Juan 11:51 - Ya Baru nga Tulag

⁵¹ Ngem yan nga kinagi nito Kaipas, bekken nga timaud iya kabucbukudan na ngas nga nakem. Ta gapu ta igina ya naisaad nga kangatuwan nga agsirsirbi iyan nga dagun, padtu ngarud to kinagi na, nga nipaikagi ne̍ Apu Diyus igina. Ket to padtu, maipanggep met iya pannakatey ne̍ Je̍sus nga maipaay iya pannakaisalakan diya toltoley iya pagiliyan da.

Juan 11:51 Iomraidhean Croise

Matyu 20:28

Ta agten met iyan ya Anac nga Naipatoley. Madi inumbe̍t tasun pasirbiyan kuma kadiya duduma, no di lugud tasun agsirbi, se̍ tasun ipaay na ya biyag na nga pangsubbut kadiya adu nga toltoley,” kunen na.

Juan 11:49

Ngem nagkagi to isa igida nga agnagan ka Kaipas, nga igina to agdama nga kangatuwan nga agsirsirbi iya Te̍mplu itun nga dagun, ket kinunen na, “Ape̍? Arig met nga awan nga pulus emmu nun!

Juan 18:13

Ket nipen da nga nipasangu nga nona e̍ Anas nga katugangan nga lalaki nito Kaipas. Ket to Kaipas, igina ya agdama nga kangatuwan nga agsirsirbi iya Te̍mplu itun nga dagun.

1 Kurintu 13:2

Agten pe̍ no nalaing ngac kuma nga mangasaba, se̍ no uwed kuma pe̍ iyaken ya pannakabalin nga makaawat kadiya amin nga banbanag nga di pekkem naipacpakaemmu ka toley, se̍ orey no uwed kuma iyaken ya pannakaawat kadiya amin nga banbanag, se̍ no awan kuma nga pulus pagkurangac iya panamatic, tasun makaiyalis sac kuma ka tageytey gapu mettas iya nabileg nga panamatic, ket awan met latta sirsirbic, no bekken nga maidanggay didi ka ayat ku.

2 Kurintu 5:21

Ta gapu dactida, pinagbalin ne̍ Apu Diyus nge̍ Kristu nga nadusa gapu ka basul, orey awan met pulus basul na. Agten iyan ya winangel na, tasun gapu iya pannakaitipun tida e̍ Kristu, agbalin tida nga napalinteg, nga agten mettas iya kinalinteg ne̍ Apu Diyus.

Galasiya 3:13

Ngem e̍ Kristu, winayawayaan nactidan iya pakaukuman nga ipaay niya Linteg ne̍ Muyse̍s. Ta e̍ Kristu met ya naukum nga naisunu para dactida, maikanatad iya naisurat pe̍ iya Bibliya nga kunen na, “Maemmuwan ngarud ya panangukum ne̍ Apu Diyus iya orey nagan na nga maisabit ka kayu nga pakapateyyan na,” kunen na.

1 Pe̍dru 2:24

E̍ Kristu mettas to nagagtu kadiya basbasul tida nga naibulun iya beggi na ito pannakailansa na ito krus. Agten iyan ngarud ya winangel na, tasun agbalin tida nga arig nga natey yin nga madi agbasbasulin, se̍ tasun agbiyag tida nga agpaay iya kinalinteg gin. Ket gapu ngarud ito pannakatalingu ne̍ Kristu, naagasan kayun.

1 Pe̍dru 3:18

Ket agten pe̍ iyan nge̍ Kristu. Ta igina, natey met nga nam-ame̍nsan itun nga naipaay kadiya basbasul, ket kustu win para iya amin nga timpu. Orey awan basul na, natey met para dactida nga toley nga sibabasul, tasun iyadenni nactida e̍ Apu Diyus. Ket tutu met, ata gapu iya beggi na, ket natey. Ngem gapu iya Ispiritu, napabiyag.

1 Juan 2:2

Ta e̍ Je̍su Kristu mettas ya pakaudasan nga pakapakawanan diya basbasul tida, ket bekken nas nga diya basbasul tida, no di pe̍ diya basbasul diya amin nga toltoley iya lubung.