu Santu dakayu,’ kunen niya Apu itun.

Aramid 13:2

Ket iya name̍nsan nga algew, madama da nga agsirsirbi maigapu iya Apu, se̍ niparit da pe̍ yin iya beggi da ya mangan. Ket ya Ispiritu Santu, kinunen na igida, “Isibna nu ngarud nga ipaay de̍ Be̍rnabe̍ nge̍ Saulu, ta uwed panggep ku nga ipawangel igida,” kunen na.

Aramid 13:4

Ket iya agten iyan, nibon ngarudin niya Ispiritu Santu de̍ Be̍rnabe̍ nge̍ Saulu nga nawe̍. Nanagus da nga nawe̍ ka ili nga Se̍lyusiya, se̍ da naglugan ka bapur manipud iyan, nga nawe̍ da ka puru nga Sipre̍.

Aramid 15:28

Ta ya Ispiritu Santu se̍ dakami, gabay mi no madi kayu kuma maparigatan gapu kadiya bilbilin, itu nga didi ngas diya kasapulan nga unay nga tungpalen nu:

Aramid 15:8

Ket e̍ Apu Diyus nga makailasin iya panpanunut diya toley, nipasingen na met ya panangannamung na kadito bekken nga Hudyu, ito nipabulun na ya Ispiritu Santu igida nga agten pe̍ dactida itun.

Aramid 16:6

Ket mawe̍ de̍ Pablu kuma ka prubinsiya nga Asiya tasun mangikasaba da antuni iya kagi ne̍ Apu Diyus, ngem pinaritan met niya Ispiritu Santu da. Itu nga nawe̍ da pinasyar ya prubinsiya nga Prigya ngin, se̍ ya prubinsiya nga Galasiya.

Aramid 2:33

Naipangatu nge̍ Je̍susin nga nawe̍ iya madiwanan ne̍ Apu Diyus, nga itu ya kadayawan nga saad. Ket inawat ne̍ Je̍sus to nikari ne̍ Apu Diyus itun, nga itu ya Ispiritu Santu nga naiyalubu win dakami. Ket itu win ya masingsingen se̍ magicgicna nu ita.

Aramid 2:4

Ket naidalan da nga aminin iya Ispiritu Santu, ket nagkagkagi da ka nadumaduma nga pagkakagi yin. Pinagkagi niya Ispiritu Santu da ka pagkakagi nga nadumaduma.

Aramid 20:28

“Dikad pe̍ ita, dakayu nga panglakayen, agannad kayu nga tunggal isa, se̍ siputan nu pe̍ diya amin nga mamati nga nitalec niya Ispiritu Santu dakayu iya tunggal bungguy nu. Aywanan nu da nga nalaing, ta bukud ne̍ Apu Diyus da nga arig nga ngininaan na da iya daga niya Anac na.

Aramid 20:35

Itu yan to pe̍yeng ku nga ipaspasingen dakayu, nga aggaget tida kuma, tasun makatulung tida kadiya makasapul ka tulung. Ta malagip tida kuma to kinunen ne̍ Apu Je̍sus, nga kinunen na, ‘Dacdackel ya anggem niya mange̍cde̍ ngem iya mae̍cdan,’ kunen ne̍ Apu Je̍sus itun.” Itu yan to gibus nga kinagi ne̍ Pablu.

Aramid 28:25

Ket iya agten iyan, madi nagtutunus dito Hudyu nga aggigicna. Itu nga pumanaw da kuma, ngem uwed pekkem to nodi nga pamagbaga ne̍ Pablu igida, nga kinunen na, “Pudnu met to nipaisurat niya Ispiritu Santu ito mammadtu nga Isayas itun, nga kinunen na kadito am-ama tida,

Aramid 5:3

Ket kinunen ne̍ Pe̍dru igina, “Ananyas, ape̍ pinalubusam nge̍ Satanas nga mangituray ikew, nga agbusid ka iya Ispiritu Santu win? Ta binatim met ya duduma nga bayad nito ginet mu.

Aramid 7:51

Ket e̍ E̍ste̍ban, nituluy na nga kinunen, “Ape̍ nga agmulinas kayu mettin? Ta orey Hudyu kayu, madi kayu ipangag diya kagkagi ne̍ Apu Diyus, nga arig kayu met nga dito madi mamati igina. Tultuladen nu pe̍ yin dito am-ama nu, ta sukiran nu pe̍ diya ipaariman kuma niya Ispiritu Santu dakayun.

Aramid 7:55

Ngem e̍ E̍ste̍ban, naidalan ya panpanunut na gapu iya Ispiritu Santu. Ket limangad nga nasingen na ya dayag ne̍ Apu Diyus, se̍ nasingen na pe̍ nge̍ Je̍sus nga gasisikadin iya madiwanan ne̍ Apu Diyus.

Ruma 14:17

Ta no maipanggep iya panangituray ne̍ Apu Diyus dactida, ket bekken nga ya pannangan se̍ panaginum ya napateg, no di lugud ya pannakapalinteg, se̍ ya panagtutunus, se̍ ya panaganggem nga tumaud iya Ispiritu Santu.

Ruma 15:13

Sapay kuma ta e̍ Apu Diyus nga paggayatan niya namnama tida, paragsaken nakayu kuma ka napalaus nga anggem se̍ talna, gapu iya panamati nu igina. Agten iyan kuma ngarud tasun dumacdackel ya namnama nu igina, gapu iya pannakabalin niya Ispiritu Santu nga uwed dakayu.

Ruma 15:16

Ta nisaad nac ngarud nga agsirsirbi e̍ Kristu Je̍sus para kadiya bekken nga Hudyu. Agsirsirbi yac kunec, ta gapu iya panangikaskasabac iya Makaparagsac nga Damag, iyarig ku met yani nga wangel ku kadiya wangel diya agsirsirbi iya Te̍mplu. Ta ipaay ku e̍ Apu Diyus diya bekken nga Hudyu nga mamati yin, nga arig nga igida ya idatun ku e̍ Apu Diyusin. Ket igida, maiyarig da nga pagdatun nga makaay-ayu ngarud e̍ Apu Diyus, ket nagbalin dan nga agpaay igina gapu iya Ispiritu Santu.

Ruma 5:5

Ket madi tida ngarud mapaay idi nga namnama tida. Ta nipakaemmu ne̍ Apu Diyus ya ayat na dactidan, nga arig nga nibuyat na dactida, gapu iya Ispiritu Santu nga naipaay dactida.

1 Kurintu 12:3

Itu nga gabay ku no maawatan nu nga ya toley nga idalan niya Ispiritu ne̍ Apu Diyus ya panpanunut na, madi na met mabalin ya agkunen nga, “Mailunud kuma nge̍ Je̍sus.” Ket iya agten iyan pe̍, awan toley nga makabalin nga agkunen nga, “E̍ Je̍sus ya Apu,” malacsid no paidaldalan iya Ispiritu Santu.

1 Kurintu 6:19

Madi nu kad nga emmu nga ya beggi nu, ket itu ya te̍mplu mettas nga paged-edyanan niya Ispiritu Santu nga nibon ne̍ Apu Diyus dakayu? Itu nga bekken nu nga kuwa ya beggi nun, no di lugud kuwa ne̍ Apu Diyusin.

2 Kurintu 13:14

Uwed kuma dakayu nga amin ya siaayat nga asi ne̍ Apu Je̍su Kristu, se̍ ya ayat ne̍ Apu Diyus, se̍ ya pannakibulun niya Ispiritu Santu.

2 Kurintu 6:6

Ket ipasingen mi pe̍ nga pudnu kami nga agsirsirbi e̍ Apu Diyus gapu iya nadalus nga panagbiyag mi, se̍ iya pannakaemmu mi maipanggep iya panamati e̍ Kristu, se̍ iya panagpasinsiya se̍ panangngaasi mi ka toley, se̍ gapu iya kauwed niya Ispiritu Santu dakami, se̍ gapu pe̍ iya napudnu nga panagayat mi.

E̍pe̍su 1:13

Ket iya agten iyan, namati kayu e̍ Kristu ito nagicna nu ya kasaba maipanggep iya kinapudnu, nga itu ya Makaparagsac nga Damag nga pakaisalakanan nu. Ket gapu iya pannakaitipun nu e̍ Kristu, arig nga minarkaan nakayu nge̍ Apu Diyus iya Ispiritu Santu. Itu ya Ispiritu nga nikari ne̍ Apu Diyus, ket itu ya pakaemmuwan iya panangtagikuwa na dakayu.

E̍pe̍su 1:17

Ngarud, gapu dakayu, agpacpakaasi yac e̍ Apu Diyus nga Diyus mettas niya Apu tida nga Je̍su Kristu se̍ ya madaydayaw nga Ama. Ipacpakaasic nga e̍cde̍ na kuma dakayu ya sirib se̍ pannakaawat nga gayat iya Ispiritu Santu, tasun makaawat kayu kuma maipanggep e̍ Apu Diyus.

E̍pe̍su 4:30

Ket se̍ madi nu kuma ngarud paldaangan ya Ispiritu Santu. Igina mettas ya Ispiritu ne̍ Apu Diyus nga arig nga marka nga mangpatalged dakayu maipanggep iya timpu nad nga panangipawayawaya ne̍ Apu Diyus dakayu.

1 Te̍salunika 4:8

Dikad pe̍ ya agsukir idi nga sursuru, bekken nga toley ya pagsukiran na no di lugud e̍ Apu Diyus nga mange̍cde̍ dactida iya Ispiritu na nga nasantuwan.

2 Timutyu 1:14

Ket uwed met pe̍ dactida ya pannakabalin niya Ispiritu Santu nga aged-edyan dactida. Ket igina ya tumulung ikew tasun madi ka liwayan ya kustu nga sursuru nga naitalec ikew.

Titu 3:5

itu win to nangisalakan nan dactida. Ket to panangisalakan na dactida, bekken nga gapu kadiya nabaru nga tinungpal tida, no di lugud gapu was iya asi na. Nisalakan nactida gapu iya panangugas niya Ispiritu Santu dactida. Ta gapu iya Ispiritu Santu, nagbalin tida nga anac ne̍ Apu Diyusin, se̍ nae̍cdan tidan ka kabarbaru nga biyag.

He̍briyu 10:15

Itu met pe̍ ya ipanecnec niya Ispiritu Santu dactida, ta uwed nipaisurat na iya Bibliya nga kunen na,

He̍briyu 2:4

Ket e̍ Apu Diyus, nipanecnec na met pe̍ maipanggep iyan, gapu kadiya nipasingen na nga pagilasinan, se̍ duduma nga nakaskasdaaw, se̍ diya nadumaduma nga nipawangel na gapu iya pannakabalin na. Ket pammanecnec pe̍ to panangiwaras ne̍ Apu Diyus ka nadumaduma nga pannakabalin nga ipaay niya Ispiritu Santu, sigun iya tarigagayan ne̍ Apu Diyus nga panangiwaras.

He̍briyu 3:7

Dikad pe̍ ipangag tida kuma ngarud ya kunen niya Ispiritu Santu, nga kunen na, “Ita nga timpu, no magicna nun ya kagi ne̍ Apu Diyus,

He̍briyu 9:8

Ket nalawag ngarudin ya isuru niya Ispiritu Santu dactida maipanggep kadiyan nga banbanag, nga agten idi: Bayat niya kauwed pekkem nito makin-ruwar nga parte̍ nito pagdaydayawan idi nga lubung, madi pekkem naipakaemmu kadiya toltoley no kumaan niya makauneg da kuma iya pudnu nga Kasantuwan nga Edyan.

1 Pe̍dru 1:12

Ket nipakaemmu ne̍ Apu Diyus kadito mammadtu itun nga bekken nga maipanggep igida itun ya kaipapennan nito panagsirsirbi da, no di lugud maipanggep dakayu ita nga timpu. Ket ita, itu yani ya Makaparagsac nga Damag nga nipakaemmu diya mangaskasaba dakayu, gapu iya Ispiritu Santu nga naibon nga gayat ka langit. Ket orey pe̍ diya anghe̍le̍s ne̍ Apu Diyus, kinalikaguman da met pe̍ nga maemmuwan kuma ya banag nidi nga damag.

2 Pe̍dru 1:21

Ta awan pulus kadiyan nga padtu ya nagtaud ngas iya nakem toley, no di lugud nagtaud e̍ Apu Diyus gapu iya panangidalan niya Ispiritu Santu kadiya toley nga nangagi.

1 Juan 2:20

Ket no dakayu, uwed dakayun ya tulung nga ipaay niya Ispiritu Santu, ket makaemmu kayu nga amin iya kinapudnu win.

1 Juan 2:27

Ket no dakayu, silalagip kayu iya tulung nga ipaay niya Ispiritu Santu nga uwed nga pe̍yeng dakayu, nga itu ya ne̍cde̍ ne̍ Kristu dakayu. Itu nga awan met kasapulan nu nga sabali nga mangisursuru dakayun, ta ya Ispiritu Santu met ya mangisuru dakayu maipanggep ka amin nga banbanag. Ket pudnu was met ya isursuru na dakayu, nga awan busid na. Itu nga laglagipen nu kuma ngarud nge̍ Kristu, sigun iya nisuru niya Ispiritu Santu dakayu.

1 Juan 5:7

Dikad pe̍ uwed met tellu nga mangipanecnec maipanggep e̍ Je̍su Kristu:

Hudas 1:20

Ngem dakayu nga patpatgec, pabilgen nu kuma ya panpanunut nu gapu iya nadiyusan mettas nga pammati nu, se̍ paiturayan kayu kuma iya Ispiritu Santu iya panagkararag nu.

Paltiing 2:11

“Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, madi da nad madusa ka maikadduwa nga ipapatey.’”