He̍briyu 9:10 - Ya Baru nga Tulag

¹⁰ Ta dito datdatun da itun, al-alagaden ngas met nga agpaay ngas kadiya masingen nga banbanag, nga agten kadiya pannangan, panaginum, se̍ nadumaduma nga al-alagaden maipanggep iya pannakadalus. Ket napateg diyan agingga ngas iya timpu niya panangbangun ne̍ Apu Diyus iya kabarbaru nga panggep na.

He̍briyu 9:10 Iomraidhean Croise

Markus 7:4

Se̍ ugali da pe̍ nga no naggayat da iya tindaan, madi da pe̍ mangan, no madi da pekkem tungpalen ya panagdalus sigun iya alagaden da. Ket adu pekkem pe̍ diya duduma nga tungtungpalen da nga ug-ugali da, nga agten iya panagugas kadiya paginuman, papayan ka mainum, se̍ pagutuwan nga burinsi.

Galasiya 4:9

Ngem ita, em-emmu nun nge̍ Apu Diyus, winno em-emmu nakayun nge̍ Apu Diyus kunec kuma. Dikad pe̍ ape̍ ngarud nga gabay nu pekkem ya sumoli kadiya awan sirsirbi da nga ganggangey nga awan maipaay da nga paglaingan? Ape̍ aya nga gabay nu manin ya patagabu kadiyan?

E̍pe̍su 1:10

Ta ya panggep ne̍ Apu Diyus nga tungpalen na nad no madatngan ya kustu nga timpu, itu ya panangipasakup na kadiya amin nga parsuwa iya panangipangulu ne̍ Kristu, orey diya uwed ka langit se̍ diya uwed idi nga lubung.

E̍pe̍su 2:15

Ta to pannakatey ne̍ Kristu, ket itu ya nakaukasan nito Linteg mi nga Hudyu, agraman dito bilbilin se̍ al-alagaden na. Agten iyan ya inariman na, tasun gapu iya pannakaitipun tida iginan, bekken tida nga duwa nga bungguy toley yin, no di lugud is-isa tida nga kabarbaru nga bungguy yin, nga sukat dito duwa ngin. Ket iya agten iyanin, agkikinnaawatan tidan.

Kulusas 2:16

Dikad pe̍ ita, madi kayu ngarud paiturayan kadiya toley nga mangpilit dakayu ka bilbilin maipanggep kadiya mabalin winno maiparit kanu nga kanen se̍ inumen nu. Uwed da pe̍ ipapilit da nga bilbilin maipanggep kadiya ipangilin da dakayu, nga agten kadito dinagun nga padaya da, se̍ to ngilin da iya binulan nga panaglenned niya bulan, se̍ to Algew Ngilin da nga kada Sabadu.

He̍briyu 10:22

Dikad pe̍ umadenni tida kuma ngarud e̍ Apu Diyus, nga sipupudnu tida kuma se̍ awan kuma duwaduwa tida iya panagtalged tida nga sipapati yin. Ta awan kansing tidan nga pannakadusa gapu ka basul, ta arig nga nawarsiyan diya lemlemmet tidan. Ket se̍ diya beggi tida, naibilang da nga nadalusanin, nga arig nga naugasan ka nadalus nga danum.

He̍briyu 13:9

Dikad pe̍ madi kayu kuma maallilaw kadiya nadumaduma nga panursuru nga sabali. Ta ya siaayat nga panangaasi ne̍ Apu Diyus kuma ngas ya mangpabileg dactida, nga bekken lugud nga diya al-alagaden maipanggep kadiya macmakan. Ta no dito nagtungtungpal kadiyan nga al-alagaden, awan met tulung nga nae̍cde̍ igida gapu kadiyan nga tungtungpalen da.

He̍briyu 2:5

Bekken nga diya anghe̍le̍s ya nipaayan ne̍ Apu Diyus ka saad nga mangituray kadiya uwed iya lubung iya maadpangan nga timpu, nga itu pe̍ ya timpu nga kunec idi nin.

He̍briyu 6:2

Se̍ madi tida pe̍ masapul nga adalen manin ya maipanggep kadiya nadumaduma nga al-alagaden maipanggep iya pannakadalus, winno ya panangipatey ka ima iya ulu niya maikararagan, se̍ ya panursuru maipanggep iya panagungar nad diya natey, se̍ ya panursuru maipanggep iya pannakaukum nga agnanayun ya dusa na.

He̍briyu 6:5

se̍ no naemmuwan da pe̍ yin ya kinapaw-is niya kagi ne̍ Apu Diyus se̍ ya pannakabalin nga masingen nad iya maadpangan nga timpu,

He̍briyu 7:12

Ket gapu ta nasukatanin to panagsirsirbi dito mangibegbeggi, masapul ngarud met nga masukatan pe̍ ya Linteg gin.

He̍briyu 7:16

Ket idi nga nagpasingen nin, nagbalin ngarud nga mangibegbeggi dactida e̍ Apu Diyus. Ngem ya panangibegbeggi na, bekken nga sigun iya bilin niya isa nga linteg maipanggep kadiya nagputputut nga nagtaudan diya agsirsirbi e̍ Apu Diyus, no di lugud naisaadin gapu iya pannakabalin nga tumaud iya agnanayun nga biyag nga madi mabalin nga pagpatinggaen.

He̍briyu 9:1

Ket ito nona nga tulag ne̍ Apu Diyus kadiya toley na, uwed dito bilbilin maipanggep iya panagdaydayaw da igina. Se̍ uwed pe̍ to nasantuwan nga pagdaydayawan nga inariman toley idi nga lubung.